Governu Timor-Leste

Primeiru-Ministru

Dr. Rui Maria de Araújo

Primeiru-Ministru iha ninia kompeténsia rasik no mós kompeténsia ne’ebé Konsellu Ministrus delega ba nia, nu’udar hatuur iha Konstituisaun no Lei.

Kompete, liuliu, ba Primeiru-Ministru atu xefia no prezide Konsellu Ministrus; dirije no orienta polítika jerál Governu nian no asaun governasaun nian hotu-hotu; reprezenta Governu no Konsellu Mininstrus iha ninia relasaun ho Prezidente Repúblika no Parlamentu Nasionál; orienta polítika jerál Governu nian iha nia relasaun sira ho nasaun seluk no reprezenta Governu relasiona ho CPLP no ASEAN; dirije no orienta polítika jerál Governu nian iha área defeza no seguransa no servisu intelijénsia nasionál; koordena Sistema Integradu Seguransa Nasionál; orienta polítika jerál Governu nian iha área jestaun finanseira, inklui setór bankáriu, sistema fiskál no investimentu Fundu Petróleu nian; nomeia, tuir prevee ona iha lei, advogadu hodi reprezenta Estadu, bainhira mosu problema sira iha tribunál - kazu litíjiu judisiál, ne’ebé maka nia hola parte ba; halo jestaun ba sistema teknolojia informasaun Governu nian no asegura prestasaun servisu sira iha sistema ne’e, nune’e mós implementa sistema informátika iha territóriu nasionál; koordena ho Autoridade Rejiaun Administrativa Espesiál Oekusi Ambenu, kona-ba autonomia administrativa Rejiaun ne’e nian.

Nu’udar xefe Governu, Primeiru-Ministru iha podér atu fó-sai diretiva sira ba naran membru Governu nian ida, nune’e mós foti desizaun kona-ba matéria hirak inklui iha área hirak ne’ebé pertense ba kualkér Ministériu ka Sekretaria Estadu ida, no mós, podér atu kria komisaun no grupu traballu nian sira, eventuál ka permanente, ba asuntu hirak ne’ebé sai nu’udar kompeténsia Governu nian.

Primeiru-Ministru mós ezerse podér hirak ne’ebé relasiona ho servisu, organizmu no atividade sira iha Prezidénsia Konsellu Ministrus nian ne’ebé seidauk fó ba membru Governu seluk iha Prezidénsia Konsellu Ministrus nia laran, no bele delega ba naran membru Governu nian ida, kompeténsia ida ne’e, nune’e mós kompeténsia ne’ebé fó ba nia tuir lei.

Depende diretamente ba Primeiru-Ministru maka servisu no organizmu sira tuirmai ne’e: Servisu Nasionál Intelijénsia, Konsellu ba Delimitasaun Definitiva Fronteira Tasi nian, Komisaun Funsaun Públika, AMRT-Arkivu no Muzeu Rezisténsia Timorense nian, Governu Eletróniku ITC (e-governmet) no Gabinete Apoiu ba Sosiedade Sivíl.

Primeiru-Ministru hetan tulun husi Ministru Estadu Prezidénsia Konsellu Ministrus; husi Ministru Estadu, Koordenadór Asuntu Sosiál; husi Ministru Estadu, Koordenadór Asuntu Ekonomia, no husi Ministru Estadu, Koordenadór Asuntu Administrasaun Estadu no Justisa.

Ministru Estadu no Prezidénsia Konsellu Ministrus

Agio Pereira

Ministru Estadu no Prezidénsia Konsellu Ministrus tulun Primeiru-Ministru iha Prezidénsia Konsellu Ministrus, koordenasaun Governu no hodi hala’o funsaun hirak hanesan Portavós Governu nian.

Ministru Estadu no Prezidénsia Konsellu Ministrus simu kompeténsia sira hanesan tuirmai ne’e: koordena preparasaun no organizasaun servisu governamentál nian, nune’e mós halo segimentu no avaliasaun ba desizaun sira ne’ebé foti husi Konsellu Ministrus no Primeiru-Ministru; koordena sorumutuk servisu sira husi Ministru Estadu no Koordenadór sira seluk iha área ida-idak nian ho Primeiru-Ministru halo avaliasaun hamutuk kona-ba knaar órgaun Governu nian oin-oin; koordena no halo reforma ba instituisaun governamentál sira, tuir desizaun ne’ebé foti husi Konsellu Ministrus no husi Primeiru-Ministru; koordena reforma setór judisiáriu nian; koordena apoiu no konsulta jurídika ba Konsellu Ministrus, Primeiru-Ministru, Ministru Estadu no membru Governu sira ne’ebé integra ba Prezidénsia Konsellu Ministrus.

