Sorumutuk Estraordináriu Konsellu Ministrus nian loron 28 fulan-fevereiru tinan 2020

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Estraordináriu Konsellu Ministrus nian loron 28 fulan-fevereiru tinan 2020

Konsellu Ministrus hala’o sorumutuk iha Palásiu Governu, iha Dili, no analiza ona projetu kona-ba Dekretu Governu nian, ne’ebé Ministra Edukasaun, Juventude no Desportu, Dulce de Jesus Soares, mak aprezenta, ne’ebé ninia objetivu mak atu estabelese suplementu remuneratóriu ida ba ezersísiu temporáriu kargu diresaun no xefia, atu atribui ba dosente sira ne’ebé hala’o ona funsaun iha estabelesimentu ensinu sekundáriu tékniku-vokasionál públiku sira. Dekretu ne’e hetan apresiasaun pozitiva husi membru Governu sira ne’ebé marka prezensa iha sorumutuk ne’e no sei analiza filafali iha sorumutuk Konsellu Ministrus nian tuirmai, hafoin hetan paresér husi Ministériu Finansas no husi Komisaun Funsaun Públika.

Konsellu Ministrus aprova ona proposta deliberasaun ne’ebé aprezenta husi Ministru Obras Públikas, Salvador Soares dos Reis, kona-ba aprovasaun ba prosedimentu aprovizionamentu nian ba akizisaun kombustivel ba Sentrál Elétrika Hera - Lote 1. Deliberasaun ne’e ninia objetivu mak atu garante fornesimentu kombustivel ba funsionamentu tomak Sentrál Elétrika Hera nian, ne’ebé prodús enerjia elétrika ne’ebé distribui ba territóriu nasionál tomak, ho exesaun ba Rejiaun Administrativa Espesiál Oekusi-Ambenu (RAEOA) no Ataúru. Nune’e, Governu deside aprova intensaun atu adjudika kontratu ne’e ba empreza MATO Unipessoal Lda. Timor-Leste liuhusi konsórsiu ho Nikmat Mujur Sdn, Malázia, tuir proposta ne’ebé maihusi relatóriu tékniku sira Komisaun Nasionál Aprovizionamentu nian, fó instrusaun ba Komisaun ne’e atu, bazeia ba ninia kompeténsia sira, realiza dilijénsia hirak ne’ebé presiza atu notifika konkorrente sira no sujeita selebrasaun kontratu ba vistu préviu husi Kámara Kontas, tuir Lei. REMATA.

   Ba leten