Sorumutuk Konsellu Ministrus nian iha loron 20 fulan-dezembru tinan 2016
Prezidénsia Konsellu Ministrus
VI Governu Konstitusionál
..............................................................................................................................
Díli, loron 20 fulan-dezembru tinan 2016
Komunikadu Imprensa
Sorumutuk Konsellu Ministrus nian iha loron 20 fulan-dezembru tinan 2016
Konsellu Ministrus hala’o sorumutuk iha tersa ne’e no, nu’udar kontinuasaun husi aprezentasaun ne’ebé Ministru Estadu, Koordenadór Asuntu Ekonómiku no Ministru Agrikultura no Peskas halo ona iha sorumutuk Konsellu Ministrus nian iha loron 13 fulan-dezembru tinan 2016, halo aprovasaun ba proposta lei kona-ba arbitrajen, mediasaun no konsiliasaun iha konflitu komersiál sira, ne’ebé fó dalan ba rezolusaun alternativa ida ba tribunál sira.
Konsellu Ministrus aprova ona proposta dekretu husi Ministériu Edukasaun kona-ba subsídiu ba membru sira husi Komisaun Instaladora Institutu Politékniku Betanu (KIIPB), estabelesimentu públiku Ensinu Tékniku nian dahuluk. Kriasaun institutu ne’e nian sei fó oportunidade ensinu superiór nian ne’ebé boot liután iha área sira ne’ebé importante ba fortalesimentu ekonomia no progresu tékniku no sientífiku.
Ministériu Administrasaun Estatál (MAE) ninia dekretu kona-ba sistema jestaun resíduu sólidu urbanu sira hetan ona aprovasaun husi Konsellu Ministrus – realidade hatudu katak kreximentu populasaun Dili nian ne’ebé lalais tebes ezije atu kria regra no prinsípiu lubun ida iha área ida ne’e.
Organizasaun norte-amerikana International Republican Institute (IRI) – ne’ebé lidera husi Senadór John McCain – aprezenta ona rezultadu ida husi inkéritu nasionál kona-ba opiniaun públika iha Timor-Leste, ne’ebé maka hala’o iha momentu tolu ne’ebé la hanesan: iha tinan 2008, 2013 no 2016. Informasaun sira ne’ebé hakerek iha relatóriu ne’e, trata tuir metodolojia internasionál sira kona-ba investigasaun sosiál no kona-ba merkadu. Lojístika informátika husi inkéritu ne’e asegura husi INSIGHT Inc., ho monitorizasaun husi empreza peskiza nian kona-ba opiniaun públika Chesapeake Beach Consulting no husi IRI.
Ministériu Administrasaun Estatál aprezenta ona proposta dekretu-lei ida kona-ba orgánika Institutu Nasionál Administrasaun Públika (INAP) nian, servisu autónomu MAE nian ne’ebé iha misaun atu promove dezenvolvimentu no kualifikasaun rekursu umanu sira Administrasaun Públika nian no, liu-liu, dezenvolvimentu kompeténsia jestaun nian sira husi dirijente no xefia sira Administrasaun Públika nian.