Aleinde knaar hirak ne’ebé maka temi uluk ona, kompete mós ba Ministru Estadu no Prezidénsia Konsellu Ministrus knaar hirak tuirmai ne’e: koordena no sentraliza prosesu lejizlativu no regulamentár Governu nian; halo estudu kle’an kona-ba reforma lei sira, iha aspetu formál, uniformizasaun no armonizasaun lejizlativa, nune’e mós, iha avaliasaun ba nesesidade intervensaun governamentál ka Parlamentu Nasionál nian; promove prosedimentu lejizlativu ne’ebé modernu liuhusi rekursu ba instrumentu sira ‘e-government’, divulgasaun atividade no medida sira Governu nian no organiza forma no modu intervensaun públika ba prosedimentu lejizlativu ne’e; analiza no prepara projetu diploma legál no regulamentu sira Governu nian, liuhusi koordenasaun ho ministériu sira ne’ebé maka propoin projetu ne’e; asegura servisu hirak ne’ebé kontensiozu Prezidénsia Konsellu Ministrus nian; koordena reprezentasaun Estadu nian liuhusi mandatáriu (reprezentante) judisiál sira, tuir prosesu ne’ebé mak Estadu mós halo parte; liuhusi kolaborasaun ho ministériu tutela, hodi hatán ba prosesu fiskalizasaun konstitusionalidade no legalidade nian; asegura koordenasaun regulár ho Parlamentu Nasionál; tradús ka akompaña tradusaun diploma legál sira ka dokumentu sira seluk ne’ebé presiza ba asaun Konsellu Ministrus ka Primeiru-Ministru nian; reprezenta Konsellu Ministrus no Primeiru-Ministru, bainhira sira deside, iha komisaun espesiál sira ne’ebé kria tiha ona; propoin polítika no elabora lejizlasaun ne’ebé presiza iha área komunikasaun sosiál; ezerse tutela kona-ba órgaun sira Komunikasaun Sosiál Estadu; koordena diseminasaun informasaun kona-ba programa no asaun sira Governu nian no sai nu’udar Portavós ba Konsellu Ministrus;

Sira ne’ebé depende mós ba irarkia Ministru Estadu Prezidénsia Konsellu Ministrus nian maka Sekretáriu Estadu sira tuirmai ne’e; Sekretáriu Estadu Konsellu Ministrus; Sekretáriu Estadu Asuntu Parlamentár; Sekretáriu Estadu Komunikasaun Sosiál.

Ministru Estadu Prezidénsia Konsellu Ministrus, fó mós superintendénsia ba RTTL- Rádiu no Televizaun Timor-Leste, E.P no Gráfika Nasionál.

Ministru Estadu, Koordenadór Asuntu Sosiál no Ministru Edukasaun

António da Conceição

Ministru Estadu, Koordenadór Asuntu Sosiál, tulun Primeiru-Ministru hodi superviziona polítika jerál ba área sira governasaun nian ho karakter ida ne’ebé sosiál. Nia simu responsabilidade espesiál kona-ba servisu no atividade sira husi Ministériu Edukasaun, ne’ebé nia maka nu’udar Ministru, no mós, hosi Ministériu Saúde nian, Ministériu Solidariedade Sosiál, Sekretaria Estadu ba Apoiu no Promosaun Sósio-Ekonómika ba Feto, Sekretaria Estadu Juventude no Desportu; Komisaun Direitu Labarik, Kombatente Libertasaun Nasionál no Komisaun Kombate ba HIV-Sida.

Kompete ba Ministru Estadu, Koordenadór Asuntu Sosiál maka koordena preparasaun no organizasaun servisu governamentál nian iha área sosiál; akompaña no avalia servisu no prestasaun servisu Ministériu Edukasaun, Ministériu Saúde, Ministériu Solidariedade Sosiál, Sekretaria Estadu ba Apoiu no Promosaun Sosio-Ekonómiku Feto nian; Sekretaria Estadu Juventude no Desportu, Komisaun Direitu Labarik sira nian, Kombatente sira Libertasaun Nasionál nian no Komisaun Kombate HIV-Sida; propoin no dezenvolve polítika públika ho karakter sosiál ne’ebé kontribui hodi hadi’a prestasaun servisu sidadaun sira nian; asegura koordenasaun ho entidade relevante sira, ne’ebé kontribui ba dezenvolvimentu sosiál.

Ministru Estadu, Koordenadór Asuntu Sosiál, mós fó superintendénsia ba entidade sira tuirmai: Komisaun Nasionál Desportu (KND) no Komisaun Reguladora Arte Marsiál sira (KRAM).

