Sorumutuk Konsellu Ministrus loron 26 fulan-marsu tinan 2015
Prezidénsia Konsellu Ministrus
VI Governu Konstitusionál
..............................................................................................................................
Díli, Loron 26 Fulan-marsu Tinan 2015
Komunikadu Imprensa
Sorumutu Konsellu Ministrus nian iha loron 26 fulan-marsu tinan 2015
Konsellu Ministrus hala’o sorumutu iha kinta ne’e, loron 26 fulan-marsu tinan 2015, iha sala sorumutu Konsellu Ministrus nian, iha Palásiu Governu, iha Dili, no aprova:
1. Rezolusaun Governu nian ne’ebé aprova tulun osan ba vítima sira husi siklone Pam iha Vanuatu
Konsellu Ministrus aprova ona doasaun donativu ida ho montante 1.000.000 (dolar millaun ida) atu tulun vítima sira husi siklone Pam, ne’ebé mosu hodi halo estragu arkipélagu Vanuatu nian, ho abitante rihun 275.
Siklone ne’e, tama iha kategoria 5, ho anin ne’ebé huu ho nia lalais 300 km/oras, konsideradu hanesan siklone forte liuhotu ne’ebé afeta illa sira Pasífiku nian. Kurakuran iha ema na’in sanulu resin ida maka mate no rihun ba rihun maka lakon sira nia hela-fatin, no ba dadaun ne’e seidauk bele halo avaliasaun kona-ba estragu loloos ne’ebé iha. Illa balun izolada nafatin tanba komunikasaun kotu. Parte barakliu husi territóriu ne’e kontinua la iha asesu ba enerjia eletétrika, bee moos no sustentu, ne’ebé bele hamosu risku ba saúde públika.
Atu fó sai mós katak Prezidente Vanuatu nian iha lasu amizade nian ne’ebé espesiál ho Timor-Leste, no sai ona hanesan defensór barani povu timoroan nian iha funu ba ukun sarik an nian.
2. Rezolusaun Governu nian ne’ebé aprova atu fó rai ba Santa Sé
Diploma ida ne’e tranzmite ba Santa Sé, direitu atu hetan rai ne’ebé besik igreja Motael nian, iha Dili.
Rai ne’e, Dioseze Dili nian maka husu ba Ministériu Justisa atu Igreja Katólika Timor-Leste nian bele harii edifísiu ida ne’ebé natoon ba vizita husi Santu Padre nian ne’ebé iha posibilidade atu halo ba nasaun ne’e.
3. Dekretu-lei ne’ebé arova Rejime Jurídiku kona-ba Kontratu Serbisu nian tuir Tempu Determinadu iha Administrasaun Públika
Rejime Jurídiku ida ne’e kria bazeia ba nesesidade atu garante katak kontratu serbisu nian tuir tempu determinadu ne’ebé Administrasaun Públika asina, la’o tuir prinsípiu kustu-benefísiu ne’ebé tenke orienta jestaun públika ida ne’ebé efisiente, no asegura produtividade no kualidade husi servisu sira.
Diploma ida ne’e estabelese norma no prosedimentu padraun sira ba rekrutamentu, remunerasaun no jestaun kona-ba kontratu sira no kona-ba dezempeñu husi serbisu-na’in sira ne’ebé Administrasaun Públika kontrata, ho objetivu atu haforsa no hametin nia no iha tempu ne’ebé hanesan asegura jestaun rekursus finanseirus ne’ebé di’ak ne’ebé aloka ona ba nia.
4. Dekretu-Lei ne’ebé mak aprova tulun kustu ba dezlokasaun atu halo Servisu ba Estranjeiru
Diploma ida ne’e hetan aprovasaun husi Governu Konstitusionál V, iha sorumutu Konsellu Ministrus nian iha loron 19 fulan dezembru nian 2014. Tanba Prezidente Repúblika seidauk promulga, presiza duni atu Governu Konstitusionál VI aprova fila-fali.
Atu fó hanoin fila-fali katak Dekretu-Lei ne’e, altera montante hirak ne’ebé mak atribui, hanesan ajuda kustu loroloron nian, ba funsionáriu públiku no titulár sira no membru sira órgaun soberanian nian ba dezlokasaun ba estranjeiru atu hala’o serbisu Estadu nian, ba osan hirak ne’ebé sira ne’e gasta ba alojamentu, hahán, transporte, telefone, fase roupa no seluk tan ne’ebé mak iha ligasaun ho sira nia estadia ne’e.
Mudansa ida ne’e ninia objetivu atu ajusta valór ne’ebé atribui tuir valór ne’ebé mak organizasaun internasionál sira pratika, liuliu Nasoins Unidas nian.
