Governu Timor-Leste

Komité Revizaun Polítiku (koñesidu liu ho akrónimu KROP, Komité ba Revizaun Orsamentu Polítiku) finaliza ona análize ba alokasaun estratéjika rekursu husi submisaun orsamentál sira, atubele atinji ba kompromisu no objetivu sira ne’ebé konsta husi dokumentu estratéjiku sira, iha loron 29 fulan-setembru tinan 2020, iha Auditóriu Ministériu Finansas nian.

KROP ne’e prezide husi Primeiru-Ministru no kompostu mós husi Vise-Primeiru-Ministru sira, Ministru Koordenadór Asuntus Ekonomikus, Ministru Finansas no Sekretária Estadu Igualdade no Inkluzaun, ne’ebé sai hanesan observadora.

KROP ne’e fahe ba Subkomité setoriál haat, Subkomité Setór Institusionál, prezide husi Primeiru-Ministru, Subkomité Setór Sosiál, prezide husi Vise-Primeira Ministra no Ministra Solidariedade Sosiál no Inkluzaun, Subkomité Setór Infraestrutura, preizide husi Vise-Primeiru-Ministru no Ministru Planu no Ordenamentu, no Subkomité Setór Ekonómiku, prezide husi Ministru Koordenadór Asuntus Ekonómikus.

Hafoin iha loron 21, 22, 26 no 28 fulan-setembru, Subkomité sira analiza ona submisaun orsamentál setoriál nian sira, ohin KROP aprezenta ona konkluzaun sira ba setór hotu-hotu.

Oras ne’e Ministériu Finansas sei halo atualizasaun finál ba proposta orsamentu no hafoin hetan aprovasaun husi Konsellu Ministrus, sei entrega ba Parlamentu Nasionál, iha loron 15 fulan-outubru tinan 2020, tuir Lei Jestaun Orsamentál no Finanseira, ne’ebé maka estabelese kalendáriu submisaun nian.

OJE ba tinan 2021 ne’ebé prepara hela ne’e, ninia objetivu mak atu rekupera no reforsa dezenvolvimentu, asente iha prioridade nasionál sira ne’ebé bazeia ba Programa Governu nian, Planu Estratéjiku Dezenvolvimentu Nasionál, Objetivu sira husi Dezenvolvimentu Sustentavel, Dezempeñu Polítika Fiskál, Impaktu COVID-19 nian no Planu Rekuperasaun Ekonómika, hodi define envelope fiskál ida ba tinan 2021 ne’ebé adekuadu ba nesesidade reál Nasaun nian.