Hanesan Ministru Edukasaun, ninia kompeténsia sira maka propoin no asegura polítika sira kona-ba edukasaun pré-eskolár no eskolár, inklui ensinu báziku no sekundáriu no integra modalidade espesiál edukasaun nian sira, hodi promove ensinu rekorrente (hanorin ema sira ne’ebé laiha oportunidade ba períodu normál ensinu nian) no aprendizajen iha moris tomak; partisipa iha definisaun no ezekusaun polítika kualifikasaun no formasaun profisionál nian; garante direitu edukasaun no asegura eskolaridade obrigatória, atubele promove inkluzaun no oportunidade ne’ebé hanesan; hodi reforsa kondisaun sira ensinu no aprendizajen nian, hodi kontribui ba kualifikasaun populasaun no aumenta susesu eskolár no empregu; define kurríkulu nasionál ba-iha nivel oioin ensinu no rejime avaliasaun alunu nian sira no aprova programa ensinu nian, nune’e mós hodi orienta ba ninia konkretizasaun; promove no jere dezenvolvimentu no rekualifikasaun parke eskolár estabelesimentu públiku nian sira hosi ensinu la’ós superiór, nune’e mós fó apoiu ba inisiativa sira iha ámbitu ensinu partikulár no kooperativa; dezenvolve medida polítika sira iha área ensinu superiór, siénsia no teknolojia nian, nune’e mós kona-ba organizasaun, finansiamentu, ezekusaun no avaliasaun; promove igualdade ba oportunidade hodi iha asesu ba ensinu superiór; promove dezenvolvimentu, modernizasaun, kualidade, kompetitividade no rekoñesimentu internasionál ba sistema sira ensinu superiór, sientífiku no teknolójiku sira; promove ligasaun entre instituisaun ensinu superiór, sientífiku no teknolójiku nian, no entre hirak ne’e no sistema produtivu; promove avaliasaun no inspesaun permanente husi estabelesimentu sira ensinu superiór, sientífiku no teknolójiku; promove avaliasaun ba profisionál sira edukasaun nian; halo planu ba sistema análize no monitórizasaun nian ida, atubele avalia rezultadu no impaktu sira husi polítika edukasaun no formasaun nian.

Universidade Nasionál Timor Lorosa’e, Institutu Nasionál Siénsia no Teknolojia nian, Komisaun Nasionál UNESCO, Institutu Nasionál Formasaun ba Dosente no Profisionál Edukasaun nian sira (INFORDEPE) no Ajénsia Nasionál ba Avaliasaun no Akreditasaun Akadémika (ANAAA) hetan tutela husi Ministru Edukasaun.

Ministériu Edukasaun mak órgaun sentrál Governu nian ne’ebé responsavel ba konsepsaun, ezekusaun, koordenasaun, no avaliasaun ba polítika, ne’ebé Konsellu Ministrus define no aprova ona ba área sira ensinu no kualifikasaun, nune’e mós ba área siénsia no teknolojia nian sira.

Ministru Estadu, Koordenadór Asuntu Ekonómiku no Ministru Agrikultura no Peska

Estanislau da Silva

Ministru Estadu, Koordenadór Asuntu Ekonómiku, tulun Primeiru-Ministru iha supervizaun ba polítika jerál kona-ba área governasaun nian sira, liuliu iha aspetu ekonomia nian. Kaer responsabilidade espesífiku iha servisu no atividade sira, no liuliu kona-ba prestasaun servisu sira, husi Ministériu Agrikultura no Peska nian, ne’ebé nia maka sai hanesan Ministru, no mós iha Ministériu Komérsiu no Indústria no Ambiente, iha Ministériu Turizmu, Artes no Kultura, husi Ministériu Obras Públikas, Transporte no Komunikasaun sira, husi Sekretaria Estadu ba Polítika Formasaun Profisionál no Empregu, husi indústria agro-pekuária no peskiza no husi Setór Kooperativu.

Delega ba Ministru Estadu, Koordenadór Asuntu Ekonómiku sira, kompeténsia hirak tuirmai: koordena preparasaun no organizasaun servisu Governu nian iha área ekonómika; akompaña no avalia servisu no prestasaun servisu hirak iha Ministériu Agrikultura no Peska, Ministériu Komérsiu no Indústria no Ambiente, Ministériu Turizmu, Artes no Kultura, Ministériu Obras Públikas, Transporte no Komunikasaun, Sekretaria Estadu ba Polítika Formasaun Profisionál no Empregu, indústria agro-pekuária no peskeira no iha Setór Kooperativu; propoin no dezenvolve polítika públika hirak ho aspetu ekonómiku ne’ebé bele kontribui hodi hadi’a prestasaun servisu ba sidadaun sira; propoin polítika sira, lejizlasaun no estabelese mekanizmu hirak ne’ebé relasiona ho promosaun investimentu privadu, nasionál no internasionál, hamutuk ho entidade relevante sira; promove dezenvolvimentu iha setór privadu nasionál no formula polítika no mekanizmu hirak kona-ba apoiu no insentivu sira ba dezenvolvimentu setór ne’e nian; promove diálogu ho setór privadu nasionál relasiona ho dezenvolvimentu país nian no kombate ba dezempregu; asegura koordenasaun ho entidade hirak relevante ne’ebé bele kontribui ba dezenvolvimentu ekonómiku.

