Governu Timor-Leste

Data: Loron29 fulan-juñu to’o loron 1 fulan-jullu
Fatin:Sentru Konvensaun Dili (CCD)

Universidade Nasionál Timor-Lorosa’e (UNTL) organiza sorumutuk XXVI Asosiasaun Universidade sira Lian Portugés (AULP) nian.
Tema husi sorumutuk ne’e maka “Mobilidade akadémika no globalizasaun iha espasu CPLP no Makau nian” no iha mós subtema oioin maka hanesan:
- Polítika no estratéjia sira kona-ba viabilizasaun mobilidade akadémika iha nasaun luzófonu sira;
- Siénsia sira: difuzaun no dezenvolvimentu iha lian portugés
- rota signu sira nian: sentidu, migrasaun, no interkulturalidade;
- Paizajen, natureza no kultura;
- Dezafiu sira seluk husi instituisaun Ensinu Superiór AULP nian sira.

Asosiasaun ne’e halibur hamutuk universidade no instituisaun 150 resin husi nasaun sira CPLP nian no, hahú harii, iha tinan 30 liubá, ba dala uluk maka hala’o ninia sorumutuk anuál iha Timor-Leste. Nune’e, reprezentante 100 resin, liuliu Reitór sira husi Universidade sira husi Espasu CPLP nian, Makau, Austrália no Malázia, maka sei halibur malu iha Dili.

Partisipa iha eventu ne’e, Sekretáriu Estadu Asuntu Sosiál no Kultura husi Governu Rejiaun Administrativa Espesiál Makau nian, Alexis Tam Chong Weng, Reitór Universidade Makau, Wei Zhao, Vise-Reitór Universidade Nova Lisboa (Portugál), João Sàágua, Vise-Reitór Universidade 11 de Novembro-UON (Mosambike), Francisco Chocolate, Prezidente Institutu Politékniku Leiria (Portugál), Nuno Mangas, Prezidente AULP no Vise-Reitór Universidade Makau, Rui Martins, no reprezentante husi Sekretáriu Ezekutivu CPLP nian, Georgina Melo, no seluseluk tan. Husi parte Timor-Leste nian, sei marka prezensa Reitór UNTL nian, Francisco Martins, nune’e mós dosente sira hanesan: Miguel Maia dos Santos, Vicente Paulino no Irta Sequira Barris de Araújo.