Komemorasaun Aniversáriu da-42 Proklamasaun Independénsia Repúblika Demokrátika Timor-Leste
Serimónia ofisiál komemorasaun aniversáriu da-42 Proklamasaun Independénsia Repúblika Demokrátika Timor-Leste nian, ne’ebé organiza husi Ministériu Administrasaun Estatál, sei hala’o iha Suai, iha loron 27 no 28 fulan-novembru.
Iha loron 27, tuku 16, hahú ho Misa Agradesimentu, iha Igreja Parokiál Ave Maria. Iha tuku 17 liu minutu 45 lokraik sei inaugura Plaka Toponímia nian, iha Avenida Mártires da Pátria no Avenida António Mendonça “Leku Katar”. Iha tuku 18 liu minutu 15, tau ai-funan iha Monumentu Masakre Setembru Negru.
Iha loron 28 fulan-novembru, Loron Proklamasaun Independénsia nian, serimónia hahú iha tuku 9 liu minutu 15, ho Hasa’e Bandeira Nasionál, iha Kampu Ladi, ho prezensa Prezidente Repúblika, Francisco Guterres Lú Olo, Prezidente Parlamentu Nasionál, Aniceto Longuinhos Guterres, Primeiru-Ministru, Mari Alkatiri, no Prezidente Tribunál Rekursu, Deolindo dos Santos. Tuir fali minutu ida hakmatek [minutu silénsiu], no tuku 9 liu minutu 55, kondekorasaun ba kombantente no veteranu sira Libertasaun Pátria nian, husi Prezidente Repúblika. Hafoin diskursu Prezidente Repúblika, iha tuku 10 liu minutu 40, iha desfile ida no hala’o atividade desportiva sira. Serimónia remata iha tuku 17, hafoin Hatún Bandeira Nasionál.
