Komunikadus
- 30 outubru 2024Sorumutu Konsellu Ministrus nian iha loron 30 fulan-outubru tinan 2024Prezidénsia Konsellu Ministrushare tan
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 30 fulan-outubru tinan 2024
Konsellu Ministrus hala’o sorumutu iha Palásiu Governu, Dili, no aprova projetu Rezolusaun Governu nian ne’ebé estende, to’o loron 10 fulan-abríl tinan 2025, suspensaun ba ensinu, aprendizajen no prátika artes marsiais no enserramentu temporáriu ba fatin no instalasaun hotu-hotu ne’ebé destinadu ba ensinu, aprendizajen no prátika artes marsiais, ne'ebé inisialmente hetan aprovasaun hosi Rezolusaun Governu n. 17/2024, loron 24 fulan-abril.
Rezolusaun Governu nian ida-ne'e ho objetivu atu konsolida no reforsa pás sosiál ne'ebé alkansa ona husikedas fulan-novembru tinan 2023. Ho abordajen ida ne'ebé konsideradu no kontroladu, hakarak atu iha futuru, permite prátika artes marsiais nian iha de’it kontestu desportivu, hodi promove ezersísiu saudavel no kontribui ba edukasaun no formasaun sívika no umanista ba joven sira. Maibé, iha tempu ida-ne’e, nafatin mantein suspensaun ba ensinu, aprendizajen no prátika artes marsiais no enserramentu temporáriu ba ninia fasilidade sira.
Governu felisita populasaun, liu-liu joven sira, ba kolaborasaun ne’ebé sira presta ona hodi kumpre Rezolusaun Governu n. 17/2024, loron 24 fulan-abríl, ne’ebé kontribui tebes ba manutensaun orden no pás sosiál iha país laran tomak.
*****
Aprova mós projetu Dekretu-Lei, ne’ebé aprezenta hosi Ministru Prezidénsia Konsellu Ministrus, Agio Pereira, no hosi Prezidente Komisaun Funsaun Públika, Agostinho Letêncio de Deus, relasiona ho Rejime Promosaun bazeia ba antiguidade pesoál karreiras Administrasaun Públika nian.
Inisiativa lejizlativa ida-ne’e ne’e ho objetivu atu garante progresaun iha karreira ba sira ne’ebé, la konsege alkansa promosaun bazeia ba méritu iha tinan hirak ikus ne’e, tanba razaun oioin. Rejime ida-ne’e bazeia ba kritérius hanesan antiguidade, avaliasaun dezempeñu, idade, formasaun profisionál, prestasaun servisu iha áreas remotas, komportamentu di’ak no asiduidade. Diploma ne’e define katak promosaun ho antiguidade sei akontese tinan-tinan, sei hala'o liuhosi konkursu internu ne'ebé regula hosi Komisaun Funsaun Públika, ne'ebé determina vaga sira ne'ebé disponivel ba kada grau no kategoria profisionál.
Hein katak rejime promosaun ne’e bazeia ba antiguidade no sei hamenus estagnasaun iha funsionáriu públiku sira-nia karreira, hodi valoriza dedikasaun tinan naruk ba servisu públiku, liuliu ba sira ne’ebé hasoru difikuldade hodi partisipa iha kompetisaun konvensionál sira.
*****
Ikusliu, aprova projetu Rezolusaun Governu, ne’ebé aprezenta hosi Ministra Solidariedade Sosiál no Inkluzaun, Verónica das Dores, kona-ba kumprimentu rejime inskrisaun no obrigasaun kontributiva iha ámbitu Rejime Kontributivu Seguransa Sosiál nian.
Diploma ida-ne’e reforsa devér Estadu nian, ne’ebé konsagra ona iha artigu 56.º Konstituisaun Repúblika nian, hodi organiza sistema seguransa sosiál ne’ebé proteje traballadór hotu-hotu nasaun nian, iha setór públiku no privadu, no asegura direitu ba seguransa no asisténsia sosiál. Estabelese hosi Lei n. 12/2016, loron 14 fulan-novembru, sistema seguransa sosiál ne’e vigora dezde tinan 2017 no define responsabilidade husi entidade empregadór sira, inklui inskrisaun traballadór sira nian no entrega fulan-fulan deklarasaun remunerasaun ba Institutu Nasionál Seguransa Sosiál (INSS).
Rezolusaun Governu ida-ne’e determina katak entidade hotu-hotu Administrasaun direta no indireta Estadu tenke regulariza inskrisaun ba sira-nia traballadór sira iha INSS to’o loron 15 fulan-novembru tinan 2024, nune’e mós submete deklarasaun remunerasaun mensál to’o loron 15 kada fulan. INSS sei fornese iha ninia website tabela sira ne'ebé presiza tuir online no, to'o loron 30 fulan-Novembru tinan 2024, sei aprezenta ba Konsellu Ministrus lista entidade sira ne'ebé iha inkumprimentu.
