Sensu fó fila-fali (Entrega rezultadu sira husi Sensu tinan 2015 nian ba Suku sira)
Iha loron 2 fulan-marsu, Diresaun-Jerál Estatístika husi Ministériu Finansas sei entrega rezultadu husi informasaun sira ne’ebé rekolla ona iha Sensu tinan 2015 nian ba Munisípiu no Suku hotu-hotu, iha Sentru Konvensoins Dili.
Projetu ho títulu “Sensu fó fila-fali” (Devolusaun Sensu), nia objetivu mak atu fó sai ba autoridade lokál sira, informasaun sira ne’ebé rekolla ona iha resenseamentu kona-ba populasaun no uma-kain iha 2015, kona-ba Suku hotu-hotu. Ho ida ne’e Governu hakarak fó ba komunidade sira perspetiva ida kona-ba Suku no Munisípiu ida-idak, iha nivel nasionál, hanesan forma atu envolve komunidade sira iha prosesu dezenvolvimentu nasaun nian.
Serimónia ne’e, sei hahú iha tuku: 9:00 no konta ho prezensa husi membru Governu nian balu. Ministra Finansas, Santina Cardoso, Ministru Administrasaun Estatál, Dionísio Babo Soares no Ministru Planeamentu no Investimentu Estratéjiku, Xanana Gusmão, sei hala’o diskursu iha serimónia ida ne’e.
Aprezentasaun kona-ba rezultadu sira husi Sensu ba Munisípiu sira sei hahú besik meiudia. Xefe Suku sira sei simu dokumentu iha serimónia ne’e nia rohan, iha tuku: 17:30.
