Governu Timor-Leste

Prezidénsia Konsellu Ministrus

V Governu Konstitusionál

..............................................................................................................................

Díli, Loron 12 Fulan Agostu Tinan 2014

Komunikadu Imprensa

Sorumutuk Konsellu-Ministrus nian iha loron 12 fulan-Agostu tinan 2014

Governu sorumutu iha loron-tersa ne’e, loron 12 fulan-Agostu tinan 2014, iha sala sorumutuk Konsellu Ministrus nian, iha Palásiu Governu, Dili, no aprova ona:

1. Rezolusaun Governu nian ne’ebé aprova reforsu apoiu ba Guiné-Bissau hodi garante funsionamentu normál instituisaun sira Estadu nian

Iha sekuénsia apoiu ativu ne’ebé daudaun ne’e Timor-Leste fó ba Guiné-Bissau, iha prosesu normalizasaun vida polítika no institusionál nian no harii klima dame no estabilidade nian ida iha rai ne’e, Governu Repúblika Demokrátika Timor-Leste hakotu atu kontribui saláriu fulan ida ba funsionáriu públiku sira Guiné nian, ho montante dólar  norte amerikanu millaun rihun neen. Apoiu finanseira ida-ne’e asegura ona liuhosi haruku relatóriu ida kona-ba implementasaun transferénsia nian.

Desizaun ida ne’e foti tanba solidariedade ho país membru CPLP ne’e, no ninia objetivu katak pagamentu saláriu ba funsaun públika reflete iha estratéjia Guiné-Bissau nian ba governasaun di’ak no ba manutensaun pás no estabilidade nasionál nian.

2. Rezolusaun Governu nian kona-ba jestaun kabu fibra-ótika

Diploma ne’e fó responsabilidade jestaun kabu fibra-ótika ne’ebé daudaun liga ona ba torre liña transmisaun EDTL (Eletrisidade Timor-Leste)nian, hanesan mós nia uzu no esplorasaun ba Ministériu Transportes no Komunikasaun.

Haree fali katak Ministériu Transportes no Komunikasaun iha ninia atribuisaun sira mak atu dezenvolve no regulamenta atividade komunikasaun sira no hadi’a di’ak liután meiu sira komunikasaun nian, ikusmai, liuhosi Diresaun-Jerál Transporte no Komunikasaun nian sira, hadi’a rede informátika sira komunikasaun nian, tanba nia maka responsável ba-iha área telekomunikasaun sira.