Inkumprimentu ba Rezolusaun ida-ne’e halo sira ne’ebé responsavel ba servisu no entidades Administrasaun Estadu direta no indireta ne’ebé ho kompeténsia halo inskrisaun ba traballadór sira no entrega fulan-fulan Deklarasaun Remunerasaun iha responsabilidade sivíl, finanseira, reintegratória no dixiplinár, tuir kazu. REMATA. REMATA
- 24 outubru 2024Sorumutu Konsellu Ministrus nian iha loron 24 fulan-outubru tinan 2024Prezidénsia Konsellu Ministrushare tan
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 24 fulan-outubru tinan 2024
Konsellu Ministrus hala’o sorumutu iha Palásiu Governu, Dili, no aprova projetu Dekretu-Lei, ne’ebé aprezenta hosi Ministru Prezidénsia Konsellu Ministrus, Agio Pereira, no hosi Sekretáriu Estadu Komunikasaun Sosiál, Expedito Dias Ximenes , kona-ba alterasaun dahuluk ba Dekretu-Lei n. 42/2008, loron 26 fulan-novembru, ne’ebé transforma Rádiu no Televizaun Timor-Leste (RTTL, E.P.) ba empreza públika.
Alterasaun sira ne'ebé propoin ho objetivu atu adapta Rádiu no Televizaun Timor-Leste (RTTL, E.P.) ba ezijénsia teknolójiku no administrativu foun sira, ho introdusaun televizaun terrestre dijitál. Diploma foun ne’e fó dalan ba RTTL, E.P. emisaun no jestaun ba kanál dijitál sira, hodi permite fleksibilidade boot liu iha distribuisaun konteúdu no hetan reseita adisionál. Aleinde permite transmisaun kanál gratuitu sira ho kontestu nasionál no internasionál, sei bele mós introdús servisu pós-pagu no pré-pagu, nune’e reforsa ninia sustentabilidade finanseira.
Projetu ne’e mós prevee eliminasaun Konsellu Opiniaun, ne’ebé nunka implementa dezde kriasaun RTTL, E.P., no kriasaun kargu Diretór Ezekutivu, dependente diretamente ba Prezidente empreza públika, ne’ebé sei fó apoiu ba jestaun administrativa no finanseira empreza nian, hodi garante kontinuidade no governasaun di'ak. Ho alterasaun sira-ne'e, ho intensaun atu hametin kompetitividade no kualidade servisu sira ne'ebé fornese ba públiku, hodi garante emisora ida ne'ebé modernu no efisiente no aliña ho norma sira setór nian.
*******
Konsellu Ministrus deside hodi fó toleránsia pontu iha loron 31 fulan-outubru tinan 2024, ne’ebé konsidera katak iha loron 1 no 2 fulan-novembru selebra Loron Santu sira Hotu nian no Loron Matebian sira hotu nian, data sira ho importánsia boot ba komunidade katólika no prevee ona hanesan feriadu nasionál tuir Lei n. 3/2016, loron 25 fulan-maiu. Desizaun ida-ne’e ho objetivu atu fasilita movimentu populasaun nian ba sira-nia rai moris fatin, hodi permite sira atu partisipa iha selebrasaun relijioza sira ne’e. REMATA - 18 outubru 2024Timor-Leste simu ho laran-haksolok Deklarasaun Prezidente nian kona-ba Simeira ASEAN ba dala 44 no 45 no Simeira sira ne'ebé iha relasaunMinistériu Negósius Estranjeirus no Kooperasaunhare tan
IX Governu Konstitusionál
...........................................................................................................................
Komunikadu Imprensa
Timor-Leste simu ho laran-haksolok Deklarasaun Prezidente nian kona-ba Simeira ASEAN ba dala 44 no 45 no Simeira sira ne'ebé iha relasaun
sei publika - 18 outubru 2024Sorumutuk Konsellu Ministrus nian iha loron 18 fulan-outubru tinan 2024Prezidénsia Konsellu Ministrushare tan
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 18 fulan-outubru tinan 2024
Konsellu Ministrus hala’o sorumutu iha Palásiu Governu, Dili, no aprova projetu Dekretu-Lei, ne’ebé aprezenta husi Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, no husi Diretór Ezekutivu Unidade Misaun hodi Kombate Raes-Badak, Joel Maria Pereira, ba alterasaun dahuluk ba Dekretu-Lei n. 91/ 2022, loron 22 fulan-dezembru, kona-ba Unidade Misaun atu Kombate Stunting (Raes-Badak).
Dekretu-Lei Nú. 91/2022 kria Unidade Misaun atu Kombate Stunting ho misaun atu dezenvolve no ezekuta Planu Nasionál Kombate ba Raes-badak no promove koordenasaun hosi órgaun governu sira iha kombate ba malnutrisaun infantíl. Maibé, maski Planu Nasionál atu Kombate Raes-badak kompleta ona, medida sira ne'ebé prevee ona seidauk implementa ho di’ak.
Atu garante kontinuidade serbisu ida-ne’e, Governu hakarak atu hanaruk tan mandatu Unidade Misaun nian to’o loron 31 fulan-dezembru tinan 2030, hodi permite plena ezekusaun planu nian no kombate taxa raes-badak ne’ebé a’as iha Timor-Leste. Ho alterasaun ida-ne’e, hakarak mós atu ajusta enkuadramentu ministeriál foun ne’ebé rezulta hosi estrutura Governu Konstitusionál IX, ne’ebé Unidade Misaun ba Kombate Raes-dabak iha supervizaun hosi Vise-Primeiru-Ministru no Ministru Koordenadór ba Asuntu Sosiál. Projetu Dekretu-Lei ida-ne’e hakarak mós atu garante koordenasaun ida-ne’ebé efikás no efisiente entre departamentu govermentál oioin no órgaun Administrasaun Públika sira ba ezekusaun responsabilidade ne’ebé relasiona ho seguransa nutrisionál ne’ebé tau ona iha Planu.
