Governu Timor-Leste

Fatin: Universidade Minho

Lori Administrasaun Públika besik ba sidadaun, liuhusi dezenvolvimentu governasaun eletrónika no modernizasaun administrativa servisu públiku sira, mak objetivu boot husi Projeto Apoiu ba Hasa’e Kualidade no Proximidade Servisu Públiku sira iha PALOP no Timor-Leste (PASP-PALOP-TL), ne’ebé Uniaun Europeia delega ba parseiru portugés sira.

Tanba ne’e maka Universidade Minho, iha parseria ho Universidade Nasoins Unidas nian (UNU-EGOV), kria ona planu formasaun ida ba komponente Formasaun Transversál projetu ne’e nian.

Asaun ne’e konta ho partisipasaun husi formandu hamutuk 24 husi Nasaun Lian Ofisiál Portugés sira (PALOP) no Timor-Leste, ne’ebé sei kaer knaar lideransa iha aplikasaun husi projetu nasionál sira ne’e iha domíniu Governasaun Eletrónika (E-gov) no husi Teknolojia Informasaun no Komunikasaun (TIK) no iha kriasaun Planu Asaun Nasionál hirak ne’e rasik.

Formandu sira sei tuir sesaun formasaun nian sira, ne’ebé komplementa husi Semináriu no estudu kona-ba kazu hirak ne’ebé relevante, no dadus husi personalidade Akademia no Administrasaun Públika portugés ninian sira. Sei iha mós semináriu ne’ebé organiza husi UNU-EGOV no sesaun semanál sira hanaran “Dada-lia iha tempu han-kalan”, iha ne’ebé, iha kontestu han hamutuk rame-rame entre formandu sira no ekipa dosente nian, sei iha mós palestra ida husi oradór konvidadu ida.

Husi parte Timor-Leste nian, formandu sira ne’ebé maka sei partisipa maka:
- Elizabeth Baptista (Pontu Fokál PSAP nian, husi Prezidénsia Konsellu Ministru)
- João Dias (Asesór TIK nian, husi Prezidénsia Konsellu Ministru)
- Paulo da Costa (Xefe Departementu TIK nian, husi Ministériu Obras Públikas, Transportes no Komunikasoins)
- Mário Ximenes (Elementu husi Departementu TIK nian, husi Diresaun Nasionál Rejistu no Notariadu, Ministériu Justisa)