Governu Timor-Leste

Iha loron 5 fulan-jullu, Ministru Estadu, Koordenadór Asuntus Ekonómikus no Ministru Agrikultura no Peskas, Estanislau da Silva, partisipa iha ko’a hare dahuluk fini nian, iha Bulutu, Postu Administrativu Laleia, Munisípiu Manatutu.

Iha rai ho luan ektár rihun 269,6, prodús ona fini hare hamutuk tonelada 3,8 ne’ebé sei tulun  to’os-na’in hamutuk 144.

Ministru Estadu, Koordenadór Asuntus Ekonómikus no Ministru Agrikultura no Peskas agradese mós ba komunidade to’os na’in sira ba serbisu ne’ebé sira hala’o tiha ona hafoin inaugurasaun ba sistema irrigasaun ne’e nian, iha fulan-janeiru liubá: “Ha’u fó parabéns ba to’os-na’in sira iha Laleia, tanba ho imi-nia serbisu mak ohin ita hala’o ko’a hare fini  nian ne’e. Governu iha programa integradu ida – ‘Povu kuda, Governu sosa’ – no, iha kolleita ida-ne’e, marka mós prezensa ekipa Sentru Nasionál Lojístika (SNL) nian, husi Ministériu Komérsiu, Indústria no Ambiente, ne’ebé sei sosa imi-nia fini sira ne’e.”

Iha okaziaun ne’e, SNL hato’o mós parabéns ba to’os-na’in sira ba kolleita ne’e no husu ba sira atu aumenta produsaun, atu, ho dalan ida-ne’e, hamenus ba daudaun foos ne’ebé ita-nia nasaun hatama mai (importa).