Iha sorumutu anteriór Konsellu Ministrus nian, mós aprova ona Planu Anuál Nasionál Multisetoriál hodi kombate ‘Raes-badaK’ ba períodu tinan 2024 to’o 2030, ho objetivu atu redús taxa ‘raes-badak’ no hadi’a saúde nutrisionál iha Timor-Leste
*****
Konsellu Ministrus endosa akordu ho Banku Aziátiku Dezenvolvimentu (ADB, sigla iha lian inglés) kona-ba medidia atu Hadi’a Reziliénsia no Meius Subsisténsia (Vida) iha Setór Rurál, ne’ebé aprezenta husi Vise-Primeiru-Ministru no Ministru Dezenvolvimentu Rurál no Abitasaun Komunitária, Mariano Assanami Sabino. Akordu ne’e ho objetivu atu hasa’e reziliénsia ema besik rihun 46 iha zona rurál sira, Munisípiu Manatutu nian.
Projetu ida-ne’e ho nia objetivu, liuliu atu hadi’a asesu ba bee, promove adosaun prátika agríkola intelijente sira ne'ebé adapta ba mudansa klimátika no hametin kapasidade institusionál no organizasionál hosi komunidade rurál sira.
Inisiativa ne’e, aliña ho prioridade Governu Konstitusionál IX nian, inklui investimentu iha infraestrutura bee (ídrika), formasaun ba grupu agríkola no dezenvolvimentu meiu subsisténsia sira ne'ebé diversifikadu no reziliente liu ba mudansa klimátika. Hein mós katak, modelu dezenvolvimentu rurál ne’ebé atu implementa iha Manatutu sei halo tuir iha munisípiu sira seluk, atu nune’e promove dezenvolvimentu sustentável iha Timor-Leste.
****
Ikusliu, Konsellu Ministru aprova projetu Dekretu-Lei ne’ebé estabelese Programa Revitalizasaun Komunitária, aprezenta mós husi Vise-Primeiru-Ministru no Ministru Dezenvolvimentu Rurál no Abitasaun Komunitária, Mariano Assanami Sabino.
Objetivu hosi programa ne’e maka atu promove dezenvolvimentu ekonómiku-sosiál ba komunidade rurál sira liuhusi fó apoiu ba atividade produtiva iha setór agrikultura, peska, pekuária, floresta no ortikultura, aleinde infraestrutura no ekipamentu ba interese koletivu.
Aliña ho prinsípius sustentabilidade nian, inkluzaun sosiál no partisipasaun komunitária, programa ne’e prevee fó subsídiu ba projetu komunitáriu sira, hodi hametin kapasidade lokál no promove reziliénsia komunidade sira-nian iha teritóriu nasionál tomak. REMATA
- 10 outubru 2024Sorumutu Estraordináriu Konsellu Ministrus nian iha loron 10 fulan-outubru tinan 2024Prezidénsia Konsellu Ministrushare tan
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutu Estraordináriu Konsellu Ministrus nian iha loron 10 fulan-outubru tinan 2024
sei publika - 09 outubru 2024Sorumutuk Konsellu Ministrus nian iha loron 9 fulan-outubru tinan 2024Prezidénsia Konsellu Ministrushare tan
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 9 fulan-outubru tinan 2024
Konsellu Ministru hala’o sorumutu iha Palásiu Governu Dili no delibera hodi fó poder tomak ba Ministru Planeamentu no Investimentu Estratéjiku, Gastão Francisco de Sousa, hodi asina memorandu entendimentu ida ho Governu Repúblika Indonézia, iha ámbitu kooperasaun ba dezenvolvimentu. Akordu ne’e tenke asina iha loron 11 fulan-outubru, durante vizita ofisiál Ministru Gastão Francisco de Sousa ba Jakarta.
Memorandu entendimentu ida ne’e kobre área kooperasaun dezenvolvimentu oioin, inklui harii infraestrutura bázika, promove enerjia renovável ne’ebé asesivel, kria sidade no komunidade sustentável, promove agrikultura no dezenvolvimentu rurál, dezenvolve turizmu, hadi’a setór saúde no edukasaun, enkoraja investimentu setór privadu, promove dezenvolvimentu dijitál, inkluzaun sosiál, no esforsu mitigasaun ba mudansa klimátika. REMATA - 02 outubru 2024Sorumutuk Konsellu Ministrus nian iha loron 2 fulan-outubru tinan 2024Prezidénsia Konsellu Ministrushare tan
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 2 fulan-outubru tinan 2024
Konsellu Ministrus hala’o sorumutu iha Palásiu Governu, Dili no, aprova projetu Rezolusaun Governu, ne’ebé aprezenta husi Primeiru-Ministru, Kay Rala Xanana Gusmão, kona-ba kumprimentu Rejime Eskluzividade ba Funsionáriu sira iha Administrasaun Públika.
