MSS avalia servisu iha Sentru Rejionál Manufahi

Ter. 11 outubru 2011, 14:44h
Manufahi_PORTAL

Ministra Solidariedade Sosiál, Maria Domingas Fernandes Alves, halo avaliasaun servisu ba funsionáriu sira ne’ebé servisu iha Sentru Rejionál Manufahi ne’ebé kobre mós Distritu Ainaru, iha loron 7 fulan Outubru 2011.

Objetivu hosi avaliasaun ida ne’e atu haree ba atendimentu sosiál báziku iha Distritu rua ne’e durante tinan haat, nomós hanesan avaliasaun ba servisu ne’ebé hala’o ona hodi hadi’a sistema atendimentu ne’ebé iha no tenke hadi’a atu nune’e ba oin servisu atendimentu sosiál báziku bele la’o di’ak liután.

Xefe Departamentu Sentru Rejionál Manufahi, Jaime Agostinho Hanjam, hato’o katak vizita ministra nian ne’e hanesan vizita traballu hodi haree no halo avaliasaun ba servisu atendimentu sosiál baziku ne’ebé durante ne’e Funsionáriu MSS distritál no Xefe departamentu sira hala’o iha distritu Manufahi no distritu Ainaro, servisu ne’e atu la’o di’ak liután presiza apoiu másimu hosi nasionál no hetan liña koordenasaun ne’ebé di’ak tanba kobre sub-distritu ualu hosi distritu Manufahi ho Ainaro.

Administradór Distritu Manufahi, Filomeno Tilman iha nia lian menon hato’o katak, ho estabelesimentu Sentru Rejionál iha Distritu Manufahi, servisu ne’ebé durante ne’e ami enfrenta pelumenus redús ona kompara ho tempu uluk ne’ebé seidauk iha Sentru Rejionál, Administradór ne’e mós apresia tebes ho programa ida ne’e hodi fó apoiu ba atendimentu sosiál báziku hanesan problema ferik katuas no inválidu sira, apoiu família dezastre naturál bele di’ak liután.

Eduardo da silva hanesan defisiente ida hela iha Distritu Manufahi, nomós  nu’udar xefe departamentu treinamentu komputadór sente kontente ho programa Ministériu solidariedade Sosiál nian ne’ebé iha, tanba bele fó atensaun mai ami kbi’it laek sira hanesan idozu, inválidu no ami defisiente sira.

   Ba leten