Governu Timor-Leste

Ministériu Justisa lansa peskiza Planu Asaun Nasionál direitu umanu iha Dili, iha finál fulan Setembru (loron 25) 2014, atu sai hanesan matadalan ba sidadaun no instituisaun hotu, bainhira ko’alia kona-ba direitu umanu iha Timor-Leste.

Ministru Justisa Dionísio Babo iha opurtunidade ne’e hateten, durante ne’e Timor-Leste ratifika ona konvesaun internasionál kona-ba Direitu Umanu. Kontituisaun RDTL nós garanti kona-ba direitu umanu. Maibé Estadu Timor-Leste rasik laiha giaun atu adere ba ka haree kona-ba direitu umanu, atu bele atinji direitu ne’ebé di’ak no justu.

“Durante ne’e instituisaun estadu iha hanoin la hanesan. Tanba ne’e, liuhusi estabelesimentu planu asaun nasionál ne’e, hotu-hotu konkorda sai referénsia direitus umanu iha Timor-Leste, hodi adere ba prinsípiu Direitu umanu Universiais,” nia esplika tan.

Maske nune’e, nia hatutan, problema diretu umanu la’ós de’it problema Governu nian, maibé estadu no timor-oan tomak.

Iha fatin hanesan, Primeiru-Ministru interinu, Fernando La Sama de Araújo hatene, planu estratéjiku dezemvolvimentu nasionál mós sai dokumentu direitu umanu ida, liuhusi planu hametin aihan atu halakon ki’ak. Alemde ne’e, direitu umanu mós inklui direitu ba kultura, sosiál no seluk tán.

Planu peskiza ba Direitu Umanu sei involve sosiedade sivíl, Igreja, Governu no institusaun hotu ne’ebé eziste iha nasaun Timor-Leste. Partisipa mós iha Lansamentu ne’e, Membru Governu balun, reprezentante korpu Diplomátiku no konvidadu sira seluk.