RSS 

Komunikadus

  • 10 agostu 2022Sorumutuk Konsellu Ministrus nian iha loron 10 fulan-agostu tinan 2022
    Prezidénsia Konsellu Ministrus
    VIII Governu Konstitusionál
    ...........................................................................................................................
    Komunikadu Imprensa
    Sorumutuk Konsellu Ministrus nian iha loron 10 fulan-agostu tinan 2022
    Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu-Lei rua, ne’ebé aprezenta husi Primeiru-Ministru no Ministru Interiór, Taur Matan Ruak, no husi Vise-Ministru Interiór, António Armindo.

    Dekretu-Lei dahuluk ne’e kona-ba estatutu profisionál ba pesoál ho funsaun polisiál Polísia Nasionál Timor-Leste (PNTL) nian. Diploma ne’e ninia objetivu maka atu fó ba PNTL estatutu profisionál ba ninia pesoál rasik, iha perspetiva atu hadi’a kondisaun serbisu ba pesoál ida-idak, iha parte ida, atu hasa’e kuadru motivasionál no autoestima (dignidade no konfiansa) membru sira PNTL nian, hodi reforsa sira-nia kapasidade atu hasoru responsabilidade ne’ebé aumenta ba beibeik, ezijénsia no presiza efikásia iha prestasaun servisu públiku Seguransa nian, tuir nivel nesesidade sosiedade timoroan nian, ne’ebé informada, kompleksa no ezijente liután, no, iha sorin seluk, hodi adapta estatutu ne’e ho realidade sosiál foun no ho dezafiu país no mundu atuál nian.

    .

    Dekretu Lei daruak ne’e ho objetivu atu halo alterasaun ba rejime remuneratóriu PNTL nian. Alterasaun ida-ne’e ho intensaun atu kumpre regra iha númeru 2 husi artigu da-24 Dekretu-Lei n. 2/2022, loron 12 fulan-janeiru nian, ne’ebé aprova ona rejime remuneratóriu PNTL nian, iha ne’ebé Estadu kompromete ona atu fó, iha tinan 2023, aumentu 15% ba remunerasaun bázika membru sira PNTL nian. Aleinde aumentu remunerasaun bázika ne’ebé prevee ona, atualiza mós diploma ne’e, hodi konsidera alterasaun ba Orgánika Polísia Nasionál Timor-Leste (PNTL) nian ne’ebé foin aprova, no mós nesesidade atu aprezenta redasaun ida ne’ebé adekuadu liután, hodi fasilita interpretasaun ba artigu balun ne’ebé hatuur iha versaun diploma ne’ebé vigora hela.

    .
    Projetu Rezolusaun Governu nian hodi kria Festival Nasionál Desportu, ne’ebé aprezenta husi Ministru Edukasaun, Juventude no Desportu, Armindo Maia no husi Sekretáriu Estadu Juventude no Desportu, Abrão Saldanha, mós hetan ona aprovasaun. Kriasaun festival ida-ne’e, ho hanoin atu halibur no kria unidade ba populasaun timoroan ne’ebé ho objetivu atu selebra atividade desportiva, hodi promove atividade fízika no promove desportu iha ninia modalidade oioin, iha planu ba edukasaun fízika no iha kategoria desportu tradisionál, rekreativu, inkluzivu no kompetisaun iha nivel aas. Festival ne’e nia objetivu atu sai hanesan forma ida ne’ebé hodi promove joven sira, nune’e mós ba populasaun sira seluk, importánsia husi desportu no atividade fízika, ninia benefísiu sosiál, ekonómiku, polítiku no iha área saúde públika nian. Ne’e sei sai eventu ida ne’ebé sei hala’o iha tinan-tinan, ne’ebé nia estrutura, kalendarizasaun no modelu tenke define mós, tinan-tinan, husi Ministériu ne’ebé responsavel ba área desportu nian.
    .
    Konsellu Ministrus aprova ona projetu Rezolusaun Governu nian, ne’ebé aprezenta husi Ministra Negósius Estranjeirus no Kooperasaun, Adaljiza Albertina Xavier Reis Magno, ne’ebé aprova akordu entre Governu Repúblika Demokrátika Timor-Leste nian ho g7+, kona-ba montante, finalidade no uzu ba subsídiu ne’ebé atu fó husi Repúblika Demokrátika Timor-Leste ba organizasaun intergovernamentál ida-ne’e. Ho akordu ida-ne’e, ne’ebé asina ona husi parte rua iha loron 21 fulan-marsu tinan 2022, nia objetivu atu kontribui ba atividade sira g7+ nian, Governu sei aloka hosi tinan 2022 to’o 2027, montante dolar amerikanu millaun ida, tinan-tinan. Subsídiu ida-ne’e tenke uza ba promosaun kooperasaun nian entre Estadus-Membrus no ba finansiamentu despeza sira funsionamentu g7+ nian  no ba organizasaun sorumutuk ministeriál nian tinan-tinan.
