Governu Timor-Leste

Bainhira to’o iha aeroportu São Tomé e Príncipe nian, nasaun daneen ne’ebé Primeiru-Ministru vizita iha ninia viajen hadulas rai, Kay Rala Xanana Gusmão, simu husi ninia omólogu Grabriel Costa, no husi membru Governu sira seluk.

Bainhira tama ba iha sidade laran, komunidade são Tomé nian simu ho laran haksolok tebes.

Iha loron 4 fulan Juñu nian, Primeiru-Ministru hasoru malu ho nia omólogu husi São Tomé e Prícipe no mós ho Ministra Negósiu Estranjeiru, Kooperasaun no Komunidade. Iha sorumutuk ida ne’e Xefe Governu rua ne’e ko’alia kona-ba área foun kooperasaun nian entre Timor-Leste no São Tomé e Príncipe, ne’ebé tenke hakle’an tan iha sorumutuk bilaterál ketak iha Simeira CPLP nian, iha fulan Jullu, iha Dili.

Iha lorokraik, Primeiru-Ministru kontinua ho sorumutuk ida ho Ministra Justisa, Edite Ramos da Costa Ten Jua, ne’ebé foin dadauk ne’e vizita Timor-Leste.

Iha kalan, delegasaun Timor-Leste nian partisipa iha han-hamutuk ida ne’ebé oferese husi Primeiru-Ministru São Tomé e Príncipe, ho intervensaun husi lider rua ne’e.

Iha dadeersan husi loron daruak vizita ida ne’e nian, molok hakat ba Guiné Bissau, Primeiru-Ministru kontinua hala’o sorumutuk lubuk ida. Ida uluk halo ho ninia omólogu, ne’ebé substitui Ministru Finansas nian, Hélio de Almeida, ne’ebé iha hela nasaun seluk. Iha sorumutk ida ne’e sira ko’alia kona-ba koopeerasaun ne’ebé atu halo iha área finansas nian iha tempu oin mai, liuliu iha sistema jestaun finanseira nian sira, iha kuadru kooperasaun entre nasaun frájil sira.  Sira mós temi kona-ba adezaun São Tomé e Príncipe nian ba g7+, iha ámbitu ida ne’ebé nasaun frájil sira ne’e tenke realiza avaliasaun ida kona-ba frajilidade.

Hafoin sorumutuk ida ne’e, Primeiru-Ministru halo vizita ba Kuartél-jenerál Forsa Armada São Tomé e Príncipe nian.

Sorumutuk ofisiál ikusliu husi vizita servisu nian ida ne’e maka sorumutuk ho Prezidente São Tomé e Príncipe nian, Manuel Pinto da Costa, iha ne’ebé Primemiru-Ministru entrega surat konvite ba Simeira Dili, hodi Timor-Leste nia naran.

Atu haree fotografia sira kona-ba vizita serbisu ne’e ba São Tomé e Príncipe, klike iha ne’e.