RSS 

Komunikadus

  • 02 outubru 2023Sorumutuk Konsellu Ministrus nian iha loron 2 fulan-outubru tinan 2023
    Prezidénsia Konsellu Ministrus
    IX Governu Konstitusionál
    ...........................................................................................................................
    Komunikadu Imprensa
    Sorumutuk Konsellu Ministrus nian iha loron 2 fulan-outubru tinan 2023
    Konsellu Ministrus hala’o sorumutuk iha Palásiu Governu, Dili, no delibera ona hodi aprova montante totál despeza nian ne’ebé relasiona ho títulu orsamentál ida-idak kona-ba Orsamentu Jerál Estadu ba tinan 2024 (OJE 2024), ho valór globál ne’ebé prevee ona hamutuk dolar amerikanu billaun 1,6.
    Montante ida-ne’e reflete redusaun 18%, ekivale ba dolar amerikanu hamutuk millaun 360, kompara ho OJE tinan 2023.
    Tetu agregadu dolar amerikanu hamutuk biliaun 1,6 inklui dotasaun ida husi dolar amerikanu hamutuk 1.458.292.345 ba administrasaun sentrál, dolar amerikanu hamutuk 81.707.655 ba seguransa sosiál no dolar amerikanu hamutuk 60.000.000 destina ba Rejiaun Administrativa Espesiál Oekusi Ambenu. Valór ida-ne’e la inklui Fundu Rezerva Seguransa Sosiál nian, ho montante hamutuk dolar amerikanu 162.007.651.
    Ho valór totál OJE tinan 2024, parsela husi 400.276.781 sei aloka ba saláriu no vensimentu, hodi reprezenta ba redusaun husi pursentu 14% iha relasaun ho tinan 2023. Ho valór 254.767.075  ba beins no servisus, hodi reflete diminuisaun husi 36% kompara ho OJE tinan 2023. Ba despeza kapitál menór, prevee ho montante dolar amerikanu 247.320, enkuantu ba kapitál dezenvolvimentu dolar amerikanu milloins 177.606.384, ne’ebé koresponde ba redusaun husi pursentu 14% no 23%, ida-idak. Ikusliu, prevee dotasaun ida 767.102.440 ba transferénsias públikas, ne’ebé maka reprezenta redusaun ida husi 13% kompara ho OJE tinan 2023.
    Entidades públikas sei finaliza sira-nia proposta orsamentu, hodi bele analiza husi Komité Revizaun Orsamentál loron 23 ouubru to’o loron 9 fulan-novembru. Prevee katak projetu Proposta Lei OJE tinan 2024 bele aprova husi Konsellu Ministrus to’o Loron 14 fulan-novembru tinan 2023 no sei entrega ba Parlamentu Nasional to’o loron 24 fulan-novembru.

     