    .
    Ikusliu, Konsellu Ministrus delibera ona hodi aprova prosedimentu sira aprovizionamentu nian, liuhosi konkursu públiku internasionál, hodi hala’o kontratu públiku ba konstrusaun eskema irrigasaun nian iha Laivai, iha Munisípiu Lautein no Galata, no iha Munisípiu Baukau, tuir projetu ne’ebé aprezenta husi Ministru Agrikultura no Peskas, Pedro dos Reis. Projetu irrigasaun Galata nian ne’e sei kobre área ida ho ektare 600 no sei benefisia uma-kain hamutuk 750. Projetu irrigasaun Laivai nian sei kobre ektare 300, ne’ebé inklui natar ne’ebé iha ona ektare 176 no sei benefisia uma-kain hamutuk 434. REMATA
     
    hare tan
  • 10 agostu 2022Governu Timor-Leste hato’o ninia solidariedade ba Koreia Súl
    Prezidénsia Konsellu Ministrus
    VIII Governu Konstitusionál
    ...........................................................................................................................
    Komunikadu Imprensa
    Dili, loron 10, fulan-agostu, tinan 2022
    Governu Timor-Leste hato’o ninia solidariedade ba Koreia Súl
    Lori povu Timor-Leste nia naran, Governu hato’o kondolénsia ba família no belun vítima sira inundasaun nian ne’ebé kauza husi udan forte liu ne’ebé afeta ona Seul, kapitál Koreia Súl nian, hanesan akontese iha tinan 80 liu bá.
    Durante segunda-feira kalan boot, oras lokál, udan komesa boot ona, iha Seul no iha sidade viziña sira, rezulta ema mate pelumenus na’in-ualu no ema atus ba atus maka tenke evakua.
    Udan ne’ebé makas tebes halo estragu barak materiál sira, hanesan edifísiu, veíkulu, estrada no infraestrutura sira seluk, provoka mós rai-halai no obriga tenke taka ahi elétriku no suspende servisu komboiu no metro nian.
    Portavós Governu Konstitusionál VIII, Ministru Fidelis Magalhães, lori Governu tomak nia naran, hato’o katak “ami-nia sentidu kondolénsia ne’ebé kle’an ba família sira ne’ebé lakon sira-nia ema ne’ebé sira hadomi. Iha loron difisil sira-ne’e, Timor-Leste hato’o ninia solidariedade ba Governu no populasaun tomak Repúblika Koreia nian”. REMATA
    hare tan
  • 09 agostu 2022Timor-Leste hato’o felisitasaun ba aniversáriu ASEAN nian ba da-55
    Ministériu Negósius Estranjeirus no Kooperasaun
     
    VIII Governu Konstitusionál
    ...........................................................................................................................
    Komunikadu Imprensa
    Dili, loron 9, fulan-agostu, tinan 2022
    Timor-Leste hato’o felisitasaun ba aniversáriu ASEAN nian ba da-55
    Governu Timor-Leste, ho laran tomak hato’o parabéns ba Estadus membrus no ba povu ASEAN nian, iha okaziaun aniversáriu fundasaun Asosiasaun Nasoins Sudeste Aziátiku nian ba da-55.
    Governu Timor-Leste agradese kompromisu no kontribuisaun husi Estadu Membru sira hotu atu kontinua buka dalan hodi fó tulun ba Timor-Leste iha dezenvolvimentu kapasidade no hodi permite ninia partisipasaun iha atividade naun-polítika sira ASEAN nian.
    Timor-Leste hein katak iha tempu badak bele sai membru da-11 hosi organizasaun rejionál ida-ne’e nian. REMATA
    hare tan
  • 07 agostu 2022Governu hato’o nia solidariedade ba Kuba
    Prezidénsia Konsellu Ministrus
    VIII Governu Konstitusionál
    ...........................................................................................................................
    Komunikadu Imprensa
    Dili, loron 7, fulan-agostu, tinan 2022
    Governu hato’o nia solidariedade ba Kuba
    Governu Timor-Leste hato’o ninia solidariedade ba Governu no povu Kubanu, hafoin ahi han makaas iha depózitu kombustivel nian, besik sidade Matanzas, parte oeste Kuba, kuaze kilómetru 100 husi leste Havana.
