Prezidente Repúblika renova Estadu Emerjénsia ba loron 30 tan
Prezidente Repúblika, Francisco Guterres Lú Olo, hafoin simu pedidu husi Governu, dekreta ona, ohin, loron 27 fulan-janeiru tinan 2021, renovasaun ba estadu emerjénsia ba loron 30 tan, hahú husi tuku 00:00 loron 2 fevereiru to’o 23:59 loron 3 fulan-marsu tinan 2021.
Governu delibera ona iha sorumutuk Konsellu Ministru nian iha loron 20 fulan-janeiru tinan 2021, atu propoin ba Prezidente Repúblika renovasaun ba Estadu Emerjénsia, ba loron tolu-nulu tan. Hafoin hetan paresér pozitivu sira husi Konsellu Estadu no husi Konsellu Superiór Defeza no Seguransa nian, Parlamentu Nasionál ohin iha Plenáriu, autoriza ona Prezidente Repúblika atu deklara renovasaun estadu emerjénsia ba dala sanulu, dezde pandemia COVID-19 ne’e mosu.
Iha sesta, loron 29 fulan-janeiru, iha sorumutuk estraordinária Konsellu Ministru nian, sei aprova medida sira atu ezekuta deklarasaun Estadu Emerjénsia nian ne’e.
Primeiru-Ministru, Taur Matan Ruak, iha debate kona-ba pedidu autorizasaun atu renova deklarasaun estadu emerjénsia ba dala sanulu, afirma katak Governu buka atu adapta ba desizaun ne’ebé Governu foti ona kona-ba medida sira atu ezekuta estadu emerjénsia tuir kritériu nesesidade, proporsionalidade no prekausaun nian, tanba Governu hatene di’ak ona ninia responsabilidade atu proteje timoroan sira hotu no ema rai-li’ur sira ne’ebé hela iha Timor-Leste nia moris no saúde no mós atu garante ezisténsia atividade ekonómika ne’ebé hatán, tuir posibilidade, ba situasaun saúde no ekonomia internasionál, nune’e mós nesesidade subsisténsia família no empreza sira iha ita-nia país”.
Xefe Governu reafirma katak “Governu empeñadu nafatin no sei kontinua empeñadu absolutamente atu prevene surtu COVID-19 ruma mosu iha ita-nia país, ne’ebé ninia konsekuénsia sei fó prejuízu maka’as tebetebes iha planu umanu no ekonómiku” no nia agradese “ba profisionál, funsionáriu no voluntáriu sira hotu, liu-liu ba ajente sira husi saúde, protesaun sivíl, defeza, seguransa no komérsiu báziku, ba sira-nia servisu, dedikasaun no apoiu, ne’ebé sempre hatudu to’o oras ne’e atubele tulun ita ultrapasa hamutuk momentu difisil ne’ebé umanidade tomak hasoru”.
Iha Timor-Leste hahú kedas iha inísiu pandemia nian, rejista ona kazu konfirmadu Koronavirus foun hamutuk 68, no husi númeru ida-ne’e, ema hamutuk 50 maka rekupera tiha ona no oras ne’e daudaun iha kazu ativu hamutuk 18.
Númeru infetadu husi SARS-CoV-2 iha mundu ultrapasa ona millaun 100 no ema hamutuk millaun 2 resin maka mate ona tanba COVID-19.
