Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 19 fulan-agostu tinan 2020 

Konsellu Ministrus hala’o sorumutuk iha Palásiu Governu, iha Dili no aprova ona projetu Dekretu-Lei, ne’ebé ninia objetu maka alterasaun daruak ba Orgánika Ministériu Justisa nian, ne’ebé Ministru Justisa, Manuel Cárceres da Costa, aprezenta. Alterasaun ne’e ninia objetivu mak atu reflete alargamentu husi atribuisaun Ministériu ne’e nian, tuir redasaun foun husi orgánika Governu nian, liuliu kona-ba atribuisaun sira ne’ebé liga ba reforma judisiária, ne’ebé tanba Ministériu Reforma Lejizlativa no Asuntus Parlamentares halakon tiha ona, pasa fali ba Ministériu Justisa.

Hetan ona mós aprovasaun maka projetu Dekretu-Lei, ne’ebé Ministru Administrasaun Estatál, Miguel Pereira de Carvalho, aprezenta ona, kona-ba alterasaun daruak ba Estatutu husi Administrasaun Munisipál, Autoridade Munisipál no Grupu Tékniku Interministeriál ba dexentralizasaun administrativa. Alterasaun ne’e mai atu muda fila-fali, parte balu, husi prosesu konsentrasaun administrativa kona-ba rekursus umanus, ne’ebé rezulta husi alterasaun dahuluk ba Estatutu ne’e no solusiona konstranjimentu jurídiku no operasionál sira ne’ebé liga ba kompeténsia sira, organizasaun no funsionamentu husi servisu munisipál sira, no mós ba nomeasaun liuhusi substituisaun ba dirijente no xefia sira. Dekretu-Lei ida-ne’e iha mós alterasaun kona-ba Konsellu Konsultivu Munisipál sira, liuliu ba ninia kompozisaun

Konsellu Ministrus aprova ona projetu Rezolusaun Governu nian hamutuk rua, ne’ebé Ministru Obras Públikas, Salvador Soares dos Reis Pires, aprezenta relasiona ho Polítika Nasionál ba Jestaun Rekursu Bee nian no Polítika Nasionál ba Abastesimentu Bee-moos.

Polítika Nasionál ba Jestaun Rekursu Bee nian define kona-ba responsabilidade, intensaun, objetivu no estratéjia Governu nian sira ba jestaun rekursu bee nian sira. Dokumentu ida-ne’e fornese kuadru jerál ida no liña asaun nian ida ba Polítika Nasionál kona-ba Jestaun Rekursu Bee nian sira to’o tinan 2030. Dokumentu ne’e nu’udar dokumentu orientasaun no informasaun nian ida ba autoridade públika sira, jestór rekursu bee nian sira no entidade hotu-hotu ne’ebé envolve iha elaborasun no implementasaun husi lejizlasaun, regulamentasaun, polítika, estratéjia, planu no asaun sira Repúblika Demokrátika Timor-Leste nian kona-ba rekursu bee nian.

Polítika Nasionál  ba Abastesimentu Bee-moos ne’e ninia objetivu mak atu estabelese vizaun no objetivu sira Governu Timor-Leste nian relasiona ho kompromisu nasionál no internasionál hirak-ne’ebé asume ona kona-ba fornesimentu ho asesu ne’ebé hanesan ba servisu bee-moos ne’ebé adekuadu, seguru no sustentavel no ba kustu ida-ne’ebé asesivel ba sidadaun tomak. Dokumentu ne’e kontein prinsípiu orientadora sira ne’ebé permite atu tradús vizaun kona-ba asesu universál ba abastesimentu públiku bee-moos nian ba estratéjia no planu sira, no saida de’it maka presiza ba ninia implementasaun ne’ebé di’ak liu hodi benefisia populasaun Timor-Leste no dezenvolvimentu sosiál no ekonómiku nasaun nian ho forma sustentavel. REMATA