MTCI aprezenta nota konseitu no dezeñu fatin rekreasaun tasi-ibun Kaitehu

Kua. 04 maiu 2022, 09:50h
4 (1)

Ministériu Turizmu, Komérsiu no Indústria (MTCI)-sigla portugés, liuhosi Diresaun Nasionál Dezenvolvimentu Turístiku (DNDT), aprezenta nota konseitu no dezeñu ba dezenvolvimentu fatin rekreasaun tasi-ibun Kaitehu iha Liquiçá, ne’ebé partisipa direta husi Ministru Turizmu Komérsiu no Indústria, José Lucas do Carmo da Silva akompaña husi Vise-Ministra Turizmu Komunitáriu no Kulturál, Inácia da Conceição Teixeira, iha salaun postu-administrativu munisipál Liquiçá, iha loron sesta-feira, 29 fulan-abríl 2022.

Iha abertura Administradór Munisípiu Liquiçá, Pedro Paulo Gomes, agradese ba Governu “liuhosi MTCI ne’ebé iha interese atu dezenvolve fatin rekreasaun tasi-ibun Kaitehu tanba fatin ne’e hanesan área potensiál ba turizmu”. 10 (1)

Ministru MCTCI, José Lucas, hato’o nia intervensaun katak turizmu nu’udar setór produtivu, nune’e “oitavu Governu hakarak dezenvolve sítiu turístiku sira hodi bele diversifika ekonomia iha rai-laran”.

Governante ne’e hatutan katak fatin rekereasaun Kaitehu hanesan sítiu poténsial ida hodi fó oportunidade di’ak ba dezenvolvimentu sítiu turístiku iha área Liquiçá nian. Kaitehu tenke sai fatin destinasaun di’ak ida hodi bele atrai vizitantes sira aleinde husi kapitál, Díli ne’ebé ho distánsia besik liu nomós ho turistas sira husi rai liur.

7Iha aprezentasaun nota konseitu ne’e, Diresaun DNDT sita mós kona-ba atividade lubuk ne’ebé mak sei iha sítiu rekreasaun refere no asinatura akordu ba liña setorál husi Ministru MTCI, Administradór Liquiçá no Diretór Terras no Propriedades.

   Ba leten