    Rai-lakan kona tanke armazén kombustivel nian ida, iha loron sesta, hodi provoka inséndiu ida ne’ebé da’et mós ba tanke daruak iha loron sábadu, rezulta pelumenus ema ida mate, kanek 121 no na’in-17 lakon. Abitante rihun ida resin ne’ebé hela iha área refere evakua ona.
    Tanke rua ne’ebé ahi-han ne’e, nu’udar parte hosi área ida armazén kombustivel nian ho tan tanke neen ne’ebé uza ba produsaun eletrisidade nian.
    Portavós Governu Konstitusionál VIII nian, Ministru Fidelis Magalhães, lori Governu tomak nia naran, hato’o katak “ami-nia hanoin daudaun ne’e, maka ho povu Kubanu, liuliu, ba ema hotu ne’ebé pesoalmente afeta hosi inséndiu terrivel ida-ne’e no ami-nia saudasaun ba sira ne’ebé iha kondisaun ne’ebé susar tebe-tebes kontinua kombate inséndiu ne’e, hodi tulun populasaun sira ne’ebé afeta hosi katástrofe ida-ne’e”. Remata
    hare tan
  • 03 agostu 2022Sorumutuk Konsellu Ministrus nian iha loron 3 fulan-agostu tinan 2022
    Prezidénsia Konsellu Ministrus
    VIII Governu Konstitusionál
    ...........................................................................................................................
    Komunikadu Imprensa
    Sorumutuk Konsellu Ministrus nian iha loron 3 fulan-agostu tinan 2022
    Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu-Lei, ne’ebé aprezenta husi Ministru Defeza, Filomeno da Paixão de Jesus, kona-ba Rejimentu foun Konsellu Superiór Defeza Militár nian.
    Diploma ida-ne’e ninia objetivu mak atu permite katak, Rejimentu Konsellu Superiór Defeza Militár nian bele kompatibiliza ho Lei Defeza Nasionál ne’ebé vigora hela, hodi revoga Dekretu Governu n. 6/2016, loron 11 fulan-maiu.
    Ho alterasaun ida-ne’e, hanesan define tiha ona iha Lei Defeza Nasionál, ba oin, Jenerál sira ne’ebé la iha efetividade servisu, ne’ebé ezerse ona kargu Xefe Estadu-Maiór-Jenerál Forsas Armadas, Vise-Xefe Estadu-Maiór-Jenerál Forsas Armadas ka Xefe Estadu-Maiór Forsas Armadas, sei integra ba-iha Konsellu Superiór Defeza Militár, ho objetivu atu garante tranzisaun no implementasaun objetivu sira dezenvolvimentu nian ne’ebé define ona iha dokumentu estratéjiku sira Defeza nian. Ba oin, obrigatóriu mós atu halo sorumutuk Konsellu ne’e nian kona-ba alterasaun estrutura orgánika F-FDTL nian, no kona-ba proposta sira nomeasaun no ezonerasaun nian ba kargu XEMJFA, Vise-XEMJFA no XEMFA, no mós Dispozitivu F-FDTL nian.
    .
    Aprova ona projetu Proposta Lei ne’ebé aprezenta husi Ministru Administrasaun Estatál, Miguel Pereira de Carvalho, ba alterasaun dalimak ba Lei n. 6/2006, loron 28 fulan-dezembru, ne’ebé aprova Lei Eleitorál ba Parlamentu Nasionál.
    Projetu ne’e hakarak atu integra inovasaun sira ne’ebé aprezenta ona iha tinan 2021 iha Lei Eleitorál ba Prezidente Repúblika, ba-iha Lei Eleitorál ba Parlamentu Nasionál, hodi mantein armonizasaun regra sira nian kona-ba prosesu eleitorál iha órgaun soberania sira-ne’e.
    Nune’e, regra foun sira kona-ba oráriu funsionamentu sentru votasaun nian, autorizasaun ba jornalista, iha servisu kobertura jornalístika eleisaun parlamentár nian atu jornalista sira vota iha sentru votasaun ne’ebé besik liu, muda ba-iha Lei Eleitorál ba Parlamentu Nasionál, iha ne’ebé sira hala’o sira-nia servisu, obrigasaun eleitór hodi identifika sira-nia an tuir dokumentu identifikasaun pesoál ne’ebé válidu, ka kria figura monitór eleitorál ne’ebé ninia funsaun hanesan ho observadór eleitorál sira.
    Hadi’a mós norma balu, hodi klarifika katak, iha asembleia apuramentu nasionál nian, CNE ho definitiva deside kona-ba votu nulu sira, no elementu sira ne’ebé kontein iha boletin votu inklui hatama númeru orden husi kada kandidatura ne’ebé hetan husi sorteiu lista kandidatura sira nian.
