Arkivu Nasionál: ita maka memória no governasaun di’ak
Espozisaun, loron 9 to’o 16 fulan-juñu
Fatin:Parlamentu Nasionál (molok hala’o fali iha fatin seluk)
Ministériu Administrasaun Estatál (MAE) selebra Loron Internasionál Arkivu sira nian, ne’ebé komemora iha nasaun oioin iha loron 9 fulan-juñu, ho espozisaun “Arkivu Nasionál: ita maka memória no governasaun di’ak”, hodi aproveita atu habelar misaun instituisaun ne’e nian atu salvaguarda memória nasionál.
MAE defende katak koñesimentu komunidade nian kona-ba Arkivu Nasionál valoriza knaar instituisaun ne’e nian nu’udar patrimóniu ne’ebé partense ba ema hotu-hotu.
Ho espozisaun ne’e, Arkivu Nasionál konkretiza ninia misaun iha ámbitu polítika sira ba dezenvolvimentu nasionál, hodi fó hanoin katak sidadaun ida-idak iha devér atu defende patrimóniu koletivu no transparénsia Administrasaun Públika nian. Iha área sira direitu nian, Arkivu haforsa direitu ba Memória no ba Informasaun.
Ida ne’e hanesan espozisaun ida ne’ebé sei hala’o husi fatin ida ba fatin seluk ne’ebé, ezibisaun iha Parlamentu, entre loron 9 no 16 fulan-juñu hotu tiha,sei la’o hale’u nasaun ne’e.
Loron Internasionál Arkivu sira nian ne’e estabelese husi Asembleia-Jerál Konsellu Internasionál Arkivu nian, ne’ebé hala’o iha tinan 2007. Asembleia hili data ne’e tanba iha loron 9 fulan-juñu tinan 1948 mak UNESCO kria KIA - Konsellu Internasionál Arkivu, organizasaun internasionál independente ida ne’ebé harii husi membru sira husi organizasaun arkivu nian oin-oin, husi profisionál no estudante sira iha área ne’e, ne’ebé serbisu ho hanoin atubele hato’o ba órgaun kompetente sira informasaun sira kona-ba prátika di’ak iha nivel jestaun dokumentál.