    Ikusliu, Konsellu Ministrus delibera ona hodi autoriza asinatura Akordu Administrativu ba aplikasaun Konvensaun entre Timor-Leste no Portugál kona-ba seguransa Sosiál no Memorandu Entendimentu entre Ministériu Traballu, Solidariedade Sosiál no Inkluzaun Portugál no Sekretaria Estadu Formasaun Profisionál no Empregu Timor-Leste kona-ba Mobilidade Traballadór Timoroan nian. Akordu sira-ne’e sei asina husi Ministra Solidariedade Sosiál no Inkluzaun, Verónica das Dores no Sekretáriu Estadu Formasaun Profisionál no Empregu, Rogério Araújo Mendonça, respetivamente, durante vizita ofisiál ba Portugál.
    Akordu dahuluk ne’e ho objetivu atu permite artikula no koloka iha vigór Konvensaun Seguransa Sosiál, ne’ebé permite katak sidadaun timoroan no portugés sira bele hetan benefísiu iha país rua ne‘e, no ho benefísius Seguransa Sosiál ne’ebé hanesan husi nasaun rua ne’e ida. Nune’e, iha futuru timoroan sira bainhira sira husu reforma, hodi sura, sira bele halo kálkulu pensaun nian kona-ba deskontus ne’ebé sira halo ona durante serbisu iha Portugál.
    Akordu daruak ho objetivu atu fasilita no organiza ho forma institusionál entrada timoroan sira ba Portugál hodi buka servisu. Ho akordu ida-ne’e, migrasaun timoroan sira ba Portugál bele trata ona ho dalan ofisiál no sei fasilita prosedimentu sira ne’ebé presiza hodi hetan vistus servisu. Remata
    hare tan
  • 27 setembru 2023Sorumutuk Konsellu Ministrus nian iha loron 27 fulan-setembru tinan 2023
    Prezidénsia Konsellu Ministrus
    IX Governu Konstitusionál
    ...........................................................................................................................
    Komunikadu Imprensa
    Sorumutuk Konsellu Ministrus nian iha loron 27 fulan-setembru tinan 2023
    Konsellu Ministrus hala’o sorumutuk iha Palásiu Governu, Dili, no aprova ona projetu Rezolusaun Governu, ne’ebé aprezenta husi Ministru Interiór, Francisco da Costa Guterres, ba reintegrasaun pesoál ho funsaun polisiál sira hosi Polísia Nasionál Timor-Leste.
    Ho hanoin katak diknifikasaun sentidu servisu husi polísia PNTL nian maka importante tebetebes ba funsionamentu efikás no ba manutensaun konfiansa husi públiku iha instituisaun ne-e, ba fortalesimentu morál no komprometimentu husi polísias, ne’ebé pozitivamente influensia kualidade servisu ne’ebé sira fó ba komunidade, diploma ida-ne’e hakarak atu rezolve kestaun pasajen ba situasaun apozentasaun polisia PNTL na’in-158 nian, ne’ebé halo ona durante governasaun anteriór liuhusi prosedimentu ida ne’ebé hetan ona marka ho irregularidade oin-oin.
    Nune’e, Governu reintegra filafali polísia PNTL hirak ne’e, no fó fali kompensasaun ba sira-nia tempu ne’ebé durante sira hala’o iha tempu apozentasaun, ne’ebé tuir ho sira-nia montante remunerasaun baze mensál no suplementu remuneratóriu sira ne’ebé sira tenke hetan bainhira sira seidauk tama ba situasaun reforma, ho deskontu ba montante ne’ebé benefisiárius kompensasaun simu hanesan pensaun ferik-katuas nian. Períodu tempu iha ne’ebé profisionál sira-ne’e mantein iha situasaun apozentasaun nian maka konta hanesan fó ona estadu ativu ba efeitu remunerasaun, férias, progresaun, promosaun no apozentasaun.
    *******
    Konsellu Ministrus aprova mós projetu Rezolusaun Governu nian, ne’ebé aprezenta husi Ministru Negósius Estranjeirus no Kooperasaun, ein ezersísiu, Agio Pereira no husi Vise-Ministra ba Asuntus ASEAN, Milena Maria da Costa Rangel, kona-ba Kontribuisaun Voluntáriu ho valór dolar amerikanu 100.000 ba Sentru Koordenasaun Asisténsia Umanitária ASEAN (ASEAN Coordinating Center for Humanitarian Assistance (AHA Center)).
    Konsidera mós serbisu ne’ebé dezenvolve ona husi AHA Center kona-ba jestaun katástrofe sira, fundu ida-ne’e ho nia objetivu atu apoia atividade sira monitorizasaun katástrofes nian, entre Estadu-Membru sira ASEAN nian, hamutuk ho Organizasaun Internasionál sira seluk hodi hatán ba emerjénsia sira iha rejiaun ne’e.
    *******
    Konsellu Ministrus delibera hodi autoriza asinatura ba akordu tolu ho Repúblika Sosialista Vietname, ho Sentru Komérsiu Internasionál Nasoins Unidas no ho Ministériu Komunikasoins no Informátika Repúblika Indonézia nian.
    Akordu dahuluk, entre Governu Repúblika Demokrátika Timor-Leste no Repúblika Sosialista Vietname, ho objetivu atu fó izensaun ba titulár pasaporte diplomátiku, ofisiál sira ka servisu obrigasaun vistu nian iha país sira ne’e. Akordu ida-ne’e reflete relasaun ida-ne’ebé metin no amigavel entre nasaun rua ne’e, ho dezeju mútuu hodi simplifika prosesu entrada ba sidadaun sira ne’ebé iha pasaporte diplomátiku, ofisiál ka servisu válidu, tuir lei no regulamentu sira husi país rua ne’e.