    Ikus liu, adota inovasaun prinsipál ida husi eleisaun prezidensiál tinan 2021 nian, mak hanesan, sentru votasaun paralelu sira, maske ho forma foun. Nune’e, prevee atu instala sentru votasaun paralelu sanulu resin tolu, iha Dili,  ida-idak asosia ba Munisípiu ida no ba RAEOA. Kualkér sidadaun eleitór ne’ebé inskreve ona iha unidade jeográfika resenseamentu nian fora husi Dili, no ne’ebé la hakarak atu ba vota iha ninia sentru votasaun orijen nian, bele inskreve iha sentru votasaun paralelu sira ne’e.
    .
    Konsellu Ministrus aprova ona projetu Dekretu-Lei ne’ebé mós aprezenta husi Ministru Administrasaun Estatál, Miguel Pereira de Carvalho, hodi halo alterasaun datoluk ba Orgánika Ministériu Administrasaun Estatál (MAE) nian.
    Inisiativa lejizlativa ida-ne’e iha ligasaun ho nesesidade hodi estabelese liña atuasaun no koordenasaun nian ida entre Ministru Administrasaun Estatál ho Sekretáriu Ezekutivu Sekretariadu Tékniku Programa Nasionál Dezenvolvimentu Suku nian (PNDS), hodi permite akompañamentu ne’ebé boot liu no besik liu ba programa no atividade sira ne’ebé ezekuta ona husi PNDS no iha desizaun sira ne’ebé nia foti. Iha kontestu ida-ne’e, Sekretariadu Tékniku PNDS maka servisu sentrál MAE nian ne’ebé, iha dependénsia ba Ministru, ne’ebé responsavel hodi halo atu materiál sira ne’ebé nesesáriu ba ezersísiu atribuisaun iha área jestaun PNDS nian.
    .
    Konsellu Ministrus aprova projetu Dekretu-Lei ne’ebé aprezenta husi Ministru Petróleu no Minerais, Victor da Conceição Soares, ne’ebé ho objetivu atu hanaruk prazu vijénsia nian to’o loron 31 fulan-outubru tinan 2022 Dekretu-Lei n. 18/2022, loron 19 fulan-abríl, ne’ebé estabelese rejime jurídiku atribuisaun subsídiu finanseiru ida ho forma exesionál no tranzitória hodi hamenus impaktu ekonómiku husi aumentu presu kombustivel nian sira hodi fó ba operadór transporte públiku sira no ba kompradór kombustivel ne’ebé destina ba atividade agríkola no peska nian. Kondisaun sira seluk ba atribuisaun subsídiu kombustivel nian ne’ebé prevee antes ne’e mantein nafatin.
    Haree ba kondisaun exesionál aumentu presu kombustivel nian iha merkadu ne’ebé maka nafatin la estavel tebes, Governu presiza nafatin apoia operadór transporte públiku sira no kompradór kombustivel ne’ebé destina ba atividade agríkola no peska nian, hodi hamenus impaktu husi aumentu sira ne’e nu’udar matéria prima ne’ebé importante tebes ba dezenvolvimentu ekonomia nasionál, hanesan presu kombustivel sira.
    .
    Konsellu Ministrus delibera hodi nomeia Ministru Petróleu no Minerais, Victor da Conceição Soares, nu’udar reprezentante direitus Estadu nian, hanesan asionista iha Kompañia Mineira Timor-Leste, SA (KMTL).
    Projetu deliberasaun aprezenta ona husi Ministru Petróleu no Minerais. Deliberasaun ida-ne’e haree ba saida maka define ona iha Dekretu-Lei n. 43/2022, loron 8 fulan-juñu, ne’ebé kria ona KMTL, ne’ebé determina katak direitu sira Estadu nian nu’udar asionista ezerse liuhusi ema ne’ebé hili husi deliberasaun Konsellu Ministrus, tuir proposta husi membru Governu ne’ebé responsavel ba área rekursus umanus.
    .
    Ministru Petróleu no Minerais aprezenta mós proposta deliberasaun, ne’ebé mós aprova husi Konsellu Ministrus, kona-ba aprovasaun naran Eliud de Jesus Gomes, hanesan Prezidente Konsellu Administrasaun, atu hili iha Asembleia Jerál, tuir proposta membru Governu ne’ebé responsavel ba área rekursus umanus iha Kompañia Mineira Timor-Leste, SA, tuir hatuur ona iha Dekretu-Lei n. 43/2022, loron 8 fulan-juñu, ne’ebé kria ona KMTL.
