Primeiru-Ministru fó pose ba Komisária Isabel Ferreira
Primeiru-Ministru Kay Rala Xanana Gusmão, iha loron 9 fulan Juñu 2011, Palásiu Governu, Díli Nomeia no fó pose ba Isabel Ferreira nu’udar komisária foun ba Komisaun Funsaun públika nian hodi substitui komisária Maria Olandina Caeiro, ne’ebé Estadu nomeia ba hala’o kna’ar seluk Estadu nian iha estranjeira.
“Konsellu Ministru haree katak komisáriu sira iha KFP menus tiha ida, tanba komisária Olandina Caeiro, Estadu nomeia ba hala’o knaar nu’udar konsulada iha Bali, Indonézia, ho nune’e nomeia fali Isabel Ferreira nu’udar komisária foun ba Komisaun Funsaun públika nian hodi substitui komisária Maria Olandina Caeiro” hateten Primeiru-Ministru, Kay Rala Xanana Gusmão
Iha fatin hanesan Prezidente Komisaun Funsaun Públiku Libório Pereira fó parabens ba komisária foun ne’e no fiar katak ho komisária foun ne’e bele garante liután servisu KFP nian hodi haree funsionáriu Estadu nian tomak iha Timor-Leste.
Libório Pereira hatutan tan katak, komisáriu sira iha KFP hetan nomeasaun iha rejime dedikasaun eskluziva nian ka parsiál ho mandatu to’o tinan 5. Rekezitu sira ne’ebé presiza atu sai Komisáriu, ida mak, tenke timor oan, karáter íntegru ho koñesimentu no esperiénsia iha área sira hanesan Polítika Jestaun ba Administrasaun Públika, Direitu,Ekonomia no Dezenvolvimentu sosiál.
Isabel Ferreira koñesida hanesan defensora ba Direitu Umanu, no mós nu’udar eis vise-ministra justisa iha Guvernu Konstitusionál daruak nian, oras ne’e hala’o kna’ar relevante iha reforma ba setór defeza no seguransa, liu-liu iha komisaun ba akompañamentu promosaun ba polisia Nasionál Timor-Leste (PNTL), ohin simu tan kna’ar foun nu’udar komisária ba KFP.
Partisipa iha serimónia simu pose ne’e, Primeiru-Ministru, Kay Rala Xanana Gusmão, membru Governu sira, Prezidente Komisaun Funsaun Públika, Libório Pereira ho ninia komisáriu sira, Prezidente Komisaun Antí-Korrupsaun, Aderito de Jesus, Adjuntu Provedoria Diretu Umanu no Justisa, Silveiro Pinto, Embaxador Nova Zelandia ba Timor-Leste, Tim McIvor no Diretór Jerál hosi Ministériu no Sekretaria Estadu sira.