    *
    Akordu daruak, entre Governu Repúblika Demokrátika Timor-Leste no Sentru Komérsiu Internasionál Nasoins Unidas (ITC – sigla iha lian portugés) ho objetivu atu asina Akordu Sede ida, atu permite ITC formaliza ninia instalasaun iha Timor-Leste. Ho akordu ida-ne’e fó ba ITC, Ajénsia ida Nasoins Unidas nian, ho estatutu hanesan ne’ebé Timor-Leste fó ba Nasoins Unidas, ba ninia ajénsia no entidade sira iha país ne’e, tuir konvensaun internasionál sira ne’ebé ratifika ona husi Parlamentu Nasionál no ho akordu ne’ebé asina ona entre Timor-Leste no PNUD, aplika mós ba ajénsia no entidade sira seluk Nasoins Unidas nian.
    *
    Akordu datoluk, entre Ministériu Transportes no Komunikasoins Repúblika Demokrátika Timor-Leste no Ministériu Komunikasoins no Informátika Repúblika Indonézia, ho objetivu atu habelar no hadi’a koordenasaun no kooperasaun bilaterál sira iha área komunikasoins no informátika entre parte sira, hodi fornese, enkuadramentu ida ba dezenvolvimentu kooperasaun iha área komunikasoins no informátika iha Timor-Leste, tuir lei no regulamentu sira ne’ebé vigora iha país rua ne’e.
    ******
    Konsellu Ministrus, tuir projetu ne’ebé aprezenta hosi Ministru Justisa, Amândio de Sá Benevides, delibera ona hodi fó rai ida iha zona Kaikoli, hodi harii instalasoins foun ba Eskola Portugeza Dili.
    ******
    Konsellu Ministrus aprova projetu Dekretu-Lei ne’ebé aprova medida intervensaun temporária ba estabilizasaun presu foos iha merkadu, liuhosi atribuisaun subsídiu pekuniáriu ba empreza importadora sira.
    Diploma ida-ne’e determina mós konstituisaun stock suplementár ida ba seguransa foos, ho tonelada rihun 30, hodi rai iha armazein Sentru Lojístiku Nasionál (SLN), ne’ebé destina ba intervensaun sosiál iha situasaun emerjénsia, liuliu, inundasaun, katástrofe naturál, motivu sanitáriu sira, solidariedade sosiál no atu fornese ba empreza grosista sira (empreza sira ne’ebé fa’an ho kuantidade boot) karik presiza.
    Presu foos importadu, ne’ebé fa’an iha armazeins empreza importadora sira nian no fa’an filafali ba konsumidór sira iha loja sira ne’ebé fa’an foos ho kuantidade uitoan-uitoan ne’ebé ema barak liu maka konsume, estabiliza ho valór 50 sentavus kada kg.
    Benefisiárius husi medida ida-ne’e, empreza sira ne’ebé fa’an ho kuantidade boot ka operadór ekonómiku sira ne’ebé komprova, liuhusi kópia autentikada husi Autoridade Aduaneira, katak sira importa no simu ona kuantidade foos ho karaterístika ne’ebé define ona iha diploma ne’e, simu valór hamutuk dolar amerikanu 5 kada foos ho 25kg ne’ebé importa ka fa’an.
    Implementasaun husi media ida-ne’e, ninia objetivu mak atu satisfás nesesidade alimentár populasaun sira nian ho folin ida ne’ebé asesivel liu, hodi kompensa empreza importadora sira husi folin importasaun nian no kria stock minimum hamutuk foos tonelada rihun 30 ba situasaun emerjénsia.
    Períodu vijénsia husi medida ida-ne’e maka loron 180, hafoin diploma ne’e tama iha vigór, iha loron tuirmai husi ninia publikasaun.
    ******
    Konsellu Ministrus aprova mós projetu Rezolusaun Governu kona-ba nesesidade vijilánsia no prezervasaun ba sistema abastesimentu bee nian.
    Nunee, Ministériu Obras Públikas no Bee Timor-Leste kontinua tau prioridade hodi rezolve problema abastesimentu nian ho lais, ho avaliasaun no reabilitasaun ba infraestrutura sira kanalizasaun nian ne’ebé eziste, nune’e mós nia eventuál rekonstrusaun, hodi garante fornesimentu bee ne’ebé adekuadu ba populasaun. Autoridade públika kompetente sira mós iha responsabilidade hodi koordena inisiativa sira sensibilizasaun nian kona-ba importánsia husi poupa no uzu responsavel ba bee no infraestruturas kanalizasaun nian.
    *******
    Konsellu Ministrus aprova planu intervensaun ho karater urjente, ne’ebé aprezenta hosi Ministru Obras Públikas, Samuel Marçal, hodi reabilita no rekonstrui ho urjénsia infraestruturas ne’ebé afeta hosi kalamidade ne’ebé akontese iha munisípiu ualu hosi loron 2 to’o 7 fulan-jullu tinan 2023.
    *******
    Ikusliu, Konsellu Ministrus delibera ona hodi aprova prosidimentu ajuste diretu ida ne’ebé urjente ho empresa Thales DIS Singapore PTE LTD, hodi fornese unidade kaderneta ePassport hamutuk 73,150. REMATA
    hare tan
  • 25 setembru 2023Sorumutuk Estraordináriu Konsellu Ministrus nian iha loron 25 fulan-setembru tinan 2023
    Aprova ona:

    1 - Alterasaun datoluk ba Lei n. 3/2014, loron 18 fulan-juñu, ne’ebé kria Rejiaun Administrativa Espesiál Oe-Kusi Ambenu (RAEOA) no Estabelese Zona Espesiál Ekonomia sosiál Merkadu Oe-Kusi Ambenu no Ataúro.
    hare tan
  • 19 setembru 2023Sorumutuk Konsellu Ministrus nian iha loron 19 fulan-setembru tinan 2023
    Aprova ona:

    1 - alterasaun dahaat ba Lei n. 11/2009, loron 7 fulan-outubru, ne’ebé aprova Divizaun Administrativa Territóriu;

    2 - alterasaun datoluk ba Dekretu-Lei n. 6/2014, loron 26 fulan-fevereiru, kona-ba rekursus materiais no insentivu finanseiru lideransa komunitária nian sira, no kria servisu administrasaun Suku nian;

    3 - orgánika Ministériu Turizmu no Ambiente (MTA) nian;

    4 - orgánika Ministériu Agrikultura, Pekuária, Peska no Florestas;

    5 - orgánika Sekretaria Estadu Kooperativas (SEKOOP) nian;

    6 - orgánika Sekretaria Estadu Formasaun Profisionál no Empregu (SEFOPE) nian;

    7 - negosiasaun no asinatura memorandum entendimentu ida entre Provínsia Hunan, Xina no Administrasaun Munisipál Manatutu nian;