    .
    Konsellu Ministrus delibera hodi autoriza Ministru Finansas, Rui Augusto Gomes, hodi hahú halo negosiasaun ho Banku Aziátiku Dezenvolvimentu (ADB – sigla iha lian inglés) kona-ba kondisaun espesífika sira empréstimu ida nian ba projetu fornesimentu bee ba zona oeste Dili nian.
    Aleinde projetu sira seluk ne’ebé la’o hela hodi hadi’a fornesimentu bee sidade Dili nian, Governu oras ne’e hakarak atu mobiliza asisténsia finanseira liuhosi empréstimu sira hodi hadi’a fornesimentu bee ba zona oeste iha sidade ida-ne’e. Haree ba karaterístika sira projetu nian, no mós finansiamentu ne’ebé presiza, Banku Aziátiku Dezenvolvimentu aprezenta nia an hanesan kontraparte ne’ebé adekuada hodi prepara finansiamentu.
    .
    Ikusliu, Ministru Administrasaun Estatál, Miguel Pereira de Carvalho, halo aprezentasaun ida kona-ba proposta kalendáriu ba eleisaun parlamentár tinan oinmai. Lejizlatura kompostu husi sesaun lejizlativa lima no kada sesaun lejizlativa iha durasaun tinan ida, hahú iha loron 15 fulan-setembru no remata iha loron 14 fulan-setembru tinan tuirmai. Karik akontese disolusaun (eleisaun parlamentár antesipada), Parlamentu Nasionál ne’ebé eleitu hahú lejizlatura foun, ne’ebé ninia durasaun aumenta ho tempu ne’ebé presiza hodi kompleta períodu ne’ebé korresponde ho sesaun lejizlativa ne’ebé la’o hela iha data eleisaun nian. REMATA
    hare tan
  • 29 jullu 2022Deklarasaun kona-ba situasaun iha Mianmar
    Prezidénsia Konsellu Ministrus
    VIII Governu Konstitusionál
    ...........................................................................................................................
    Komunikadu Imprensa
    Dili, 29 Jullu, 2022
    Deklarasaun kona-ba situasaun iha Mianmar
    Prezidente Repúblika José Ramos-Horta konvoka ohin reuniaun ida iha nia gabinete ho Prezidente Parlamentu Nasional, Membru sira husi Komisaun B, no Primeiru Ministru hodi diskuti kona-ba agravamentu situasaun dramátika iha Mianmar.
    Lider timoroan sira konfere deklarasaun unánima ne’ebé hasai husi Prezidénsia ASEAN no rezolusaun unánima husi Konsellu Seguransa ONU (CS-ONU) kona-ba exekusaun trájika no arbitrária ba sidadaun sivil nain hat, membru husi pró-demokrátiku Mianmar. Lider timoroan ne’ebé partisipa iha reuniaun elojia pozisaun husi dirijente ASEAN no husi CS-ONU nian no apoiu ho forma integral deklarasaun rua ne’e.
    Timor-Leste apela mós ba komunidade internasionak atu kontinua hakbiit esforsu tomak atu kontribui hatur hikas fali ordem demokrátiku liu husi diálogu ho parte hotu-hotu. REMATA
    hare tan
  • 27 jullu 2022Sorumutuk Konsellu Ministrus nian iha loron 27 fulan-jullu tinan 2022
    Prezidénsia Konsellu Ministrus
    VIII Governu Konstitusionál
    ...........................................................................................................................
    Komunikadu Imprensa
    Sorumutuk Konsellu Ministrus nian iha loron 27 fulan-jullu tinan 2022
    Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu-Lei, ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães, kona-ba Suplementu remuneratóriu ba funsionáriu públiku no ajente sira Administrasaun Públiku nian ne’ebé hala’o sira nia funsaun hanesan formadór iha Administrasaun Públika.
    Projetu Dekretu-Lei ida-ne’e ho objetivu atu estabelese rejime ida ne’ebé bele fó retribuisaun finanseira ba responsabilidade no kompleksidade boot funsionáriu no ajente públiku administrativu sira nian, ne’ebé envolve iha realizasaun asaun formasaun jerál ka espesializada nian. Suplementu foun ida-ne’e hakarak atu aproveita di’ak-liu kapasidade formadora ne’ebé, oras ne’e daudaun, iha ona Administrasaun Públika nasionál nia laran, nune’e hodi kontribui ba rasionalizasaun rekursu nasionál sira.