Ministru Estadu, Koordenadór Asuntu Ekonómiku fó superintendénsia ba entidade hirak tuir mai: Sentru Nasionál ba Formasaun Profisionál no Empregu Tibar, Sentru Nasionál ba Formasaun Profisionál no Empregu Bekora, Institutu Nasionál ba Dezenvolvimentu Maundeobra, Inspesaun-Jerál Traballu, SERVE-Servisu Rejistu no Verifikasaun Emprezariál, Institutu Apoiu ba Dezenvolvimentu Emprezariál, AEI-Ajénsia Espesializada ba Investimentu, Banku Nasionál Komérsiu Timor-Leste, S.A., Institutu ba Peskiza, Dezenvolvimentu, Formasaun no Promosaun kona-ba Au nian, I.P.

Hala’o mós funsaun sira nu’udar Ministru Agrikultura no Peska nian, ne’ebé kompete ba nia hodi propoin polítika no elabora projetu hirak kona-ba regulamentasaun sira presiza ba-iha área hirak ne’ebé maka nia tutela ba; asegura implementasaun no kontinuidade iha programa sira kona-ba dezenvolvimentu rurál, hodi koordena ho Ministériu Komérsiu no Indústria no Ambiente, Ministériu Administrasaun Estatál no entidade Governu nian ne’ebé responsavel ba área formasaun profisionál no empregu; harii sentru apoiu tékniku ba agrikultór sira; jere ensinu tékniku agríkola; promove investigasaun agrária; kontrola bainhira uza rai hodi halo produsaun agropekuária; promove no fiskaliza saúde balada nian; promove indústria agropekuária no peska; promove no fiskaliza produsaun alimentár, inklui produsaun fini nian sira; jere Servisu Kuarentena; implementa sistema kooperativu iha produsaun no komersializasaun ba produsaun agríkola nian; hala’o estudu viabilidade hodi harii sistema sira kona-ba irrigasaun, armazena bee, nune’e mós hodi harii ninia instalasaun sira; koordena ho Ministériu Komérsiu no Indústria no Ambiente hodi jere rekursu florestál no basia idrográfika (tasi, bee-lihun no mota sira); promove produsaun ba planta industriál nian sira, hanesan kuda kafé; jere rekursu ídriku (rekursu bee nian, iha rai leten ka husi rai okos) sira ne’ebé destinadu ba agrikultura; kontrola, fiskaliza setór peska no akikultura (viveiru ikan ka marisku); estabelese mekanizmu kona-ba kolaborasaun no koordenasaun ho órgaun Governu sira seluk ne’ebé maka tutela ba-iha área hirak ne’ebé iha ligasaun ho ida ne’e; jere Parke Nasionál no Área Protejida sira; garante protesaun no konservasaun ba natureza no biodiversidade (animál sira no ai-horis oin-oin), hodi superviziona implementasaun polítika nohodi fiskaliza atividade sira ne’ebé bele estraga integridade fauna no flora nasionál, kolabora hamutuk ho entidade hirak ne’ebé iha relasaun ho ida ne’e.

Ministériu Agrikultura no Peska mak órgaun sentrál Governu nian ne’ebé responsavel ba konsepsaun, ezekusaun, koordenasaun no avalia polítika ne’ebé Konsellu Ministrus define no aprova ba área agrikultura, floresta, peska no pekuária nian.

Ministru Estadu, Koordenadór Asuntu Administrasaun Estadu no Justisa nian no Ministru Administrasaun Estatál

Dionísio Babo Soares

MinistruEstadu, Koordenadór Asuntu Administrasaun Estadu no Justisa nian, tulun Primeiru-Ministru hodi superviziona polítika jerál área governasaun nian ne’ebé relasiona ho administrasaun Estadu no Justisa.

Kaer responsabilidade espesífiku iha servisu no atividade sira, no buat hotu ne’ebé iha relasaun ba prestasaun servisu, husi Ministériu Administrasaun Estatál, ne’ebé nia maka Ministru, no mós, Ministériu Justisa, Sekretaria Estadu Fortalesimentu Institusionál, Desentralizasaun Administrativa, INAP-Institutu Nasionál Administrasaun Públika no Inspesaun-Jerál Estadu.

Ministru Estadu, Koordenadór Asuntu Administrasaun Estadu no Justisa, ninia kompeténsia sira maka koordena hodi prepara no organiza servisu Governu nian iha área jestaun administrasaun Estadu no Justisa; akompaña no halo avaliasaun ba servisu no prestasaun servisu sira hosi Ministériu Administrasaun Estatál, Ministériu Justisa, Sekretaria Estadu Fortalesimentu Institusionál, Desentralizasaun Administrativa, INAP-Institutu Nasionál Administrasaun Públika no Inspesaun-Jerál Estadu nian; propoin no dezenvolve polítika públika sira iha administrasaun Estadu, ne’ebé bele kontribui hodi hadi’a prestasaun servisu ba sidadaun sira; apoia formasaun no fó asisténsia nafatin ne’ebé bele lori to’o iha prosesu deskonsentrasaun no desentralizasaun administrativa, hodi koordena ho ministériu no instituisaun hirak ne’ebé maka relevante; promove dezburokratizasaun (halakon burokrasia) no dezenvolve kapasidade, transparénsia no efisiénsia iha servisu administrasaun Estadu nian; promove no superviziona entidade hirak ne’ebé responsavel ba formasaun no valorizasaun funsionáriu públiku sira; dezenvolve no implementa polítika ida kona-ba konsesaun bolsa estudu sira, ne’ebé bele fó dalan hodi kompete no transparente; asegura koordenasaun ho entidade hirak relevante ne’ebé bele kontribui ba dezenvolvimentu iha administrasaun públika.

