Timor-Leste simu ITIE husi Mozambique
Delegasaun EITI Mozambique sei halao visita ofisial mai Timor-Leste iha loron 29 de Jullu tinan ne’e ho objectivu hakarak fahe esperiensia ho EITI Timor-Leste iha ambitu implementasaun no prosesu aprendida kona ba padraun foun EITI no sira mos konsidera katak, realidade, Timor-Leste nudar nasaun ida ne’ebe koalia lian Portugues ho nia estatuta hanesan nasaun kumpridor iha ona esperiensia barak kona ba prosesu implementasaun ba prinsipiu EITI nian.
Delegasaun ne’e kompostu husi Koordenador Nasional EITI Mozambique, Milagre Celestino Langa, Alice Tibana, Helder dos Santos Sindique, Vilela de Sousa no Camilo Nhancale.
Durante iha Timor-Leste, Koordenador Sekretariadu EITI Mozambique ho ninia komitiva sei hasoru malu ho Ministru Petroleu e Rekursu Minerais, Diresaun Nasionál Reseitas Petroliferu e Minerais husi Ministériu Finansas, Industria, Sosiedade Sivíl, KKFP, TIMOR GAP no ONG’s. Alen de enkontru ho instituisaun hirak ne’e, sei halo site visit ba Projeto KAITEU no Olio Pezado Hera.
Relasiona ho visita ne’e, Ministru Petroleu e Recursos Minerais Alfredo Pires ne’ebe asumi kargu hanesan membru Board reprezenta rejiaun ASIA PASIFIKU iha EITI internasional, hato’o laran haksolok hodi simu delegasaun ne’e.
"Ho haksolok Timor-Leste simu delegasaun EITI Mozambique ne’ebe mai atu kompartilla esperiensia Timor-Leste nian konaba prosesu EITI to designada. Nee hatudu katak ita nia rai sai ona referensia ka modelu ba rai sira seluk. Timor-Leste pronto atu simu rai ne’ebé deit hakarak implimenta EITI ba boa governasaun iha area rekursu naturais. Tamba dadaun ne’e Timor-Leste mak lidera hela CPLP, entaun ita iha dever ida atu ajuda ita nia membru CPLP sira seluk hanesan Mozambique."
Iha okaziaun ne’e, delegasaun ne’e mos sei halo intrevista ho komunidade sira kona ba impaktu no benefisiu husi Transparénsia ne’e rasik.
Tuir agenda, delegasaun Mozambique sei remata sira nia visita iha Timor-Leste iha loron 02 de Agostu.