    Valór oras suplementu remuneratóriu formadór nian sei fiksa tuir grau kompleksidade funsionál karreira formandu sira nian. Entidade ne’ebé responsavel ba pagamentu husi suplementu ida-ne’e mak entidade ida ne’ebé responsavel hodi halo formasaun ka entidade sira ne’ebé selu.
    .
    Aprova ona projetu Dekretu-Lei, ne’ebé aprezenta husi Ministru Finansas, Rui Augusto Gomes, ne’ebé ho objetivu atu estabelese Rejime Jurídiku Parseria Públiku Privada (PPP) Servisu Diagnóstiku nian.
    Projetu Dekretu-Lei ida ne’e, hakarak atu estabelese kuadru jurídiku ida ne’ebé bele aplika ho espesífiku ba akordu PPP nian relasiona ho Servisu Diagnóstiku laboratoriál no diagnóstiku liuhusi imajen, no define rejime ida ne’ebé fleksivel no adekuadu liu ba kolaborasaun ho parseiru privadu ida iha prestasaun servisu públiku nian, no prevee mekanizmu sira ne’ebé asegura sustentabilidade, alokasaun risku, operasionalidade no kualidade servisu ne’ebé sei fó ba populasaun. Nune’e, estabelese kuadru jurídiku ida ne’ebé klaru, justu, previzivel no estavel ne’ebé permite atu estimula no dada investimentu privadu no garante prestasaun servisu públiku diagnóstiku laboratoriál no diagnóstiku liuhusi imajen.
    Konsellu Ministrus aprova ona projetu Rezolusaun Governu nian, ne’ebé aprezenta mós husi Ministru Finansas, Rui Augusto Gomes, ne’ebé hatuur valór másimu atu selu ba akizisaun beins imóveis (propriedade sira) no tanba lakon edifikasaun (sasán /soin sira ne’ebé iha rai-leten), lakon benfeitoria (hadi’a propriedade ne’ebé iha tiha ona), lakon área floresta no agríkola nian, no tanba tenke hapara atividade sira hanesan pekuária, peskas no foti masin iha área implementasaun projetu rekualifikasaun Aeroportu Internasionál Prezidente Nicolau Lobato nian.
    .
    Aprova mós projetu Dekretu-Lei, ne’ebé aprezenta husi Ministru Obras Públikas, Abel Pires da Silva, ba alterasaun dahuluk husi Dekretu-Lei n. 11/2006 loron 12 fulan-abríl, kona-ba kriasaun Institutu Jestaun Ekipamentu Timor-Leste (IGE – Sigla iha lian portugés) no aprovasaun ba ninia estatutu.
    Alterasaun ida-ne’e, ho objetivu atu kompatibiliza estatutu IJE nian, ne’ebé define ona iha Dekretu-Lei Organizasaun Administrasaun Direta no Indireta, ho Orgánika Governu Konstitusionál VIII nian, no hodi fó kompeténsia foun ne’ebé sei permite atu aproveita di’ak liután rekursu sira IJE nian, hodi hadi’a servisu públiku ne’ebé Estadu fó ba sidadaun sira.
    Nune’e, ba oin sei atribui kompeténsia no atribuisaun sira ne’ebé IJE halo ona durante tinan barak hodi apoia situasaun barak ne’ebé presiza intervensaun lalais hodi hadi’a filafali tráfegu rodoviáriu ho seguru no evita inundasaun liuhusi limpeza no normalizasaun ba mota sira. Instituisaun ida-ne’e iha ekipamentu ne’ebé presiza hodi hala’o tarefa sira-ne’e, no iha mós koñesimentu tékniku no esperiénsia iha terrenu hodi bele realiza, hanesan parte ida husi sira-nia atribuisaun, la’ós de’it tarefa sira ne’ebé prevee ona, hanesan jestaun ba ekipamentu pezadu sira, maibé mós halo atividade manutensaun ba estrada, hasai rai-henek no hamoos mota, no halo estabilizasaun ba mota-ninin no bareira sira.
    Ho diploma ida-ne’e, estabelese figura Diretór Ezekutivu nian, ho kompeténsia atu dirije no jere servisu IJE tuir diretrizes husi ninia Konsellu Administrasaun. No atribui mós kompeténsia ba Prezidente Konsellu Administrasaun IJE nian podér atu aprova despeza, autoriza no aprova aprovizionamentu no asina kontratu sira tuir lei.
    .
    Konsellu Ministrus aprova ona projetu Dekretu-Lei, ne’ebé aprezenta husi Ministru Administrasaun Estatál, Miguel Pereira de Carvalho, no Ministru Edukasaun, Juventude no Desportu, Armindo Maia, ne’ebé ho objetivu atu aprova Programa Merenda Eskolár nian.
