Timor-Leste no Trinidade no Tobago estabelese ona relasaun diplomátika
Repúblika Demokrátika Timor-Leste estabelese ona relasaun diplomátika ho Repúblika Trinidade no Tobago iha serimónia ida ne’ebé hala’o iha Misaun Permanente Trinidade no Tobago nian iha Nasoens Unidas, Nova Iorke, iha loron 24 fulan Setembru.
Ministru Estadu no Negósiu Estranjeiru no Kooperasaun Timor-Leste, José Luís Guterres no Ministru Negósiu Estranjeiru Trindade no Tobago, Winston Dookeran, sira assina ona Akordu ida kona-ba estabelesimentu relasaun diplomátika hodi dezenvolve lasu amizade no kooperasaun iha área polítika, kulturál, ekonómika, umanitária, no seluktán.
Timor-Leste no Trinidade no Tobago reafirma sira nia kompromisu Akordu tuir prinsípiu no relasaun sira Nasoens Unidas no Direitu Internasionál nian, inklui igualdade soberanu Estadu nian, integridade territoriál no labele intervein iha assuntu internu Estadu ida seluk nian.
Estabelesimentu relasaun diplomátika entre Estadu rua ne’e formalizadu tuir Kovensaun Viena kona-ba Relasaun Diplomátika sira iha loron 18 fulan Abríl tinan 1961.
Molok serimónia taka, José Luís Guterres e Winston Dookeran, fo sai katak sira sei asegura estabelesimentu relasaun diplomáka hodi bele koresponde ba interese Estadu rua ne’e nian no reforsa liután paz no seguransa internasionál.
Foto: Kortezia Misaun Permanente Trinidade nian no Tobago iha sede Nasoens Unidas nian, iha Nova Iorke.
