Governu Timor-Leste

Governu, (Ministru, Sekretáriu Estadu, Diretór-Jerál no Diretór Nasionál sira), Instituisaun Estadu nian no reprezentante sira husi setór privadu, hala’o sorumutuk iha loron tolu nia laran – husi loron 4 to’o loron 6 fulan-Agostu – iha Sentru Konvensaun Dili, atu, hamutuk, partisipa iha “Sorumutuk nasionál nian: identifika problema sira no buka nia solusaun”.

Grupu servisu oinoin identifika no reflete dezafiu hirak ne’ebé Estadu hasoru, iha nivel funsionamentu internu nian, ho objetivu atu hato’o solusaun sira ne’ebé bele hasa’e tan dezempeñu Ezekutivu, instituisaun no, konsekuentemente, nasaun nian, hodi aselera prosesu dezenvolvimentu no progresu ne’ebé nasaun rejista ona to’o iha tinan hirak ikus ne’e.

Iha sorumutuk ne’e nia rohan hotu-hotu halo kompromisu ida, kompostu husi pontu sanulu (Kompromisu: 10 Mandamentus).

Iha konsensu jerál ida kona-ba nesesidade atu hadi’a no intensifika koordenasaun ministeriál no interministeriál hodi implementa Vizaun, Planu no Asaun ne’ebé maka Matriz PED nian define ona.

Setór emprezariál nasionál nian halo kompromisu atu hasa’e tan ninia kapasitasaun no asegura kualidade husi projetu sira ne’ebé Estadu adjudika.

Governu halo kompromisu atu kria ekipa ida hodi  analiza lei sira, atu labele iha duplikasaun no atu asegura katak lei hirak ne’e orientada duni ba dezenvolvimentu nasaun nian, hodi kompromete mós atu kria ekipa ida atu monitoriza ezekusaun orsamentál.

Sorumutuk nasionál ida-ne’e hala’o liu loron baluk de’it depoizde Sorumutuk anuál Parseiru Dezenvolvimentu Timor-Leste nian sira, iha ne’ebé  halo aprovasaun ba Matriz PED – ferramenta ida atu impulsiona no garante implementasaun husi polítika ne’ebé estabelese ona iha Planu Estratéjiku Dezenvolvimentu 2011-2030 nian.