Lei Foun Sosiedade Komersiál sira nian fasilita kreximentu Setór Privadu
Ses. 31 marsu 2017, 02:23h
Iha loron 27 fulan-marsu, Parlamentu Nasionál aprova ona Lei Sosiedade Komersiál sira nian. Governu harii ona rejime jurídiku ida atubele simplifika formasaun ba empreza komersiál ki’ik no média sira.
Proposta Lei ne’e elabora hosi Gabinete Ministru Estadu, Koordenadór Asuntus Ekonómikus (MEKAE) no halo ona diskusaun ho setór privadu no ho Ministériu relevante sira, molok hetan aprovasaun iha sorumutuk Konsellu Ministrus nian.
Aprovasaun ba Lei ne’e hatudu pasu dahuluk kona-ba reforma lejizlativa ida ne’ebé hala’o hela, inklui revizaun ba diploma sira ne’ebé regula kona-ba rejistu no prosesu lisensiamentu komersiál sira, no kriasaun rejime jurídiku kona-ba insolvénsia no rekuperasaun empreza sira nian.
Objetivu sira reforma nian ne’ebé tama iha Lei Sosiedade Komesiál sira nian maka hasai tiha aspetu sira ne’ebé dezatualizadu ona no introdús aspetu adekuadu sira seluk ba dezafiu prevee-belek (previzivel) sira; fasilita konstituisaun no jestaun empreza ki’ik no empreza média sira no simplifika rejime jurídiku negósiu sosietáriu sira nian; introdús mekanizmu atu hadi’a imajen emprezariál Timor-Leste nian iha instituisaun rai-li’ur nian sira liuliu Banku Mundiál; no garante koerénsia ida ne’ebé boot liután iha lejizlasaun komersiál, liuliu ho rejistu komersiál.
Lei Sosiedade Komersiál sira nian ne’e halo parte husi medida konjuntu ida ne’ebé importante hodi “ kria ambiente ida ne’ebé favoravel ba implementasaun no operasaun ne’ebé fó benefísiu ba atividade emprezariál sira”, tuir Matadalan Reforma no Fomentu Ekonómiku Timor-Leste nian tinan 2015-2017.
