Governu observa produsaun bee moos
Sekretáriu Estadu Indústria no Kooperativa, Filipus “Nino” Pereira, iha loron 24 fulan Janeiru, tinan 2012, hala’o vizita ba kompañia Agua Ti Water, iha Fomentu, Díli. Objetivu hosi vizita ne’e atu observa diretamente prosesu produsaun bee moos.
Filipus “Nino” Pereira, hateten “Governu liuhosi Sekretária Estadu Indústria no Kooperativa iha papél importante tebes atu fó apoiu no hakbiit grupu indústria no kooperativa ne’ebé durante ne’e la’o ona no presiza mós apoiu hodi hadi’a di’ak liután kualidade produsaun, atu nune’e bele atrai konsumidór sira. Agora daudaun Timor-Leste hahú redús ona importasaun bee moos hosi rai li’ur, tanba ne’e, produsaun Agua Ti Water ita bele dehan katak tama ona ba kategoria internasionál ho ekipamentu sira ne’ebé iha estandar internasionál no hetan ona lisensa produsaun nian hosi Ministériu Obras Públikas, Ministériu Saúde no Ministériu Komérsiu Indústria no Ambiente rasik.
Nia mós husu ba kompañia ne’e, atu haree no tau matan didi’ak ba meiu ambiente hanesan kuda ai-horis ruma, nune’e bele fó protesaun di’ak ba ambiente no bele proteje bee mós ho kualidade ne’ebé di’ak liu ba konsumidór sira.
