Governu Timor-Leste

Ministru Petróleu no Rekursus Minerais, Francisco da Costa Monteiro, prezide, iha loron 3 fulan-abríl tinan 2025, iha Dili, reuniaun ida ho reprezentante sira hosi empreza Santos no Joint Venture hosi kampu petrolíferu Bayu Undan, ho objetivu atu analiza operasoins ne'ebé la'o hela, prioridade sira ba prazu badak nian no planeamentu ba faze tuirmai hosi projetu ne’e. Iha enkontru ne’e partisipa mós husi Prezidente Autoridade Nasionál Petróleu, Gualdino da Silva, no Prezidente Konsellu Administrasaun no Diretór Ezekutivu TIMOR GAP, E.P., Rui Soares, ne’ebé nia empreza públika kaer partisipasaun 16% iha joint venture ne’ebé temi ona.

Bayu Undan lokaliza iha Tasi Timor, besik kilómetru 250 hosi parte súl Dili nian, kampu Bayu Undan hahú produsaun iha tinan 2004. Empreza australiana Santos maka halo operasaun ba Bayu Undan, ne’ebé kaer partisipasaun 36,5% no mós halo parte iha joint venture SK E&S (21%), INPEX (9,6%), ENI (9,2%), Tokyo Timor Sea Resources (7,7%) no TIMOR GAP (16%).

Durante reuniaun, diskute kestaun sira relasiona ho estatutu operasaun sira ne'ebé la'o hela, kondisoins merkadu nian no aspetu komersiál estratéjiku sira, nomeadamente finál produsaun nian, oportunidade sira ba dezenvolvimentu adisionál iha kampu ne'e rasik no iha área sira ne'ebé besik, no mós potensiál esplorasaun rekursus nian hanesan deskoberta gás nian iha kampu Chuditch. 

Ministru Monteiro mós aprezenta vizaun preliminár Timor-Leste nian kona-ba abordajen dezenvolvimentu ne’ebé prefere, hodi reflete objetivu Governu nian atu asegura valór ba tempu naruk liuhosi utilizasaun estratéjika infraestrutura nian no aliñamentu ho meta dezenvolvimentu nasionál sira. 

Reuniaun ne’e termina ho kompromisu konjuntu atu mantein koordenasaun no diálogu tékniku kontínuu entre parte hotu-hotu ne’ebé envolve atu nune’e bele garante tranzisaun ida ne’ebé efetivu no dezenvolvimentu sustentável iha futuru ba kampu Bayu Undan.