Destaka mós limitasaun direitu ba pasajen ho aviaun iha klase ezekutiva nian ba viajen ho durasaun oras tolu ka oras tolu ba leten.
5. Dekretu-Lei ne’ebé aprova profisionál jestaun finansas públikas sira ninia kompeténsia sira
Diploma ida ne’e hetan aprovasaun husi Governu Konstitusionál V, iha sorumutu Konsellu Ministrus nian iha loron 19 fulan-dezembru tinan 2014. Tanba Prezidente Repúblika la promulga, presiza duni atu Governu Konstitusionál VI aprova fila-fali.
Atu fó hanoin katak Dekretu-Lei ne’e, determina sa’ida de’it maka sai hanesan profisionál sira jestaun finansas públikas ninia kompeténsia tuir sira-nia esperiénsia serbisu nian no fahe tuir ninia grau husi ezijénsia dezempeñu nian. Definisaun ne’ebé klaru kona-ba kompeténsia jenérika no téknika sira ne’e sei permite aprofundamentu ida ne’ebé adekuadu ba konteúdu hirak ne’ebé atu sujeita ba ezame ka ba eskolla ne’ebé atu halo tuirmai ba atividade formasaun nian ne’ebé indika ona. Atu fó hanoin fila-fali de’it katak iha fulan abríl ida liubá, Konsellu Ministrus estebelese ona atu halo ezame ida kona-ba Finansas Públikas ba fusionáriu, ajente no dirijente sira ne’ebé iha kompeténsia iha área jestaun finansas públikas nian, atu avalia sira-nia frakeza no propoin asaun kapasitasaun nian sira ne’ebé atu fó tuirmai.
Dekretu-lei ne’e inklui mós regra konduta nian sira ne’ebé aplika ba profisionál sira ne’e, atubele orienta dezempeñu kona-ba kompeténsia hirak ne’ebé fó ona.
6. Proposta lei kona-ba resenseamentu jerál kona-ba populasaun no uma-kain
Proposta Lei ida kona-ba tema ne’e hetan ona aprovasaun husi Governu Konstitusionál V, iha sorumutu Konsellu Ministrus nian iha loron 25 fulan-marsu tinan 2014, no haruka tiha ona ba Parlamentu Nasionál atu bele halo diskusaun no votasaun. Tanba Parlamentu Nasionál Nasionál seidauk halo apresiasaun, no tanba Governu simu tiha ona pose, tuir Konstituisaun, tenke halo aprovasaun ba proposta foun husi Governu VI.
Fó hanoin fila-fali katak, tuir norma, Diploma ida ne’e enkuadra realizasaun periódika sensus nian hodi determina entidade hirak ne’ebé sai hanesan responsavel ba ninia ezekusaun, prosedimentu sira ba finansiamentu no mekanizmu sira ne’ebé garante salvaguarda konfidensialidade husi informasaun ne’ebé halibur ona.
7. Rezolusaun Governu nian ne’ebé aprova nomeasaun Komandante PNTL nian
Konsellu Ministrus aprova ona proposta husi Ministru Interiór, ne’ebé sai hanesan responsavel ba área seguransa nian, no hafoin simu paresér husi Konsellu Superiór Polísia nian, ba Komando Polísia Nasionál Timo-Leste (PNTL).
Nune’e maka nomeia ona Superintendente-Xefe Júlio da Costa Hornay atu hala’o knaar nu’udar Komandante-Jerál PNTL nian, ho postu Komisáriu nian, ho komisaun servisu nian ba tinan haat.
Iha tempu ne’ebé hanesan, nomeia ona mós Superintendente-Xefe Faustino da Costa atu hala’o knaar hanesan 2.u Komandante-Jerál PNTL nian, ho postu Komisáriu nian, ho komisaun servisu nian ba tinan haat.
8. Alterasaun daruak ba Dekretu-Lei n.u 8/2011, loron 16 fulan-marsu, ne’ebé regulamenta Fundu Infraestrutura nian
Alterasaun ida ne’e atualiza kompozisaun Konsellu Administrasaun Fundu Infraestrutura nian tuir orgánika orgánika Governu agora nian.
9. Alterasaun dahuluk ba Dekretu-Lei n.u 12/2011, loron 23 fulan-marsu, ne’ebé regulamente Fundu Dezenvolvimentu Kapitál Umanu
Alterasaun ida ne’e atualiza kompozisaun Konsellu Administrasaun Fundu Infraestrutura nian tuir estrutura orgánika Governu agora nian.