Objetivu husi Rezolusaun Governu nian ida-ne’e mak atu garante katak funsionáriu públiku hotu-hotu, iha rai-laran ka iha rai-li’ur, kumpre ho rigorozu rejime eskluzividade, hanesan prevee ona iha Estatutu Funsaun Públika nian, iha ámbitu administrasaun direta no indireta Estadu nian. Rejime ne’e prevene funsionáriu sira atu akumula empregu remuneradu ka partisipa iha atividade sira ne'ebé afeta sira-nia independénsia ka dezempeñu profisionál.
Atu asegura implementasaun ba norma ida-ne’e, Rezolusaun Governu ne’e determina realizasaun auditoria no inspesaun iha departamentu governamentál sira. Relatóriu sira kona-ba kumprimentu rejime nian tenke submete ba ida-idak nia Ministru iha prazu fulan ida hafoin tama iha vigór rezolusaun ne’e.
******
Aprova mós projetu Dekretu-Lei, ne’ebé aprezenta husi Ministru Prezidénsia Konsellu Ministrus ein-ezersísiu, Expedito Dias Ximenes, kona-ba alterasaun dahuluk ba Dekretu-Lei n. 46/2023, loron 28 fulan-jullu, kona-ba Orgánika Governu Konstitusionál da-9 nian.
Ho diploma ida-ne’e, Sekretaria Estadu Komunikasaun Sosiál sai autónomu, hahú iha atribuisaun rasik iha ámbitu Prezidénsia Konsellu Ministrus nian. Objetivu husi alterasaun ida-ne’e mak atu hadi’a efikásia, efisiénsia no kualidade servisu sira ne’ebé presta ba sidadaun sira, liuliu kona-ba direitu atu informa no atu hetan informasaun.
Atribuisaun sira husi Sekretaria Estadu Komunikasaun Sosiál ne’e sei define iha ninia lei orgánika, ne’ebé sei hetan aprovasaun durante loron 60 nia laran, no kompleta ho kompeténsia sira ne’ebé tuir lei, delega ba Sekretáriu Estadu husi Konsellu Ministrus ka husi Ministru Prezidénsia Konsellu Ministrus.
******
Konsellu Ministrus aprova projetu Proposta Lei, ne’ebé aprezenta husi Ministra Finansas, Santina José Rodrigues F. Viegas Cardoso, kona-ba Lei Jestaun Finanseira Públika. Projetu Proposta Lei ida-ne’e, ne’ebé substitui Lei n. 2/2022, loron 10 fulan-fevereiru, ho objetivu atu hametin jestaun finansas públikas, hodi introdús melloramentu iha prosesu orsamentál. Hanesan parte hosi Reforma Jestaun Finansas Públikas, ne’ebé prevee iha Programa Governu Konstitusionál da-9 nian, diploma ne’e promove interligasaun boot tebe-tebes ida entre orsamentu no planeamentu, hodi asegura jestaun ida ne’ebé efisiente no transparente liu iha rekursus Estadu nian.
Objetivu prinsipál sira maka:
Simplifikasaun no Melloria ba Planeamentu Orsamentál: Lei foun ne’e prevee introdusaun husi deklarasaun ida kona-ba estratéjia orsamentál, ne’ebé tenke aprezenta husi Governu ba Parlamentu Nasionál. Dokumentu ida-ne’e orienta planeamentu orsamentál ba médiu prazu, hodi define objetivu no prioridade sira, nune’e mós limite sira ba despeza, jestaun risku no alokasaun rekursus.
Transparénsia no Prestasaun Kontas: Projetu Proposta Lei ne’e buka atu hasa’e transparénsia iha prosesu orsamentál, hodi fó informasaun barak liután ba Parlamentu no ba populasaun, nune’e fasilita atu hala’o avaliasaun ida-ne’ebé efetivu ba proposta orsamentu no halo akompañamentu ne’ebé besik no rigorozu ba gastu no reseita públika sira.
Foku ba Rezultadu no Efisiénsia: Objetivu hosi proposta Lei ida-ne'e, atu asegura katak orsamentu tuir programa ne’e efetivamente foka liu hodi hetan rezultadu. Objetivu atu garante katak despeza públika iha ligasaun direta ba kumprimentu objetivu konkretu, hodi promove poupansa, efisiénsia no efikásia ne’ebé boot-liu iha utilizasaun rekursu públiku sira.
Reforsu Dixiplina Orsamentál: Lei foun ne’e estabelese regra rigorozu liu ba jestaun finanseira públika, inklui limitasaun ba entidade sira ne’ebé bele halo empréstimu no bandu integrasaun saldu orsamentál ba entidade sira ne’ebé laiha autonomia finanseira, tuir desizaun Tribunál Rekursu nian.
Ajustamentu ba Prazu Orsamentál: Objetivu mak atu garante katak prazu sira aprezentasaun orsamentu nian kompativel ho inísiu Governu foun ida-idak nia funsaun sira, hodi permite aliñamentu di'ak-liu entre siklu polítiku no siklu orsamentál.
Aliñamentu ho Prátika Di’ak Internasionál: Lei ne’ebé propoin reflete prátika internasionál sira ne’ebé di’ak-liu kona-ba jestaun finanseira públika, ho objetivu atu moderniza no adapta Timor-Leste nia prosesu orsamentál ba ezijénsia sira iha kontestu administrativu no finanseiru ne’ebé evolui hela.
