Sorumutuk Konsellu Ministrus nian iha loron 20 fulan-dezembru tinan 2023
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 20 fulan-dezembru tinan 2023
Konsellu Ministrus hala’o sorumutuk iha Palásiu Governu, Dili no, aprova projetu Dekretu-Lei, kona-ba Rejime direitus titulár no membrus órgaun soberania no titulár kargu polítiku sira nian.
Diploma ida-ne’e ho objetivu atu komplementa rejime sira ne’ebé hatuur ona iha Lei n. 7/2007, loron 25 fulan-jullu, no iha Lei n. 14/2009, loron 21 fulan-outubru, relasiona ho direitu titulár no membrus órgaun soberania no titulár kargu polítiku sira nian. Objetivu mak atu konsolida no halo norma sira ne’ebé daudaun ne’e vigora hela, sai komprensivel liután. Diploma ne’e abranje área oioin, inklui direitu ba rezidénsia ofisiál, subsídiu ba hela-fatin, komunikasaun movel, asisténsia médika, no seguransa pesoál.
Projetu Dekretu-Lei ida-ne'e aprova ona husi Governu Konstitusionál VIII iha Sorumutuk Konsellu Ministrus nian iha loron 15 fulan-marsu tinan 2023, maibe tamba diploma ne’e seidauk hetan promulgasaun, presiza submete fali projetu Dekretu-Lei ida-ne’e ba deliberasaun foun. REMATA
