Sensu Nasionál kona-ba Populasaun no Uma-Kain Timor-Leste nian
Sensu tinan 2015 nian, ne’ebé sei hala’o husi loron 11 to’o loron 25 fulan-jullu, sei sai nu’udar sensu datoluk iha Timor-Leste, tuir sensu rua ne’ebé hala’o tiha ona iha tinan 2004 no tinan 2010.
Lansamentu ofisiál Sensu Nasionál Populasaun no Uma-Kain Timor-Leste nian tinan 2015 nian, hala’o iha loron 8 fulan-juñu, iha Palásiu Governu nian, no konta ho prezensa husi Prezidente Repúblika, Taur Matan Ruak, no Primeiru-Ministru, Rui Maria de Araújo.
Sensu sira hala’o ho objetivu atu rekolla informasaun kona-ba aspetu sira hanesan kompozisaun populasaun nian, nível saúde no edukasaun nian, taxa mortalidade no nível moris-kiak nian, empregu, agrikultura, bee no saneamentu, eletrisidade, no seluseluk tan.
Sensu tinan 2015 nian, Diresaun-Jerál Estatístika Ministériu Finansas nian maka prepara hela, liuhusi kolaborasaun ho Fundu Nasoins Unidas nian ba Populasaun (FNUAP) no ho organizasaun ONU nian ba Feto.