Ho liafuan badak, proposta Lei ne’e la’ós de’it buka atu hadi’a transparénsia no efikásia jestaun finanseira públika nian, maibé mós atu garante katak rekursu sira Estadu nian utiliza ho forma ne’ebé efisiente liután no haree-liu ba rezultadu sira ne’ebé fó benefísiu ba populasaun.
******
Aprova mós projetu Dekretu-Lei tolu tuirmai, ne’ebé aprezenta husi Ministra Finansas, Santina José Rodrigues F. Viegas Cardoso:
*
Projetu Dekretu-Lei dahuluk nian, ko’alia kona-ba Kódigu Aprovizionamentu no Kontratus Públikus.
Kódigu foun kona-ba Aprovizionamentu no Kontratus Públikus, ne’ebé substitui rejime anteriór ne’ebé aprova hosi Dekretu-Lei n. 22/2022, loron 11 fulan-maiu, hakarak atu hatán ba dezafiu sira dezenvolvimentu Timor-Leste nian, hodi promove fleksibilidade boot no lalais iha prosesu aprovizionamentu no kontratasaun públika.
Entre mudansa prinsipál sira ne’ebé introdús ona, maka kriasaun rejime preferénsia ida ba fornesedór nasionál sira, hodi hametin tesidu emprezariál nasionál. Introdús fali mós konkursu restritu ba servisu sira ne'ebé kompleksu tebes no prevee posibilidade atu selebra akordus-kuadru atu garante kontinuidade fornesimentu nian. Transparénsia no kontrolu iha prosedimentu aprovizionamentu nian hetan reforsu, ho introdusaun regra sira anti-abuzu nian no obrigasaun ida atu denunsia prátika ilísitu sira, no mós protesaun korrespondente ba denunsiante sira. Diploma ne’e prevee mós responsabilizasaun boot liu ba entidade sira setór públiku nian, redusaun prazu nian sira ba ezekusaun lalais liu hosi kontratu sira, no posibilidade ba aprovizionamentu antesipada iha kazu sira ne'ebé justifikadu.
******
Projetu Dekretu-Lei daruak nian husi Ministériu Finansas ko’alia kona-ba Regulamentu hodi Fó Subsídiu, Subvensaun no Doasaun hosi Estadu. Diploma ida-ne’e hakarak estabelese enkuadramentu legál abranjente ida ne’ebé enkuadra subsídiu, subvensaun no doasaun públika sira, hodi garante sira-nia alokasaun ho forma efisiente no transparente, liuhosi promosaun jestaun di’ak ba rekursu públiku sira.
Rekoñese importánsia ne'ebé aumenta ba beibeik hosi instrumentu sira-ne'e hodi alkansa objetivu konstitusionál sira, liuliu iha nasaun ida ne'ebé iha hela dezenvolvimentu ho rekursu limitadu, projetu Dekretu-Lei define forma aprovasaun no fó apoiu ida-ne'e, hodi estabelese rejime ida ne'ebé simples maibé rigorozu ne'ebé promove ekonomia, efikásia no efisiénsia despeza públika nian, sein prejuizu ba regulamentu espesífiku ba apoiu ida-idak, ne’ebé lei ezije, no mós ba podér sira ne’ebé relasiona ho regulamentu ba apoiu balu ne’ebé kabe ba Parlamentu Nasionál, tuir Konstituisaun Repúblika.
Diploma ne’e komplementa regulamentu sira ne'ebé iha ona iha área espesífiku sira, hanesan seguransa sosiál no pensaun sira, no hakarak otimiza efikásia no ekonomia iha utilizasaun despeza públika nian, hodi mantén, bainhira aplikavel, nesesidade ba regulamentu espesífiku ne'ebé ezije hosi lei.
*****
Iha projetu Dekretu-Lei datoluk no ikus ne’ebé Ministra Santina Cardoso aprezenta, kona-ba aprova Regulamentu Auditoria Interna.
Projetu Dekretu-Lei ida-ne’e ho intensaun atu estabelese prinsípiu no regra sira ne’ebé aplikavel ba servisu auditoria interna servisu no entidade sira iha Setór Administrativu Públiku. Diploma ida-ne’e ho objetivu atu garante katak unidade sira ne’e atua ho independente, imparsiál no efetivu, hodi promove kontrolu no melloria kontínua ba operasaun administrativa sira.
Entre aspetu prinsipál sira ne’ebé define ona maka prinsípiu sira ne’ebé regula auditoria interna, hanesan objetividade, konformidade, konfidensialidade no independénsia. Unidade sira auditoria interna nian maka responsavel ba avaliasaun sistema kontrolu internu sira, identifika risku sira no emite rekomendasaun sira ne'ebé hadi'a jestaun públika. Regulamentu espesífiku mós organizasaun unidade sira auditoria interna nian, ne’ebé dirije hosi inspetór-jerál ida, no deskreve knaar hosi auditór sira, ne’ebé tenke kumpre kódigu étika ida ne’ebé rigorozu, atua ho imparsiál no garante konfidensialidade hosi informasaun ne’ebé sira iha asesu. Diploma ne’e inklui mós norma sira kona-ba hala’o auditoria interna no esterna, nune’e mós obrigasaun atu akompaña implementasaun ba rekomendasaun sira ne’ebé fó-sai ona.
