Governu Timor-Leste

Ministériu Solidariedade Sosiál, liuhusi Sentru Solidariedade Sosiál Munisípiu Ermera (SSSME), entrega ona simbolikamente apoiu sasán emerjênsia ba família vítima 155 husi udan no anin boot, iha Postu Administrativu Atsabe, iha Ermera, iha loron 16 fulan-fevereiru tinan 2017. Materiál emerjénsia hirak ne’e entrega husi Diretór SSSME, João Bosco de Jesus Mendonça, akompaña husi Autoridade lokál sira.

Diretór hateten katak apoiu ne’e fó ba família hirak ne’ebé sofre impaktu husi udan no anin boot ne’ebé akontese iha semana anteriór. Sasán emerjénsia hirak ne’ebé maka fó ho volume 155 maka hanesan, foos ka’ut, konjuntu familar sira, Supermi kaixa, Basia, Mina Bimoli masa no susu ben Dancow. Atu lori sasán hirak ne’e hosi Gleno ba Atsabe, SSS Munisípiu Ermera hetan apoiu transporte husi Organizasaun Internasionál Migrasaun nian (OIM) no Mercy Corps (organizasaun umanitária norte-amerikana, ba hodi tulun situasaun sira katástrofe nian).

Diretór Jesus Mendonça informa mós katak oras ne’e daudaun iha ona terenu ekipa ida ne’ebé kompostu husi Komité Distrital Jestaun Dezastre, Bombeirus, Protesaun Sivíl, Kruz Vermella Timor-Leste no Administrasaun Munisípiu nian. Ekipa ida ne’e halo hela avaliasaun ba grau husi estragu sira husi komunidade sira-nia uma ida-idak, no lenvantamentu apoiu fó husi SSSME ba materiál sira konstrusaun nian.