    Programa Merenda Eskolár ne’e, nu’udar subsídiu ida ne’ebé fó iha ámbitu asaun sosiál eskolár, ninia objetivu hodi asegura direitu ba refeisaun loron-loron ho hahán ne’ebé saudavel, ekilibrada no indispensavel ba dezenvolvimentu no insentiva partisipasaun labarik sira nian iha edukasaun pré-eskolár no iha ensinu báziku, públiku no partikulár, ne’ebé integra iha rede públika oferta serbisu públiku iha territóriu nasionál, hodi promove ninia prosesu ensinu no aprendizajen nian. Iha programa ida-ne’e nia okos, sei fornese  refeisaun ba alunu sira husi estabelesimentu edukasaun pré-eskolár no ensinu báziku, públiku no partikulár nian ne’ebé integra iha rede públika oferta servisu públiku nian, ne’ebé lokaliza iha territóriu nasionál.
    Subsídiu sira ne’ebé fó iha ámbitu programa ida-ne’e, ninia natureza maka subvensaun públika sira. Subsídiu alimentár ne’e, atu uza de’it hodi sosa hahán no subsídiu administrativu, ne’ebé ho objetivu atu suporta despeza ho enkargu administrativu sira ne’ebé mosu husi ezekusaun programa ne’e nian.
    Implementadór sira Programa Merenda Eskolár nian mak estabelesimentu edukasaun pré-eskolár no ensinu báziku, públiku no partikulár ne’ebé integra iha rede públika oferta servisu públiku nian, ne’ebé lokaliza iha territóriu nasionál no organizasaun komunitária sira, grupu komunitária ka hanesan, liuliu asosiasaun sein personalidade jurídika.
    Montante subsídiu ne’ebé atribui iha ámbitu Programa Merenda Eskolár nian fiksa ona ho US$ 0,42 ba kada loron eskola no ba kada alunu.
    .
    Ikusliu, Konsellu Ministrus aprova projetu proposta Rezolusaun Parlamentu Nasionál nian ba ratifikasaun akordu kompaktu Millennium Challenge Coorporation, ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães.
    Akordu kooperasaun ida-ne’e asina ona iha loron 19 fulan-jullu liubá, sei implementa durante tinan lima, no iha montante globál dolar amerikanu millaun 484.
    Programa ne’e sei haree ba komponente prinsipál rua, ida atu hadi’a sistema bee, saneamentu no drenajen no ida seluk iha área edukasaun no formasaun nian. Komponente dahuluk ho objetivu atu hamenus kontaminasaun ba bee moos no bee iha rai-okos ne’ebé bele fó moras, impede moris-di’ak no saúde ba labarik no adultu sira. Komponente ida-ne’e inklui, konstrusaun ba fábrika ida hodi prodús dezinfetante kímiku ba abastesimentu bee iha sidade, harii sistema sentrál dahuluk bee reziduál nian iha país, hadi’a rede drenajen ba kapitál Dili no ba munisípiu viziñu haat, reforma polítika no institusionál sira nune’e mós mudansa sosiál no komportamentu, hadi’a sistema saneamentu báziku no jestaun bee nian iha nivel doméstiku. Komponente daruak ho objetivu atu hadi'a kualidade ensinu sekundáriu nian ba alunu sira, liuhusi hadi'a ensinu sekundáriu no lideransa eskolár nian. Projetu ne'e sei estabelese instituisaun formál sertifikasaun formasaun nian dahuluk ba formasaun profesór sira iha nasaun ne’e, sei hanaran “Sentru Exelénsia”, ne'ebé sei fó formasaun no sertifikasaun profisionál ba profesór no lideransa sira ensinu sekundáriu nian iha tempu ohin loron no aban-bainrua nian. Investe iha formasaun ba profesór sira, sei prodús eskola sekundária sira ne'ebé di'ak liu, ho alunu sira ne’ebé bein preparadu ba merkadu serbisu ka ba edukasaun pós-sekundária no nune’e hadia ninia kapasidade hodi kontribui ba kreximentu ekonómiku país nian. REMATA
    hare tan
  • 20 jullu 2022Sorumutuk Konsellu Ministrus nian iha loron 20 fulan-jullu tinan 2022
    Prezidénsia Konsellu Ministrus
    VIII Governu Konstitusionál
    ...........................................................................................................................