*****
Konsellu Ministrus delibera hodi aprova Programa Estratéjiku Kooperasaun Portugál - Timor-Leste hosi tinan 2024 to’o 2028, ne’ebé aprezenta hosi Ministru Negósius Estranjeirus no Kooperasaun ein-ezersísiu, Francisco da Costa Guterres no Vise-Ministra ba Asuntus ASEAN, Milena Maria da Costa Rangel.
Programa Estratéjiku Kooperasaun Portugál-Timor-Leste 2024-2028 reforsa parseria entre nasaun rua ne’e, bazeia ba sira-nia afinidade istórika, kulturál no linguístika, no aliña ho kompromisu globál sira, hanesan Ajenda Nasoins Unidas 2030, Estratéjia Kooperasaun Portugeza 2030 , Planu Estratéjiku Dezenvolvimentu 2011-2030 no Planu estratéjiku nasionál no setoriál sira seluk. Programa ne’e iha objetivu atu kontribui ba dezenvolvimentu sustentável Timor-Leste nian, ne’ebé foka ba área prioridade sira no halo intervensaun iha ‘clusters’ prinsipál lima:
Dezenvolvimentu Umanu: Foku iha edukasaun, saúde, inkluzaun sosiál no kultura, ho énfaze ba formasaun profesór sira, reforsu lian portugés no kapasitasaun ba profisionál saúde no inkluzaun sosiál. Programa ne’e hakarak mós fó apoiu ba kombate pobreza no eskluzaun sosiál, ho alvu ba grupu vulneravel sira, hanesan labarik, feto no katuas-ferik sira.
Estadu Direitu no Boa Governasaun: Foka liu ba justisa, seguransa no defeza, ho asaun formasaun no kapasitasaun hodi hametin sistema legal, hadi’a efisiénsia instituisaun no promove boa governasaun. Intervensaun sira inklui kombate krime no promove direitus umanus.
Administrasaun Públika, Finansas Públikas no Ekonomia: Promove modernizasaun no dijitalizasaun ba administrasaun públika no desentralizasaun, aleinde fó apoiu ba turizmu no finansas públikas. Programa ne’e buka atu hametin jestaun rekursu públiku no haburas kreximentu ekonómiku ne’ebé sustentável, liuliu liuhosi turizmu.
Juventude no Empregu: Apoia formasaun profisionál no empreendedorizmu, hodi insentiva kriasaun empregu no hakbiit juventude timoroan. Foku mak iha fortalesimentu institusionál ba sentru formasaun profisionál sira no promosaun ba ekonomia sosiál no solidáriu.
Oseanu sira, Sustentabilidade no Infraestrutura: Promove sustentabilidade ambientál, protesaun ba biodiversidade no dezenvolvimentu ekonomia azúl nian. Apoia kriasaun parke tasi nian ida, jestaun rekursu bee no infraestrutura estrada no ponte, ho foku ba efisiénsia no sustentabilidade investimentu sira nian.
Programa ne’e inklui mós eixu transversál sira, hanesan igualdade jéneru, reforsu sosiedade sivíl no formasaun iha lian portugés, integradu iha área hotu-hotu intervensaun nian, ho orsamentu indikativu euro millaun 75 ne'ebé sei implementa iha tinan lima nia laran.
*****
Konsellu Ministrus delibera mós hodi fó podér tomak ba Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, atu asina Protokolu Kooperasaun entre Governu Repúblika Portugeza no Governu Repúblika Demokrátika Timor-Leste ba Dezenvolvimentu no Implementasaun Programa REVIVE.
Inisiativa ida-ne’e ho intensaun atu promove no halais prosesu rekuperasaun, prezervasaun no rentabilidade patrimóniu públiku ho valór patrimoniál, kulturál, istóriku no arkitetóniku ne’ebé aas, no nia transformasaun ba patrimóniu ekonómiku ida ba benefísiu nasaun nian, liuliu komunidade sira iha rejiaun sira ne’ebé inklui iha laran. Modelu báziku Programa REVIVE nian envolve rekuperasaun imovel sira ne'e liuhosi inisiativa públika no investimentu privadu sira, nune’e imovel sira ne’e adekuadu ba atividade ekonómika sira ne'ebé iha relasaun ho setór turizmu, iha ninia aspetu hotu-hotu, liuliu turizmu kulturál, ekolójiku, termál, foho ka turizmu azúl, ho objetivu atu valoriza, rekupera no konserva patrimóniu ida-ne'e, nomos sustentabilidade ambientál, sosiál no ekonómika hosi rejiaun sira ne'ebé inklui iha laran.
Tuir Objetivu Dezenvolvimentu Sustentável, programa ne’e sei kobre imovel 14 iha Timor-Leste, ho objetivu atu fó benefísiu ba komunidade lokál sira no promove sustentabilidade sosiál, ekonómika no ambientál. Akordu ne'e sei iha durasaun inisiál tinan rua, automatikamente bele renova.
