Governu Submete Proposta Orsamentu Jerál Estadu 2026 ba Parlamentu Nasionál
Governu submete formalmente horisehik, loron 01 fulan-outubru tinan 2025, ba Parlamentu Nasionál Proposta kona-ba Orsamentu Jerál Estadu ba tinan 2026 (OJE 2026), ne’ebé aprova ona iha sorumutu estraordináriu Konsellu Ministrus nian ne’ebé hala’o iha loron 30 fulan-setembru.
Proposta ne’e entrega diretamente husi Primeiru-Ministru, Kay Rala Xanana Gusmão, ba Prezidente Parlamentu Nasionál, Maria Fernanda Lay, ne’ebé akompaña husi Ministra Finansas Santina José Rodrigues F. Viegas Cardoso, Vise-Ministra Finansas, Felícia Claudinanda Cruz Carvalho, Vise-Ministru Asuntus Parlamentares, Adéritu Hugo da Costa, no dirijente sira husi Ministériu Finansas. 
Orsamentu Jerál Estadu 2026 nia lema mak "Investe iha Transformasaun Nasionál, Integrasaun Rejionál no Dezenvolvimentu Inkluzivu", ne'ebé reflete Governu Konstitusionál IX nia vizaun atu hametin ekonomia nasionál no hadi'a prestasaun servisu públiku ba sidadaun sira.
Tetu orsamentál 2026, ho valór dolar amerikanu rihun 2,291, estabelese bazeia ba perspetiva makroekonómika no projesaun kreximentu sira, ne'ebé aumenta 4.3% ba iha Produtu Internu Brutu iha 2024 no 4.5% iha 2025 no 2026, ne'ebé impulsiona hosi konsumu uma-kain no ezekusaun investimentu públiku ne’ebé di’ak-liu.
Orsamentu Jerál Estadu ba tinan 2026 kontinua halo implementasaun ba Planu Estratéjiku Dezenvolvimentu 2011-2030 no Programa Governu Konstitusionál IX nian, hodi fó prioridade ba kapitál sosiál, ho investimentu sira iha sistema saúde, edukasaun no protesaun sosiál, atu hametin dezenvolvimentu umanu; infraestrutura, inklui estrada, eletrifikasaun, telekomunikasaun no fornesimentu bee-moos; diversifikasaun ekonómika, liuhosi apoiu ba agrikultura, peska, turizmu no dinamizasaun ba setór privadu; no mós fortalesimentu institusionál, ho foku ba reforma servisus públikus, jestaun finansas públikas, desentralizasaun no hadi’a governasaun.
