Enkontru Virtuál “Project Steering Committee” daruak Kona-ba implementasaun Projetu “Nationál Single Window” (NSW)
Díli, Tersa-feira, loron 15 fulan-Fevereiru 2021 – Ministériu Finánsas liuhusi Vise-Ministra Finánsas Dra. Sara Lobo Brites prezidi enkontru virtuál “Project Steering Committee”/(PSC) hamutuk ho Koordenadora Programa ASYCUDA/UNCTAD ba Rejiaun Azia no Diretór Jerais nomós Diretór Nasionais sira, hodi diskuti kona-ba progresu implementasaun Sistema Nasionál Single Window (NSW) ka Janela Únika.
NSW ou Sistema Janela Únika hetan aprovasaun liuhosi Rezolusaun Konsellu Ministru iha fulan-Maiu tinan 2017, no hosi desizaun ne’e maka programa NSW hahu ninia implementasaun iha fulan-Dezembru 2019 ho objektivu atu utiliza Sistema Asycuda World nu’udar plataforma hodi fasilita atividade komérsiu ho forma automatizadu katak prosesu hotu via sistema hodi halo redusaun ba utilizasaun surat tahan, promove efisiénsia, promove trasparánsia nomós prosesu hotu sei realiza iha tempu real ou ho lais. Nasaun barak maka utiliza ona Single Window tamba bele fasilita tebes sistema komérsiu (Importasaun no Exportasaun) sasán iha rai laran nomós iha nível rejionál ho parseiru komérsiu sira.
Janela Úniku hanesan progresu importante ida ba Autoridade Aduaneiru, Ministériu Finánsas iha âmbitu programa reforma fiskál no jestaun finánsas públika ne’ebé mak inisia husi VI Governu no VIII Governu komprometidu atu kontinua promove ajenda reforma ne’e.
NSW (janela únika) ne’e sei liga Autoridade Aduaneiru ho liña ministeriál, ajénsia no institutu públiku Governu ne’ebé mak trata movimentu ema ka sásan-sira, inklui Autoridade Tributária, Imigrasaun, Kuarantena, Ministériu Saúde, Ministériu Transporte no Komunikasaun, MTCI, TradeInvest no Autoridade Portu. Sistema koneksaun ne’ebé mak aplika iha servisu administrasaun públiku sei reduz atrazu, kustu tranzasaun, inklui tempu libertasaun sásan iha fronteira terrestres, portu no aeroportu, nune’e fasilita liu-tán empreza-sira. NSW (janela únika) ne’e mós sei ajuda Governu liuhusi Ministériu Finánsas atu koleta reseita ho maneira ida ne’ebé justu no transparente.
Progressun hosi implementasaun NSW bele evidénsia hosi integrasaun TradeInvest ba iha Asycuda world ne’ebe lansa tiha ona iha loron 1 fulan-fevereiru tinan 2021 husi Ministru Finansas, Rui Augusto Gomes no Ministru Koordenadór Asuntus Ekonómikus, Joaquim Amaral.
Iha reuniaun ne’e ko’alia kona-ba planu ne’ebé sei implementa durante fulan 48 nia laran ne’ebé mak tuir planu sei halo iha faze rua:
Faze dahuluk mak: Interkonesaun hosi Ajénsia Governu nain 8 nomós Bollore futuru operadór Portu Tibar no
Faze daruak mak sei halo interligasaun ho nasaun sira parseiru komérsiu hanesan Indonezia, Brazil neebé hola parte iha CPLP, nomós hanesan kritériu ida wainhira atu sai membru ASEAN.
Nasionál Single Window hanesan portál ba Autoridade Aduaneira (A.A) iha ne’ebá kliente sira bele submete dokumentu relevante ho importasaun nomós exportasaun nian iha portál Single Window (Janela Únika). Portál refere sei konekta direta ba instituisaun sira ne’ebé involve iha atividade komérsiu, movimentu taxa, ema, sasan, imigrasaun, karantina, transporte, peskas, pekuária no liga mós ho tranjaksaun liuhusi Banku Komersiál sira.
Kada trimestre Ministériu Finánsas liuhusi Autoridade Aduaneira (AA) no ekipa UNCTAD diskuti kona-ba dezenvolvimentu Asycuda World nu’udar plataforma ba projetu Single Window hodi aktualiza no fó seguimentu ba kestoens sira relevante ba implementasaun programa refere.
Iha tempo badak nia laran mós Autoridade Aduaneira sei halo koneksaun direta ho DNTT, Kuarentena, Imigrasaun no Saúde atu bele integra mós iha AsycudaA world.
Ikusliu, enkontru ida ne’e kompostu husi Vise-Ministra Finánsas, Sara Lobo Brites nu’udar chair ba Steering Committee, Diretór Jose A.F Abilio, nu’udar membru Steering Committee no Marianne Dumont, nu’udar Koordenadora programa ASYCUDA/UNCTAD iha nível Azia, no Saeid Yarandi, nu’udar espesialista rezidente ba ASYCUDA.
