Sorumutuk Konsellu Ministrus nian iha loron 9 fulan-dezembru tinan 2020
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 9 fulan-dezembru tinan 2020
Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu-Governu nian ne’ebé aprezenta husi Ministru Turizmu, Komérsiu no Indústria, José Lucas do Carmo da Silva, kona-ba alterasaun dahuluk ba Dekretu-Lei n.u 12/2019, loron 14 fulan-juñu, kona-ba Orgánika Ministériu Turizmu, Komérsiu no Indústria nian. Aleinde alterasaun hirak ne’ebé aprova ona iha sorumutuk Konsellu Ministrus nian iha loron 20 fulan-novembru tinan 2020, projetu Dekretu-Lei ne’ebé agora hetan ona aprovasaun ne’e, rekoñese kompeténsia tranzitória sira Ministériu Turizmu, Komérsiu no Indústria nian hodi halo kontratasaun ba pesoál merkadu Taibesi no merkadu Manleuana nian.
Hetan ona mós aprovasaun ba projetu Dekretu-Lei kona-ba insentivu finanseiru estraordináriu ba Suku sira, ne’ebé aprezenta husi Ministru Administrasaun Estatál, Miguel Pereira de Carvalho. Inisiativa lejizlativa ida-ne’e ninia objetivu mak atu rekoñese no atribui ba Suku sira, ba sira-nia Lideransa Komunitária sira, no mós ba pesoál ne’ebé maka hala’o serbisu iha suku sira, kompensasaun finanseira ida kona-ba sira-nia serbisu ne’ebé mak aumenta maka’as iha preparasaun no implementasaun husi programa asisténsia Governu nian sira, ho ámbitu nasionál, ne’ebé destinadu hodi hamenus agravamentu kondisaun finanseira uma kain sira-nian, liuliu ba programa “Subsídiu Uma-Kain”, ne’ebé remata ona, no programa “Sesta Bázika” ne’ebé daudaun ne’e iha hela faze ezekusaun nian.
Konsellu Ministru aprova ona Akordu Finansiamentu entre Repúblika Demokrátika Timor-Leste no Banku Mundiál, ne’ebé aprezenta husi Ministru Finansas, Rui Augusto Gomes kona-ba projetu fortalesimentu ensinu báziku iha Timor-Leste no kona-ba projetu dezenvolvimentu infraestrutura bee no saneamentu nian iha Munisípiu Baukau. Akordu sira ne’e sei asina husi Ministru Finansas, ne’ebé reprezenta Governu Timor-Leste nian.
Ministru Justisa, Manuel Cárceres da Costa, aprezenta ba Konsellu Ministrus opsaun polítiku-lejizlativa sira ne’ebé submete ba projetu lejizlativu kona-ba estabelesimentu ida husi Komisaun Prevensaun no Luta hasoru Tráfiku Ema nian. Komisaun ida-ne’e sei permite atu koordena asaun hirak ne’ebé presiza atu garante medida sira protesaun nian no asisténsia ba vítima sira husi tráfiku ema nian ne’ebé prevee ona iha lei, nune’e mós, atu promove no asegura koordenasaun husi entidade nasionál sira no kooperasaun ho entidade sira husi rai li’ur iha kombate hasoru tráfiku ema nian, nune’e mós atu akompaña aplikasaun ba dispozisaun sira husi konvensaun hirak ne’ebé Timor-Leste ratifika ona ka sei ratifika iha matéria tráfiku ema nian. REMATA.