Hanesan Ministru Administrasaun Estatál, nia iha kompeténsia atu: promove no kondús prosesu kona-ba desentralizasaun administrativa no kria órgaun no servisu hirak kona-ba Podér Lokál; apoia formasaun no fó nafatin asisténsia ne’ebé bele lori to’o ba-iha prosesu deskonsentrasaun no desentralizasaun administrativa, hodi koordena ho mós ministériu no entidade relevante sira seluk; koordena no fiskaliza atividade servisu hirak iha servisu perifériku Ministériu nian; estabelese no kria mekanizmu operasionál sira kona-ba kolaborasaun no koordenasaun ho órgaun Administrasaun Públika sira seluk hodi tutela ba-iha área hirak ne’ebé mak iha ligasaun ba ida ne’e; propoin polítika públika no inisiativa lejizlativa sira ne’ebé iha relasaun ho ninia área tutela sira; propoin no aplika lejizlasaun ba promosaun ijiene no orden públiku urbanu (sidade); propoin no aplika norma jurídika sira relasiona ho toponímia (fatin, estrada ka dalan nia naran); garante apoiu tékniku ba prosesu eleitorál no referendu nian sira; promove polítika hirak kona-ba dezenvolvimentu lokál no rurál, hodi hamenus dezigualdade ekonómika no sosiál sira, hodi koopera ho organizmu Governu nian sira seluk atu hala’o ida ne’e; estabelese no hala’o mekanizmu operasionál hirak kona-ba kolaborasaun no apoiu tékniku ba lideransa komunitária tradisonál sira; propoin no dezenvolve norma no instrusaun tékniku sira kona-ba klasifikasaun, tratamentu no arkivu ba dokumentu istóriku sira no dokumento Estadu nian sira; promove rekuperasaun, prezervasaun no rai didi’ak dokumentu istóriku sira no dokumentu Estadu nian sira.

Ministériu Administrasaun Estatál maka fó superintendénsia ba Sekretariadu Tékniku Administrasaun Eleitorál, Arkivu Nasionál no Institutu Nasionál Administrasaun Públika.

Ministériu Administrasaun Estatál mak órgaun sentrál Governu nian ne’ebé responsavel ba konsepsaun, ezekusaun, koordenasaun no avaliasaun politíka, ne’ebé Konsellu Ministrus define no aprova ba área podér lokál, desentralizasaun administrativa, organizasaun no ezekusaun prosesu eleisaun sira no konsulta populár, promosaun ijiene no organizasaun sidade no klasifikasaun no konservasaun ba dokumentu ofisiál sira ho valór istóriku.

Ministru Negósius Estranjeirus no Kooperasaun

Hernâni Coelho

Ministériu Negósius Estranjeirus no Kooperasaun mak órgaun sentrál Governu nian ne’ebé responsavel ba konsepsaun, ezekusaun, koordenasaun no avaliasaun ba polítika ne’ebé Konsellu Ministrus define no aprova ba área diplomasia no kooperasaun internasionál, funsaun konsulár sira no promosaun no defeza interese timoroan nian sira iha rai li’ur.

Ministru Negósiu Estranjeiru no Kooperasaun maka halo planu, propoin no hala’o polítika esterna Timor-Leste nian no garante ninia unidade no koerénsia; elabora projetu lejizlativu sira no regulamentasaun iha ninia área tutela nian sira; halo negosiasaun no propoin selebrasaun ba tratadu no akordu internasionál sira tuir prioridade polítika esterna Timor-Leste nian sira; promove interese Timor-Leste nian sira iha estranjeiru no asegura protesaun ba sidadaun timoroan sira iha rai li’ur; asegura reprezentasaun Timor-Leste nian iha Estadu no Organizasaun Internasionál sira seluk no jere rede embaixada, misaun, reprezentasaun permanente no temporáriu no postu konsulár sira, tuir prioridade polítika esterna nian sira; halo planu no hala’o preparasaun ba adezaun Timor-Leste nian ba Organizasaun Nasaun sira Sudeste Aziátiku nian (ASEAN) no asegura reprezentasaun país nian iha sorumutuk no atividade hirak ne’ebé iha relasaun ba ida ne’e; propoin no hala’o polítika kooperasaun internasionál, iha koordenasaun ho Ministériu Finansas no departamentu Governu nian sira ne’ebé kompetente; koordena, ho Ministériu Finansas no departamentu Governu nian sira seluk ne’ebé kompetente, kona-ba relasaun Timor-Leste nian ho parseiru dezenvolvimentu nian sira; hala’o funsaun hirak ne’ebé nia simu relasiona ho asuntu diplomasia ekonómika; estabelese mekanizmu kolaborasaun no koordenasaun nian ho órgaun Governu nian sira seluk ne’ebé fó tutela kona-ba área sira husi atividade hirak ne’ebé iha ligasaun ba malu.

