Governu Timor-Leste

Vise-Ministru Interiór, António Armindo, akompaña husi Komandante Unidade Patrullamentu Fronteira (UPF), Superintendente João Sancho Pires, iha loron 30 fulan-jullu tinan 2020, vizita Kompañia Alfa UPF no eskuadra PNTL Maliana nian, iha Munisípiu Bobonaru.

Vise-Ministru ne’e hateten katak “dezenvolvimentu instituisaun operasionál sira ne’ebé Ministériu Interiór fó tutela inklui iha kompromisu Governu VIII nian, deskreve iha nia Programa, ne’ebé define medida prioritária sira ba dezenvolvimentu sustentavel ne’ebé temi ona iha nia preámbulu, objetivu ida atu halo “mudansa ba progresu no ba moris-di’ak”.

 “Tanba ne’e, hamutuk ho ekipa téknika husi Gabinete Primeiru-Ministru nian, no ho ekipa téknika ida husi aprovizionamentu Ministériu Interiór nian no ho membru PNTL nian sira, ami hala’o vizita ida-ne’e hodi haree direta instalasaun sira postu UPF no eskuadra PNTL nian, atu haree besik liu problema no difikuldade hirak ne’ebé sira hasoru, ho kompromisu husi Governu, liuhusi Ministériu Interiór, atu rezolve dezafiu hirak-ne’e”.

Na’i-ulun ne’e hatutan mós katak, durante nia mandatu, nia sei kontinua kontribui ba instituisaun PNTL nian atubele sai profisionál liután, hodi serbí interese Nasaun nian sira, tanba PNTL sai pilár fundamentál ida ba país.

Vise-Ministru dehan mós katak “maske postu ne’e harii ba UPF, komunidade tenke sente hanesan sira-nian, atu ita bele tau-matan hamutuk”, tanba ne’e “komunidade iha konxiénsia no responsabilidade hodi tau-matan ba infraestrutura sira ne’ebé harii ona iha sira-nia área, tanba iha postu balun ne’ebé Alfándega oferese ba UPF  aat hotu tiha ona”.

Durante vizita, Governante ne’e haree kondisaun postu fronteira nian sira atubele haree didi’ak postu sira ne’ebé de’it maka presiza reabilitasaun no hirak ne’ebé mak tenke harii fila-fali.

Ministériu Interiór, tuir ninia planu prioridade nian sira, sei foka liu ba atu hadi’a infraestrutura sira husi postu sira UPF nian, eskuadra PNTL nian sira, Postu Servisu sira Migrasaun no Protesaun Sivíl nian.

Iha vizita ba Kuartél UPF nian iha Batugadé, Vise-Ministru no ekipa téknika, ezamina área, iha ne’ebé sei harii kazerna ida ba membru 20 resin instituisaun nian, atubele define planu mestre obra ne’e nian. Iha faze daruak, ekipa téknika sei ba fali terrenu hodi foti dadus, atubele elabora projetu kazerna no instalasaun UPF nian sira. Sei halo planu integradu ida, ho implementasaun tuir faze ba instalasaun sira UPF nian, tuir nesesidade hirak ne’ebé iha.

Vise-Ministru no nia komitiva halo vizita ba membru sira Kompañia Bravo Kovalima nian no la’o hale’u ona postu sira UPF nian iha Badut Mean, Motain, Nunura, Mozon, Malibaka, Kalohan no Memo, Postu Integradu Fronteira no Migrasaun Batugadé nian, no ikusliu vizita mós kompañia Delta BOP (Batallaun Orden Públika), iha Aldeia Solugol, no Suku Holsa.