Governu Timor-Leste

Segunda-feira, loron 20 fulan Agustu tinan 2012, F-FDTL komemora loron Forsa Armada ba Libertasaun Nasionál Timor-Leste (FALINTIL) ba datolunuluk resin hitu, iha Palásiu Governu, Díli.

Serimónia komemorasaun ne’e prezide hosi Prezidente Parlamentu Nasionál, Vicente Guterres, no marka prezensa hosi, Primeiru-Ministru, Kay Rala Xanana Gusmão, Prezidente Tribunal Rekursu, Claudio Ximenes, Xefe Estadu Maiór Jenerál F-FDTL, Majór Jenerál, Lere Anan Timu, Xefe Estadu Maiór Jenerál CPLP nian, Reprezentante Sekretáriu Jerál Nasoins Unidas iha Timor-Leste, Finn Rieske Nielsen, Komando Jerál PNTL, Komisáriu Longinhos Monteiru, Eis Titular sira, Membru Governu, Deputadu Parlamentu Nasionál, Korpu Diplomátiku, Veteranu no Populasaun sira.

Xefe Estadu-Maiór F-FDTL, Majór Jenerál, Lere Anan Timur, iha nia diskursu hateten katak ohin ita komemora dala ida tan tinan ba moris FALINTIL nian, ida ne’e hanesan momentu komemorativu no omenajen ida ba asuwain sira ne’ebé maka funu hodi  defende ita nia rain, la’ós de’it ba sira nia di’ak, maibé fó sira nia an tomak  iha tempu susar nia laran  ne’e ho kbiit no beran ne’ebé iha, ita  lahanoin atu hakiduk no hasees an, tanba ne’e FALINTIL oan sira manán povu nia fuan, manán mós fatin ida ne’ebé nunka hotu iha istoria Timor-Leste nian.

Funu na’in FALINTIL sira hatene dixiplina no organizadu, hatene halo planu, hatene hatudu dalan, hatene fi’ar malu, maske moris iha susar nia laran buat hotu-hotu mukit ba sira, sei iha meiu ne’ebé oituan liu, maibé lafalta ba sira atu buka tuir buat ne’ebé ema hotu hakarak hetan, ida ne’e hanesan riku soin ida ne’ebé sira husik hela ba jerasaun foun ne’ebé sei tuir mai. Tan ne’e mak Falintil- Forsa Defeza Timor-Leste maka bele kaer metin estabilidade no seguransa iha ita-nia Nasaun”, hatutan Xefe Estadu Maiór Jenerál F-FDTL, Majór Jenerál, Lere Anan Timur.