Dili sai uma-na’in ba Sorumutuk XV Prokuradór-Jerál sira CPLP nian
Sorumutuk XV Prokuradór-Jerál sira CPLP nian (Komunidade Nasaun sira Lian Portugés nian) hala’o iha Ministériu Negósius Estranjeirus no Kooperasaun, husi loron 25 to’o 27 fulan-outubru.
Iha loron 25 fulan-outubru, Prokuradór-Jerál sira husi Angola, Brazíl, Kabuverde, Giné-Bisau, Mosambike, Saun Tomé no Prínsipe, Timor-Leste, no mós, Prokuradór Rejiaun Administrativa Espesiál Makau nian iha sorumutuk preliminár ida, molok abertura ofisiál, iha tuku 9:00 husi Prokuradór-Jerál Timor-Leste no Prezidente Sorumutuk XV Prokuradór-Jerál CPLP nian, José da Costa Ximenes, tuir kedas ho diskursu boazvindas nian, husi Prezidente Parlamentu Nasionál, Aniceto Guterres. Iha parte dadeer nian sei aprezenta mós tema: “Ministériu Públika no dezafiu sira Globalizasaun nian”. Iha parte loro-kraik nian, Prokuradór-Jerál na’in-8 CPLP nian no Prokuradór Rejiaun Administrativa Espesiál Makau nian, sei simu husi Prezidente Repúblika, no liutiha ida-ne’e, sei vizita Arkivu no Muzeu Rezisténsia Timorense.
Iha loron 26 fulan-outubru sei hala’o debate kona-ba tema oioin. Dahuluk, iha tuku 8:30, “Violénsia Doméstika. Kazu Timor-Leste nian: aspetu Jurídiku no sosiál sira”, sei aprezenta husi antiga Prokuradora-Jerál Timor-Leste nian, Ana Pessoa. Tuirmai iha tuku 9:15, “investigasaun kriminál, deskonsentrasaun kompeténsia no Diresaun inkéritu/instrusaun nian”; no iha tuku 11:30, “ ‘Dezterritorializasaun’ atividade kriminoza sira no problema kooperasaun internasionál kona-ba investigasaun”. Iha inísiu loro-kraik nian sei halo análize, entre sira seluk, ba pájina Internét husi sorumutuk Prokuradór-Jerál sira CPLP nian, instrumentu no mekanizmu kooperasaun jurídiku no judisiária penál iha espasu CPLP nian no Memorandu Entendimentu ne’ebé atu asina entre Prokudarór-Jerál sira CPLP nian. Iha parte loro-kraik sei halo mós debate kona-ba tema sira hanesan: “siberkrime no prova dijitál”, no Tráfiku droga iha espasu CPLP nian, harii rede pontu kontaktu nian ida, elaborasaun manuál kona-ba atuasaun nian”.
Iha parte dadeer loron datoluk nian, iha sesta, loron 7 fulan-outubru, delegasaun sira sei vizita Instalasaun Prokuradór-Jerál Repúblika Demokratika Timor-Leste nian.
Iha loro-kraik, Prokuradór-Jerál sira sei halo debate no asina Deklarasaun Finál Dili nian no Memorandu Entendimentu.
Sorumutuk ne’e sei taka iha tuku:16:00, ho Leitura Deklarasaun Dili nian.
