Ministériu Solidariedade Sosiál Hari’i Sentru Komunitário ba Komunidade
Ministériu Solidariedade Sosiál, liu husi Ministra Maria Domingas Fernandes Alves inagura Sentru Komunitário ida iha Aldeia Mauk Manleuna-Suku Comoro, Sub-distrito Dom Aleixo, Distrito Dili, iha Terça-feira loron 20 fulan Abril tinan 2010.
Objetivu Sentru ida ne’e atu sai nu’udar fatin ida halibur komunidade atu bele rezolve problemas nbé mosu iha sira nia le’et.
Ministra nia intervensaun iha seremoni inagurasaun ida ne’e hateten katak “Projetu hari’i Sentru ida ne’e hanesan meiu ida atu hamutuk hari’i estabilidade, konfiansa no fo protesaun ba komunidade”. Aleinde ne’e Sekretáriu Estadu Assistência Sosiál no Dezastres Naturais, Jacinto Rigoberto Gomes de Deus, hateten mos “Sentru ida ne’e iha multi-funsan nebé bele utiliza ba atividade juventude, labarik, defisientes no atividade seluk tan”
Sentru Komunitário Manleuana ne’e hanesan pilar importante ida atu hadia diak liutan relasaun entre komunidade iha bairo laran atu nuné bele garante amizade, unidade, paz no estabilidade iha komunidade nia let.
Elvino Maria dos Santos, husi komunidade Suku Manleuana hateten katak “Ho Sentru ida ne’e, bele halibur fali ami nebé fahe malu iha krize 2006, tantu ferik-katuas, labarik, joven, bele tuur hamutuk hodi bele dada lia no bele haluha tiha buat hirak nebé akontese iha pasadu.”
Konstrusaun Sentru Komunitário ida ne’e, hetan apoio hosi United Nations Denvelopment Program (UNDP) no hosi Australian Government (AUSAID), ho orsamentu hamutuk dólares amerikanus USD$ 42.360,00.
Partisipa mos iha seremónia inagurasaun ida ne’e, Ministro Administrasaun Estatal no Ordenamento Territorial, Arcângelo Leite, reprezentantes hosi UNDP, AUSAID, Administradór Sub-Distritu Dom Aleixo no líder komunitário husi suku Komoro nian mos halo parte.