    8 - memorandum entendimentu entre Ministériu Planeamentu no Investimentu Estratéjiku Timor-Leste no Komisaun Nasionál Dezenvolvimentu no Reforma Xina, kona-ba reforsu interkámbiu informasaun nian sira iha área jestaun makroekonómika no planeamentu dezenvolvimentu ba médiu no longu prazu;

    9 - Prezidente Konsellu Diretivu ba Autoridade Turizmu Timor-Leste, I.P. (ATTL,IP) no Vogál Konsellu Diretivu ATTL, IP; no

    10 - memorandum entendimentu entre Governu Timor-Leste no Governu Brunei Darussalam ba programa haruka trabalhadór Timor-Leste ba servisu iha Brunei.
    hare tan
  • 13 setembru 2023Sorumutuk Konsellu Ministrus nian iha loron 13 fulan-setembru tinan 2023
    Aprova ona:

    1 - donativu ho montante dolar amerikanu millaun 2,5 ba Reinu Marrokus;

    2 - Prezidente Konsellu Administrasaun nian maka Prezidente Komisaun Ezekutiva TIMOR GAP, E.P. – Timor Gás & Petróleu, E.P (“TIMOR GAP”);

    3 - Prezidente Konsellu Administrasaun no, ho inerénsia, Prezidente Komisaun Ezekutiva Murak Rai Timor, E.P.;

    4 - Prezidente Konsellu Diretivu Autoridade Nasionál Petróleu, I.P. (ANP);

    5 - Prezidente Konsellu Diretivu Autoridade Nasionál Minerais, I.P. (ANM);

    6 - Prezidente Konsellu Diretivu Institutu Jeosiénsias Timor-Leste, I. P. (IGTL – sigla iha lian portugés);

    7 - sedénsia (fó) edifísius kuarteiraun Palásiu Governu nian hodi Parlamentu Nasionál uza;

    8 - manutensaun ba interese públiku kontratuál Estadu nian iha ezekusaun kontratu públiku ho ref.ª ICB/036/MAE-2020, ne’ebé asina ona iha loron 16 fulan-fevereiru tinan 2022, ba fornesimentu ekipamentus rekolla rezíduus solidus nian no ekipamentus ba operasaun aterru kontroladu, iha ámbitu projetu jestaun rezíduus solidus urbanus nian iha Dili;

    9 - naran sira ne’ebé sei propoin ba Parlamentu Nasionál ba kargu Komisáriu Komisaun Anti-Korrupsaun.
    hare tan
  • 13 setembru 2023Governu hato’o ninia solidariedade ba Marrokus
    Lori povu Timor-Leste nia naran, Governu hato’o ninia solidariedade profunda ba Povu no Governu Reinu Marrokus, ne’ebé sofre efeitu husi rai-nakdoko ho magnitude 6,8 ne’ebé akontese iha loron 8 fulan-setembru liubá.
    hare tan
  • 06 setembru 2023Sorumutuk Konsellu Ministrus nian iha loron 6 fulan-setembru tinan 2023
    Aprova ona:

    1 - alterasaun dahuluk ba Dekretu Governu n. 19/2022, loron 11 fulan-maiu, relasiona ho klasifikadores orsamentais;

    2 - Orgánika Sekretaria Estadu Igualdade nian.
    hare tan
  • 03 setembru 2023Primeiru-Ministru Xanana Gusmão partisipa iha ASEAN Summit ba dala-43 iha Jakarta
    Primeiru-Ministru Repúblika Demokratika Timor-Leste, S.E Kay Rala Xanana Gusmão hetan konvite hodi partisipa iha reuniaun ASEAN Summit iha Jakarta hahu husi Loron 5th too Loron 7th fulan-setembro tinan 2023. S.E Primeiru-Ministru sei hamutuk ho Chefi Estadu no Chefe Governu sira husi chefe membros ASEAN no parceiros diálogo hodi diskute kona-ba kestaun regionais iha area oioin no problema Internasional nebe sai preokupasaun hamutuk.
    hare tan
1 2 3 4 5 6