Governu Timor-Leste

Vizita Servisu nian ba Repúblika Guiné-Bissau, husi loron 4 to’o loron 8 fulan Outubru
Primeiru-Ministru, Kay-Rala Xanan Gusmão, dezloka ba Giné-Bisau tuir konvite husi nia omólogu husi Giné, Rui Duarte de Barros.
Akompaña Primeiru-Ministru iha vizita ba Guine Bissau ne’e maka, Sekretáriu Estadu Desentralizasaun Administrativa, Tomás Cabral, Sekretáriu-Jerál FRETILIN no Eis-Primeiru-Ministru, Marí Alkatiri,no Prezidente Nasionál Petróleu, Gualdino da Silva.

Vizita servisu ba EUA, loron 9 to’o loron 16 fulan Outubru
Primeiru-Ministru, Kay Rala Xanana Gusmão, hahú vizita ba Estadus Unidus Amérika ne’e, husi Novaiorke, iha ne’ebé nia sei partisipa iha Workshop on Peacekeeping Transitions: Lessons learnt from the UNMIT Transition Process, iha ne’ebé nia sei halo diskursu abertura nian. Eventu ne’ebé sei hala’o iha loron 10 fulan Outubru ne’e organiza husi Misaun Permanente Nova-Zelándia no husi Misaun Nasoins Unidas nian iha Timor-Leste.
Hotu tiha Primeiru-Ministru no ninia delegasaun liu ba Washington DC atu partisipa iha Sorumutu Anuál Banku Mundiál no Fundu Monetáriu Internasionál nian. Primeiru-Ministru sei halo ninia aprezentasaun durante Semináriu ne’e “Blessing of Curse: Making Earth’s Riches Work for Poor and Fragile Countries”, ne’ebé sei hala’o iha loron 11 fulan Outubru tinan 2013.
Sei iha Wahsington DC, Primeiru-Ministru, hamutuk ho Ministru Finansa sira husi Grupu g7+, ajenda ona sorumutu ida ho Prezidente Banku Mundiál nian, Dr. Jim Yog Kim, no ho Diretór Fundu Monetáriu Internasionál nian, Christine Lagrade.
Delegasaun Timor nian fila ba Nova-Iorke iha loron 14 fulan Outubru, ba sorumutu sira ho karakter finanseiru, ne’ebé sei hala’o iha loron 15. Delegasaun ne’e bele ona sai husi EUA iha loron 16 fulan Outubru.
Akompaña Primeiru-Ministru iha vizita bá Estadus Unidus ne’e maka: Ministra Finansas, Emília Pires, Governadór Banku Sentrál Timor-Leste, Abrão de Vasconcelos no Sekretáriu-Jerál FRETILIN no Eis-Primeiru-Ministru, Marí Alkatiri.