Ministru Negósiu Estranjeiru no Kooperasaun kaer tutela mós ba-iha ACTL-Ajénsia Kooperasaun Timor-Leste nian.

Ministra Finansas

Santina Cardoso

Ministériu Finansas mak órgaun sentrál Governu nian ne’ebé responsavel ba konsepsaun, ezekusaun, koordenasaun no avaliasaun ba polítika ne’ebé Konsellu Ministrus define no aprova, ba área monitorizasaun anuál ba orsamentu no finansas.

Ministra Finansas iha nia kompeténsia hirak tuir mai ne’e: propoin polítika monetáriu no kámbiu nian sira liuhusi kolaborasaun ho Banku Sentrál; propoin polítika no elabora projetu hirak kona-ba regulamentasaun sira ne’ebé presiza iha matéria makroekonómiku, kona-ba reseita tributária no la’ós tributária sira, enkuadramentu orsamentál, kontabilidade públika, finansas públikas, auditoria no kontrolu tezouraria Estadu nian, emisaun no jestaun ba dívida públika; administra fundu petrolíferu Timor-Leste nian; koordena projetu no programa sira entre Timor-Leste no parseiru dezenvolvimentu sira, liuhusi ligasaun ho Ministériu Negósius Estranjeirus no Kooperasaun; jere dívida públika esterna, partisipasaun Estadu nian no parseria sira ba Dezenvolvimentu, hodi halo mós koordenasaun no definisaun ba aspetu finanseiru no fiskál; jere patrimóniu Estadu nian, ne’ebé la fó prejuízu ba atribuisaun sira Ministériu Justisa nian iha matéria kona-ba patrimóniu imobiliáriu; promove polítika jestaun bein movel Estadu nian sira, liuhusi kolaborasaun ho komponente entidade públika sira seluk; jere fornesimentu rikusoin hirak ne’ebé hola ona ba ministériu hotu-hotu; halo negosiasaun, asina no halo jestaun ba ezekusaun kontratu ba parseria públiku ka privadu sira, hodi tau matan ba ninia avaliasaun finanseira atuhodi fahe risku finanseiru ne’ebé adekuadu entre Estadu no parseiru privadu no sustentabilidade projetu ida-idak nian; promove kriasaun Banku Dezenvolvimentu Nasionál nian; elabora no publika kona-ba estatístika ofisiál sira; promove regulamentasaun ne’ebé presiza no halo kontrolu finanseiru ba despeza Orsamentu Jerál Estadu nian sira ne’ebé fó ba ministériu hotu-hotu, iha ámbitu atu hala’o polítika ida ho autonomia finanseira ne’ebé boot ba servisu sira; tau matan ba jestaun ne’ebé di’ak ba-iha finansiamentu hirak halo ona liuhusi Orsamentu Jerál Estadu nian, hosi órgaun administrasaun indireta Estadu nian no husi órgaun governasaun lokál sira, liuhusi auditoria no akompañamentu sira; koordena asisténsia téknika nasionál no internasionál iha área asesoria téknika órgaun Goveru nian sira, maibé la tama iha área formasaun rekursu umanu nian sira; dezenvolve sistema sira informasaun nian kona-ba jestaun finanseira iha servisu no organizmu hotu-hotu Administrasaun Públika nian hamutuk ho dezenvolvimentu ba prosesu e-government; estabelese mekanizmu kolaborasaun no koordenasaun nian ho órgaun Governu nian sira seluk ne’ebé fó tutela kona-ba área sira husi atividade hirak ne’ebé iha ligasaun ba malu.

Ministru Justisa

Ivo Valente

Ministériu Justisa mak órgaun sentrál Governu nian ne’ebé responsavel ba konsepsaun, ezekusaun, koordenasaun no avaliasaun ba polítika ne’ebé Konsellu Ministrus define no aprova, ba área justisa, rai no propriedade sira, direitu no direitus umanus.