Iha faze dahuluk sei inklui imovel sira husi Pouzada Tutuala, iha Lautein; Pouzada Maubisi, iha Ainaro; husi Pozada Same nian, iha Manufahi; Pouzada Manatutu, iha Manatutu; Bee-manas Marobo nian, iha Bobonaru; Forte Maubara nian, iha Likisá; Alfándega Beasu, iha Vikeke; Postu Administrativu Fohorem nian, iha Suai, Covalima; no Rezidénsia Administradór nian iha Pante Macassar, iha Oe-Kusi Ambenu. Iha faze daruak, sei inklui imovel sira husi Pouzada Vila Maria no Pouzada Hatubuiliku, rua ne’e hotu iha Ainaro; Armajen Kafé Fatubesi nian, iha Ermera; Ospitál Portugés Antigu, iha Vikeke; no Postu Administrativu Iliomar nian, iha Lautein.
*****
Ministru Obras Públikas, Samuel Marçal, aprezenta ba Konsellu Ministrus Akordu Kooperasaun entre Repúblika Portugál no Repúblika Demokrátika Timor-Leste iha área infraestrutura nian, ne’ebé hakarak promove instrumentu direitu internasionál ida ne’ebé permite hametin liután kooperasaun entre entidade sira ne’ebé responsavel ba área infraestrutura nasaun rua nian.
Parseria ne’e sei kobre área sira hanesan enjeñaria sivíl, ordenamentu territóriu no urbanizmu, abitasaun, infraestrutura ponte no estrada, portu no aeroportu nian nomos instalasaun sira ne'ebé relasionadu, telekomunikasaun, eletrisidade no bee no saneamentu. Akordu ne’e prevee mós fahe koñesimentu, troka tékniku sira no apoiu ba konsolidasaun institusionál no regulatóriu Timor-Leste nian.
*****
Konsellu Ministrus aprova mós projetu Proposta Rezolusaun Parlamentu Nasionál nian, relasiona ho akordu izensaun obrigasaun vistu nian ba titulár Pasaporte Diplomátiku no Pasaporte Ofisiál ka Servisu nian entre Governu Repúblika Demokrátika Timor-Leste no Governu Repúblika Filipina, Repúblika Vietnam no Repúblika Índia.
*****
Aprova mós projetu Proposta Rezolusaun Parlamentu Nasionál nian kona-ba Akordu Servisu Aéreu entre Governu Repúblika Demokrátika Timor-Leste no Repúblika Malázia.
Akordu ne’e ho objetivu atu hametin relasaun bilaterál no promove dezenvolvimentu setór transporte aéreu, ne’ebé nu’udar elementu fundamentál ba inter-konektividade nasaun nian, kreximentu ekonómiku no turizmu.
*****
Konsellu Ministrus aprova projetu Dekretu-Lei, ne’ebé aprezenta husi Ministru Asuntus Kombatentes Libertasaun Nasionál, Gil da Costa Monteiro “Oan Soru”, kona-ba alterasaun daruak ba Dekretu-Lei n. 7/2018, loron 28 fulan-marsu, kona-ba Estatutu Orgániku Konsellu Kombatentes Libertasaun Nasionál (CCLN – Sigla iha Lian Portugés) nian.
Liutiha tinan neen aprovasaun ba Estatutu Orgániku Konsellu Kombatentes Libertasaun Nasionál nian, no ho esperiénsia ne’ebé hetan, liuliu ho kriasaun Fundu Investimentu Veteranu nian, rekoñese nesesidade atu garante ninia jestaun adekuada, hodi atribui ba Administrasaun Konsellu Kombatentes Libertasaun Nasionál kompeténsia ba funsaun ne’e.
Ba ida-ne’e, objetivu mak atu ajusta Konsellu ba realidade atuál, liuhosi kriasaun estrutura orgánika ida ne’ebé efisiente liu, ne’ebé sei kontribui ba hamenus despeza sira ne’ebé la nesesáriu iha ninia órgaun balun. Iha intensaun mós atu reforsa kompeténsia sira CCLN nian kona-ba Fundu Investimentu Veteranu sira nian, hodi insentiva kriasaun atividade sira ne’ebé hamosu rendimentu, nune’e promove dezenvolvimentu ekonómiku nasionál.
*****
Konsellu Ministrus deside hasai Carlos Peloi dos Reis hosi kargu Prezidente Konsellu Administrasaun Empreza Públika Bee Timor-Leste, no liuhusi Rezolusaun Governu aprova nomeasaun ba Gustavo da Cruz nu’udar nia susesór, ba períodu 4 tinan, ho efeitu hahú hosi loron 1 fulan-novembru tinan 2024.
*****
Ikusliu, Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, halo aprezentasaun ba Konsellu Ministrus kona-ba preparasaun ba realizasaun Festivál Rabilau. Eventu ida-ne'e, ne'ebé sei akontese hosi loron 16 to’o 19 fulan-outubru tinan 2024, nu'udar rezultadu hosi kolaborasaun entre Prezidénsia Repúblika ho Governu Konstitusionál IX, ho objetivu atu promove turizmu, kultura no desportu iha Timor-Leste. Festivál ne’e sei destaka patrimóniu kulturál no tradisaun lokál sira, liuhosi kompetisaun múzika, dansa, arte dijitál sira, atividade desportiva sira, no feira gastronomia no produtu lokál sira, ho envolvimentu hosi Prezidénsia Repúblika, instituisaun governamentál oioin no entidade parseiru sira seluk. REMATA
- 30 setembru 2024Sorumutu Estraordináriu Konsellu Ministrus nian iha loron 30 fulan-setembru tinan 2024Prezidénsia Konsellu Ministrushare tan
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutu Estraordináriu Konsellu Ministrus nian iha loron 30 fulan-setembru tinan 2024
Konsellu Ministrus hala’o sorumutu iha Palásiu Governu, Dili no, aprova Projetu Proposta Lei Orsamentu Jerál Estadu (OGE) nian ba tinan 2025, ne’ebé aprezenta husi Ministra Finansas, Santina José Rodrigues F. Viegas Cardoso, ho valór totál dolar amerikanu billaun 2,6, ne’ebé aloka ba Administrasaun Sentrál, ba Rejiaun Administrativa Espesiál Oe-Kusi Ambenu (RAEOA) no ba Seguransa Sosiál, inklui Fundu Rezerva Seguransa Sosiál nian. Montante ida-ne’e inklui alokasaun ida ho dolar amerikanu billaun 2,07 ba Administrasaun Sentrál, dolar amerikanu millaun 482 ba Seguransa Sosial no dolar amerikanu millaun 62 ba RAEOA.
