Feira Livru “Mais Portugês” iha Likisá
Projetu Mais Portugês, finansia husi Gabinete Apoiu ba Sosiedade Sivíl husi Gabinete Primeiru-Ministru nian, organiza, hamutuk ho Embaixada Portugál nian iha Timor-Leste, Feira Livru Mais Portugês iha Likisá. Eventu ne’e sei hala’o iha loron 20 no 21 fulan-outubru, iha Eskola Sekundáriu Jerál Likisá, husi tuku 10 to’o 17:00.
Aleinde fa’an livru sira, sei dinamiza mós atividade divertimentu no rekreativa nian oin-oin, liuliu ba labarik no foin-sa’e sira, hanesan lee livru, dramatizasaun ho fantoxe, hatudu filme/ filme ho durasaun badak sira, realizasaun esperiénsia, atividade interpretasaun no ilustrasaun, lee poezia, konkursu leitura nian ida, Peddy-paper. Sei halo mós aprezentasaun livru “Sabores da Lusofonia” husi chef Luís Simões no realiza Mostra Gastronómika ki’ik ida. Momentu muzikál rua Feira nian sei responsabiliza husi João Rocha, ho konsertu “A Música vai à Escola” [“Múzika ba Eskola”] no husi Grupu Gilberto Gasparetto no konvidadu sira, ho Konsertu Mix Brasil.
Inisiativa ne’e konta ho kolaborasaun husi livreiru sira hanesan Livros & Companhia, Plural Editores, Livraria Central no Haktuir Ai-Knanoik, husi Sentru Aprendizajen no Formasaun Eskolár (CAFE, sigla iha lian portugés) Likisá nian no husi AICEP-Portugal no husi Embaixada Brazíl nian. Eventu ne’e hetan mós patrosíniu husi empreza sira hanesan: Timor-Telecom, BNU Timor, FORTUNA LOROSA’E, Águas de Portugal, Primos Boot no Páteo.