Ministru Justisa kompete atu propoin polítika no elabora projetu sira kona-ba lejizlasaun no regulamentasaun hirak ne’ebé presiza ba área sira ne’ebé mak iha nia tutela; propoin medida sira kona-ba definisaun husi mekanizmu regulasaun justisa tradisionál nian sira no ninia interasaun ho sistema formál; propoin no hala’o medida sira kona-ba alargamentu mapa judisiáriu nian; propoin definisaun kona-ba polítika kriminál no tau-matan didi’ak ba ninia implementasaun no administrasaun di’ak justisa nian; regula no jere Sentru Formasaun Jurídika no formasaun rekursus umanus ba área atuasaun oin-oin husi setór justisa; regula no jere sistema prizaun nian, ezekusaun pena no servisu sira kona-ba reinsersaun sosiál; asegura mekanizmu hirak ne’ebé adekuadu kona-ba asesu ba direitu no ba tribunál sira, liuliu ba sidadaun hirak ne’ebé la hetan tulun, ba-iha informasaun jurídika no konsulta jurídika no mós apoiu judisiáriu, liuliu, liuhusi Defensoria Públika no mós entidade no estrutura Justisa nian sira seluk; kria no garante mekanizmu hirak adekuadu ne’ebé asegura direitu sidadania nian sira no promove divulgasaun kona-ba lei hirak ne’ebé iha vigór; organiza kartografia no kadastru kona-ba rai no uma sira no rejistu kona-ba bein imovel sira; asegura servisu espesializadu ida ba tradusaun jurídika ne’ebé sai responsável ba utilizasaun lian ofisiál sira iha área direitu no justisa nian, nu'udar medida promosaun nian ba direitu sidadaun sira nian; jere no fiskaliza sistema servisu no rejistu sira no notariadu; administra no halo jestaun ne’ebé loloos kona-ba patrimóniu imobiliáriu Estadu nian; promove no orienta formasaun jurídika ba karreira judisiál nian sira no mós funsionáriu públiku sira seluk; asegura relasaun sira iha planu internasionál kona-ba polítika justisa nian, liuliu ho Governu no organizasaun internasionál sira seluk, sein prejudika Ministériu Negósius Estranjeirus no Kooperasaun ninia kompeténsia rasik; estabelese mekanizmu kolaborasaun no koordenasaun nian ho órgaun Governu nian sira seluk ne’ebé fó tutela kona-ba área sira husi atividade hirak ne’ebé iha ligasaun ba malu.

Ministra Saúde

Maria do Céu Sarmento Pina da Costa

Ministériu Saúde mak órgaun sentrál Governu nian ne’ebé responsavel ba konsepsaun, ezekusaun, koordenasaun no avaliasaun ba polítika ne’ebé Konsellu Ministrus difine no aprova ba área saúde no atividade farmaseútika nian sira.

Kompete ba Ministra Saúde atu propoin polítika no elabora projetu sira kona-ba regulamentasaun ne’ebé presiza ba-iha área hirak ne’ebé iha ninia tutela; garante ba sidadaun hotu-hotu asesu ba-iha kuidadu saúde nian; koordena atividade sira kona-ba kontrolu epidemiolójiku nian; hala’o kontrolu sanitáriu ba produtu hirak ne’ebé bele fó influénsia ba saúde ema nian; promove formasaun ba profisionál saúde nian sira; kontribui ba susesu ba-iha asisténsia umanitária, promosaun pás, seguransa no dezenvolvimentu sosioekonómiku, liuhusi mekanizmu koordenasaun nian ho órgaun Governu nian sira seluk ne’ebé fó tutela kona-ba área hirak ne’ebé iha ligasaun.

Ospitál sira husi Servisu Nasionál Saúde nian no Servisu Autónomu Medikamentu no Ekipamentu Médiku nian sira, E.P (SAMES) servisu rua ne’e mak iha tutela Ministra Saúde nian.

Ministra Solidariedade Sosiál

Isabel Amaral Guterres

Ministériu Solidariedade Sosiál mak órgaun sentrál Governu nian ne’ebé responsavel ba konsepsaun, ezekusaun, koordenasaun no avaliasaun ba polítika, ne’ebé Konsellu Ministrus define no aprova ba área seguransa sosiál, asisténsia sosiál, dezastre naturál sira no reinsersaun komunitária.

Ministra Solidariedade Sosiál iha kompeténsia hirak mak tuir mai ne’e: kria no implementa sistema sira seguransa sosiál nian ba traballadór sira no populasaun sira seluk; dezenvolve programa sira kona-ba asisténsia sosiál no tulun umanitária ba sira ne’ebé presiza liu; propoin no dezenvolve polítika no estratéjia sira iha jestaun kona-ba risku dezastre nian sira; dezenvolve no implementa programa sira ba-iha jestaun risku dezastre nian sira, liuliu, iha edukasaun sívika, prevensaun, mitigasaun (hakmaan tiha susar ne’ebé hasoru), hatán ba emerjénsia no rekuperasaun hafoin dezastre; promove programa sira kona-ba dezmobilizasaun, reforma no pensaun hirak ne’ebé atu fó ba Kombatente Libertasaun Nasionál sira; fó akompañamentu ba veteranu no Kombatente Libertasaun Nasionál nian sira no ba sira ninia integridade iha sosiedade; fó akompañamentu, protesaun no reinsersaun komunitária ba grupu vulneravel sira seluk; estabelese mekanizmu kolaborasaun no koordenasaun nian ho órgaun Governu nian sira seluk ne’ebé fó tutela kona-ba área sira husi atividade hirak ne’ebé iha ligasaun ba malu.

