Parlamentu Nasionál aprova iha Jeneralidade Proposta Lei atu autoriza Governu hodi define baze ba organizasaun administrasaun públika nian
Membru Parlamentu Nasionál sira, ohin, loron 8 fulan-fevereiru tinan 2021, aprova ona, iha jeneralidade, Proposta Lei Autorizasaun Lejizlativa kona-ba baze jerál sira ba Organizasaun Administrasaun Públika ho votu afavór 37, kontra 11 no abstensaun 12.
Ministru Prezidénsia Konsellu Ministrus nian, Fidelis Manuel Leite Magalhães, hafoin leitura ba konkluzaun husi Komisaun Asuntu Konstitusionál no Justisa (Komisaun A), halo enkuadramentu jerál ida kona-ba Proposta Lei ne’e no esplika katak “autorizasaun ne’e ninia objetivu prinsipál mak atu armoniza, define no organiza órgaun administrasaun públika nian ida-idak no ninia kompeténsia sira”.
Governante ne’e klarifika mós katak Proposta Lei ne’e laiha relasaun ho estatutu Komisaun Funsaun Públika nian ka ho Lei ne’ebé kria Komisaun Funsaun Públika.
Intervensaun lejizlativa ne’e mai kumpre obrigasaun konstitusionál ida ne’ebé prevista iha alínea e) n.1 artigu da-96, ho kriasaun rejime jurídiku ida ne’ebé sei fornese ba administrasaun públika tomak baze jerál sira husi ninia atuasaun.
Hanesan parte husi programa reforma administrativa, Proposta Lei ne’e, hamutuk ho inisiativa lejizlativa sira seluk, hetan aprovasaun iha Konsellu Ministrus iha loron 19 fulan-fevereiru tinan 2020, bazeia ba proposta husi Ministru Reforma Lejizlativa no Assuntus Parlamentares iha tempu ne’ebá, ho objetivu atu promove efikásia administrasaun públika nian, atu nune’e ninia organizasaun bele koerente no omojénea no bele fasilita kontinuasaun husi ninia atividade sira liuhusi interoperasionalidade no interkomunikabilidade rekursus umanus no materiais. Organizasaun administrativa mak instrumentu Estadu nian atu kontinua ho ninia atribuisaun sira ne’ebé sai hanesan interese públiku nian atu hatán ba nesesidade koletiva populasaun nian.
Aban dadeer, loron 9 fulan-fevereiru sei halo diskusaun no votasaun iha espesialidade ba Proposta Lei ne’e.
