Sorumutuk Konsellu Ministrus nian iha loron 27 fulan-janeiru tinan 2021

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 27 fulan-janeiru tinan 2021

Konsellu Ministrus hala’o sorumutuk iha Palásiu Governu, iha Dili no, bazeia proposta Ministru Obras Públikas, Salvador Soares dos Reis Pires, delibera hodi nomeia hanesan membru sira Konsellu Administrasaun Autoridade Nasionál Eletrisidade (ANE I. P.) nian, ba períodu tinan haat. Membru sira ne’e maka: Ruben Jerónimo Freitas, hanesan Prezidente Konsellu Administrasaun, Jaime Godinho Soares, hanesan Vise-Prezidente no Aurora Teresa Carvalho Magno, Júnior Raimundo da Cruz no José Maria Xavier, hanesan vogál sira

Bazeia mós ba proposta Ministru Obras Públikas nian, Konsellu Ministrus delibera hodi nomeia hanesan membru sira Konsellu Administrasaun Autoridade Nasionál Bee no Saneamentu (ANAS I.P.) nian, ba períodu tinan haat. Membru sira ne’e maka: Domingos Pinto, hanesan Prezidente Konsellu Administrasaun, Francisco Xavier Pereira, nu’udar Vise-Prezidente no Miguel António Ximenes, Dulce Soares no Eugénio Lemos, hanesan vogál sira.

Konsellu Ministrus aprova ona projetu Rezolusaun Governu nian, ne’ebé aprezenta husi Ministru Turizmu, Komérsiu no Indústria, José Lucas do Carmo da Silva, kona-ba alterasaun daruak ba Rezolusaun Governu N. 20/2019, loron 14 fulan-juñu, ne’ebé nomeia Autoridade Nasionál ba Expo Dubai 2020. Ho alterasaun ida-ne’e, Ministru José Lucas do Carmo da Silva substitui Francisco Kalbuady Lay.

Ministru Finansas, Rui Augusto Gomes no Ministru Koordenadór Asuntus Ekonómikus, Joaquim Amaral halo ona aprezentasaun ida ba Konsellu Ministrus kona-ba progresu Programa “Cesta Básica”.

Ikusliu, Ministru Transportes no Komunikasoins, José Agustinho da Silva, aprezenta opsaun polítiku-lejizlativa nian sira kona-ba alterasaun dahuluk Dekretu-Lei N.15/2012, loron 28 fulan-marsu, kona-ba Regulamentasaun husi Setór Telekomunikasoens no ba kriasaun regulamentu husi atus regulasaun administrativa nian iha setór telekomunikasoins. Opsaun polítiku-lejizlativa sira ne’ebé aprezenta ne’e ho nia objetivu mak atu altera ka reformula solusaun anteriór balun ne’ebé eziste ona ne’e no klarifika konseitu tékniku no jurídiku balun no tipu prosedimentu regulatóriu sira. Hakarak mós klasifika asaun ka omisaun sira ne’ebé sai nu’udar konduta ne’ebé proibida no esklarese ninia sansaun administrativa sira. REMATA

 

   Ba leten