    Komunikadu Imprensa
    Sorumutuk Konsellu Ministrus nian iha loron 20 fulan-jullu tinan 2022
    Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu Governu nian, ne’ebé aprezenta husi Ministru Interiór, Taur Matan Ruak no Vise-Ministru Interiór, António Armindo, kona-ba subsídiu diáriu alimentasaun ba ofisiál sira Servisu Migrasaun nian. Projetu Dekretu Governu ida-ne’e ninia objetivu mak atu estabelese valór diáriu no regularizasaun tuirmai ba pagamentu subsídiu ida-ne’e nian, tuir prevee ona iha Estatutu Pesoál Servisu Migrasaun nian, nune’e hodi halo hanesan ho valór subsídiu alimentasaun ne’ebé prevee ona iha rejime remuneratóriu ba Forsas Defeza no Seguransa. Valór diáriu husi subsídiu ne’ebé define ona iha diploma ida-ne’e maka dolar amerikanu sanulu.

    Konsellu Ministrus delibera hodi autoriza Ministru Finansas, Rui Augusto Gomes, atu selebra Akordu Finansiamentu nian ida ho Banku Mundiál (Asosiasaun Internasionál ba Dezenvolvimentu) kona-ba projetu fornesimentu bee iha Dili. Akordu ne’e ho objetivu atu halo kontratasaun ba empréstimu ida ho valór besik dolar amerikanu millaun 121, ba períodu maturidade tinan 40, hodi finansia projetu fornesimentu bee nian ba Dili.  Programa ne’e sei dezenvolve liuhusi finansiamentu ida-ne’e ho durasaun tinan hitu no komponente tolu: komponente dahuluk refere ba dezenvolvimentu infraestruturas abastesimentu bee nian, komponente daruak kona-ba hadi’a kapasidade institusionál ba servisu sira iha setór ida-ne’e no komponente datoluk ho objetivu atu hadi’a jestaun projetu nian.

    Konsellu Ministrus mós aprova projetu Dekretu-Lei, ne’ebé aprezenta mós husi Ministru Finansas, kona-ba alterasaun dahuluk ba Dekretu-Lei n. 30/2011, loron 27 fulan-jullu, kona-ba kondisaun no prosedimentu sira atu observa relasiona ho importasaun veíkulu sira nian. Liu ona tinan sanulu hafoin aprovasaun ba diploma ida-ne’e, iha duni nesesidade atu aprezenta kondisaun sira ne’ebé ezijente liu ba importasaun veíkulu no atu kontrola operasaun ba importasaun nian ho efikás liu, hodi asegura protesaun ba konsumidór no meiu ambiente. Ba efeitu ne’e, projetu Dekretu-Lei ida-ne’e hakarak atu inklui mós bandu importasaun motorizada no veíkulu lijeiru (karreta ki’ik) pasajeiru nian no mistu [karreta ne’ebé tula pasajeiru no sasán merkadoria nian] ne’ebé la kumpre kondisaun téknika sira sirkulasaun nian iha territóriu nasionál no atu kria rejime kontraordenasionál ida hodi fó kastigu ba sira ne’ebé la kumpre regra ne’ebé hatuur iha diploma ne’e. Hakarak mós atu simplifika prosedimentu importasaun veíkulu sira nian, hodi elimina autorizasaun prévia no konsentra verifikasaun ba rekizitu legál sira importasaun nian iha momentu ida de’it, hodi nune’e, fasilita importasaun veíkulu sira nian tuir lei.

    Ministru Prezidénsia Konsellu Ministrus, Fidelis Manuel Leite Magalhães, aprezenta opsaun polítiku-lejizlativa ne’ebé sai hanesan baze hodi kria rejime remuneratóriu ida ba titulár órgaun sira Administrasaun Indireta Estadu nian, no buka hodi estabelese remunerasaun ne’ebé aliña tuir kritériu objetivu sira, atubele asegura interese públiku no tratamentu hanesan ba situasaun ne’ebé hanesan, tuir posibilidade.

    Ikusliu, Vise-Ministru Negósius Estranjeirus no Kooperasaun, Julião da Silva, halo aprezentasaun ida kona-ba prosesu kandidatura Timor-Leste nian nu’udar membru Konsellu Direitus Umanus Organizasaun Nasoins Unidas nian (ONU), ba períodu tinan 2024 to’o 2026.  Karik eleitu, ida-ne’e hanesan ba dala uluk Timor-Leste halo parte hanesan membru konsellu direitus umanus nian, hodi kontribui ba promosaun direitus umanus liuhusi respeitu-malu no diálogu. Promosaun no protesaun ba direitus umanus nu’udar prioridade ida ba Timor-Leste, tantu iha nivel nasionál, nomos iha nivel internasionál.  REMATA
    hare tan
1 2 3 4