Proposta Lei OJE ba tinan 2025 ne’e tuir estratéjia implementasaun ba prioridade sira ne’ebé prevee iha Programa Governu, ho lema “Investimentu iha infraestrutura estratéjika, hametin ekonomia no hadi’a moris-di’ak sidadaun sira nian”. Proposta ne’e elabora bazeia ba Objetivu Estratéjiku Governu Konstitusionál da-9 nian, ho objetivu atu promove dezenvolvimentu sósiu-ekonómiku ba Nasaun ne’e liuhusi investimentu alvu sira iha infraestrutura estratéjika, reforsu ekonómiku no inisiativa sira ne’ebé ho objetivu atu hadi’a moris-di’ak sidadaun sira-nian. Objetivu husi OJE tinan 2025 ne’e mak atu promove dezenvolvimentu ekonómiku no hadi’a kondisaun moris populasaun timoroan nian, liuhusi estratéjia klaru ida ne’ebé foka ba kreximentu ekonómiku sustentavel, hadi’a servisu públiku no garante katak benefísiu dezenvolvimentu nian to’o ba sidadaun hotu-hotu.
Kona-ba infraestrutura estratéjika, aloka dolar amerikanu millaun 227,3 ba konstrusaun, expansaun, reabilitasaun no manutensaun estrada no ponte sira, no mós ba implementasaun medida protesaun hasoru dezastres naturais, ho objetivu atu hadi’a konektividade no proteje komunidade sira hosi efeitu mudansa klimátika nian.
Prevee mós dotasaun sira ba reabilitasaun Aeroporto Internacional Presidente Nicolau Lobato no ba konkluzaun kabu submarinu fibra ótika ne’ebé sei liga Timor-Leste ba Austrália. Expansaun hosi rede interna fibra ótika nian ne’e sei permite, hahú hosi tinan 2025, fornesimentu hosi internet ho velosidade aas iha Timor-Leste laran tomak. Iha setór eletrisidade nian, orsamentu prevee aumentu signifikativu ida iha subvensaun ba empreza públika EDTL, E.P., ho objetivu atu hadi’a no habelar fornesimentu kontínuu eletrisidade nian, liuliu iha área rurál no remota sira, hodi garante servisu ida ne’ebé estavel no abranjente liu.
Iha setór rekursus naturais nian, proposta dolar amerikanu millaun 40 ba melloria zonas industriais no extrasaun petróleu no minerais iha kosta súl país nian, hodi kontribui ba dezenvolvimentu ekonómiku no ba reforsu seguransa enerjétika.
Iha setór finanseiru, prevee investimentu ida do dolar amerikanu millaun 5 iha kapitalizasaun Banku Sentrál Timor-Leste, ho objetivu atu reforsa estabilidade no reziliénsia sistema finanseiru nasionál.
Proposta lei ne’e aloka parte boot ida husi despeza, ho valór dolar amerikanu millaun 406 hodi apoia sosiedade sivíl, saúde no servisus sosiais.
Iha dezenvolvimentu kapitál umanu, aloka dolar amerikanu millaun 17,2 ba programa formasaun profisionál no téknika, nune’e mós ba konsesaun bolsas estudu. Edukasaun sei simu mós dolar amerikanu millaun 145,8 ba konstrusaun eskola foun, formasaun profesores no fortalesimentu sistema jestaun edukativa nian.
Iha saúde, orsamentu aloka dolar amerikanu millaun 99,2 ba melloria rede ospitalár no sentru saúde sira iha Timor-Leste laran tomak, aleinde dolar amerikanu millaun 14,2 ba akizisaun no distribuisaun ai-moruk no ekipamentu médiku sira ne’ebé esensiál. Kona-ba protesaun sosiál, sei reforsa Programa Bolsa da Mãe ho aumentu boot liu dolar amerikanu millaun 7, aumenta tan dolar amerikanu millaun 2,86 ho objetivu atu hadi’a saúde no nutrisaun ba inan isin-rua no labarik sira. Proposta ne'e inklui mós transferénsia ida ho dolar amerikanu millaun 124,1 ba Orsamentu Seguransa Sosiál, aumentu ida ho dolar amerikanu 37,4 kompara ho 2024, ne'ebé reflete expansaun hosi sistema Seguransa Sosiál no valór hosi pensaun sosiál ferik-katuas no invalidés. REMATA
