Sorumutu Konsellu Ministru loron 28 fulan Setembru tinan 2011
IV GOVERNU KONSTITUSIONÁL
SEKRETARIA ESTADU KONSELLU MINISTRU
...............................................................................................................................................
KOMUNIKADU BA IMPRENSA
Sorumutu Konsellu Ministru iha loron 28 fulan Setembru 2011
Konsellu Ministru hala’o Sorumutu iha kuarta-feira ne’e, loron 28 fulan Setembru 2011, iha Sala Sorumutu Konsellu Ministru nian, iha Palásiu Governu, iha Díli, no aprova ona:
1. Dekretu-Lei ne’ebé mak aprova Prinsípiu no Norma sira ne’ebé mak regula Ospitál no Servisu Nasionál Saúde nian
Ministériu Saúde hatene katak Estatutu Ospitalar, ne’ebé mak aprovadu ona husi Dekretu-Lei n° 1/2005, 31 fulan Maiu, presiza atu formula hikas fali atu nune’e bele hatán ba evolusaun setór nian no exijénsia foun hirak ne’ebé mak mosu. Nune’e mak, Konsellu Ministru aprova tiha Dekretu-Lei ne’ebé estabelese sistema servisu públiku ospitalár ida ne’ebé la’o no funsiona di’ak, ho autonomia iha jestaun, efisiente no efikáz,atu bele asegura nível prestasaun ida ne’ebé di’ak kona-ba kuidadu ospitalar sira, ho prespetiva atu dezenvolve setór ne’e iha médiu no longu prazu.
2. Rezolusaun Governu ne’ebé hasai membru nain rua Konsellu Diretivu Autoridade Nasionál Petróleu nian
Konsellu Ministru hatán ba pedidu ezonerasaun ba kargu Vogál Konsellu Direktivu Autoridade Nasionál Petróleu nian Vicente da Costa Pinto no Francisco da Costa Monteiro. Tanba rekoñese ba sira nia dedikasaun, dilijénsia no profisionálizmu ne’ebé sira ezerse iha sira nia funsaun, Konsellu Ministru aseita sira nia pedidu ne’ebé mak sira rasik hato’o.
3. Rezolusaun Governu ne’ebé nomeia Prezidente Konsellu ba Administrasaun no Direksaun Ezekutiva TIMOR GAP Timor Gás no Petróleu E.P.
Tanba rekoñese aptidaun no perkursu profisionál Francisco da Costa Monteiro nian, ne’ebé halo nian hetan koñesimentu, formasaun téknika no esperiénsia kualifikada ne’ebé mak potente tebes iha kapasidade atu diriji, mak Konsellu Ministru aprova nomeasaun ba nia atu sai Prezidente Konsellu ba Administrasaun no Direksaun Ezekutiva TIMOR-GAP-Timor Gás no Petróleu E.P.nian.
Konsellu Ministru analiza mós:
1. Aprezentasaun kona-ba fornesimentu medikamentu no regulasaun medikamentu iha merkadu
Ministériu Saúde, ho SAMES, halo aprezentasaun ida kona-ba sistema aprovizionamentu nian ba medikamentu sira, iha nível nasionál, hodi konsidera mós Planu Estratéjiku Ministériu nian.
2. Dekretu-Lei kona-ba Lisensiamentu ba Atividade sira iha Setór Downstream nian
Sekretaria Estadu Rekursu Naturál, no Autoridade Nasionál Petróleu, hato’o ona proposta Dekretu-Lei ida ne’ebé atu hodi regula atividade hirak ne’ebé relasiona ho fornesimentu, prosesamentu, transporte, armazenamentu, komersializasaun no marketing petróleu nian, produtu petrolíferu no produtu sira ne’ebé hanesan, ne’ebé baibain identifika tiha ona hanesan atividade downstream. Konsellu Ministru sei fila hikas atu analiza Dekretu-Lei ne’e.