Ministra Solidariedade Sosiál mak fó tutela no supeerintendénsia ba Sentru Nasionál Reabilitasaun nian.

Ministru Komérsiu, Indústria no Ambiente

Constâncio da Conceição Pinto

Ministériu Komérsiu, Indústria no Ambiente mak órgaun sentrál Governu nian ne’ebé responsavel ba konsepsaun, ezekusaun, koordenasaun no avaliasaun ba polítika ne’ebé Konsellu Ministrus define no aprova ba área atividade ekonómika, komersiál no industriál no atividade setór kooperativu nian, nune’e mós ho ambiente.

Ministériu Komérsiu Indústria no Ambiente iha kompeténsia sira tuirmai ne’e: propoin polítika sira no elabora projetu sira kona-ba regulamentasaun hirak ne’ebé presiza ba área hirak ne’ebé iha ninia tutela; kria, ezekuta no avalia polítika sira kona-ba komérsiu, indústria no ambiente; kontribui ba haburas atividade ekonómika, inklui ida ne’ebé temi kona-ba kompetisaun nasionál no internasionál; fó apoiu ba atividade ajente ekonómiku sira nian, hodi fó solusaun ida ne’ebé lalais no simples liután kona-ba regra prosesuál sira; apresia no fó lisensa ba projetu instalasaun nian sira no funsionamentu empriendimentu komersiál no industriál sira; halo inspesaun no fiskalizasaun ba atividade no empriendimentu komersiál no industriál sira, tuir lei hatete; mantein no administra sentru informasaun no dokumentasaun nian ida kona-ba empreza sira; propoin kualifikasaun no klasifikasaun kona-ba empriendimentu industriál sira, tuir lei ne’ebé aplika; promove dezenvolvimentu setór kooperativu nian, liuliu iha área rurál sira no iha setór agrikultura nian, iha koordenasaun ho Ministériu Agrikultura no Peska; fó sai kona-ba importánsia husi setór ekonómiku kooperativu nian no mós empreza sira mikro no ki’ik no promove formasaun kona-ba konstituisaun, organizasaun, jestaun no kontabilidade kooperativa no empreza ki’ik sira nian; organiza no administra kadastru kooperativa nian ida; organiza no administra rejistu kona-ba propriedade industriál; promove regra interna no internasionál sira kona-ba normalizasaun, metrolojia no kontrolu ba kualidade, ba padraun sira medida no unidade fízika nian; implementa polítika ambiente nian no halo avaliasaun kona-ba rezultadu hirak ne’ebé maka hetan; promove, akompaña no apoia estratéjia sira kona-ba integrasaun ambiente nian iha polítika setoriál sira; halo avaliasaun ambientál estratéjika kona-ba polítika, planu, programa no lejizlasaun no koordena prosesu avaliasaun nian kona-ba impaktu ba ambiente husi projetu sira iha nivel nasionál; asegura, tuir lisensiamentu ambientál nian, adosaun no fiskalizasaun kona-ba medida prevensaun nian sira no halo kontrolu integradu husi poluisaun ne’ebé afeta husi instalasaun hirak ne’e rasik.

Sentru Lojístika Nasionál nian, iha Ministru Komérsiu, Indústria no Ambiente nia tutela.

António da Conceição

Husi 16/02/2015 to'o 10/08/2016, loron ne'ebé nia simu pose hanesan Ministru Estadu, Koordenadór Asuntu Sosiál no Ministru Edukasaun.

Ministru Turizmu, Artes no Kultura

Francisco Kalbuady Lay

Ministériu Turizmu mak órgaun sentrál Governu nian ne’ebé responsavel ba konsepsaun, ezekusaun, koordenasaun no avaliasaun ba polítika ne’ebé Konsellu Ministrus define no aprova área turizmu, artes no kultura.

Kompete ba Ministru Turzimu, Artes no Kultura atu propoin polítika no elabora projetu sira kona-ba regulamentasaun sira ne’ebé presiza ba área hirak ne’ebé iha nia tutela: kria, ezekuta no avalia polítika kona-ba turizmu; kontribui ba haburas setór turizmu nian no propoin medida no polítika públika hirak ne’ebé relevante ba ninia dezenvolvimentu; fó apoiu ba emprezáriu sira husi setór turizmu nian, hodi fó prioridade ba solusaun hirak ne’ebé maka presiza atubele halo lisensiamentu sai simples no lalais liután; fó paresér inisiál kona-ba pedidu informasaun ba estabelesimentu empreza turístika sira; halo apresiasaun, fó lisensa ba projetu sira kona-ba instalasaun no halo fiskalizasaun ba funsionamentu husi empriendimentu turístiku sira; halo superintendénsia, inspesaun no fiskalizasaun ba jogu rekreativu sira no empriendimentu turístiku sira, tuir lei; halo atualizasaun no jestaun ba sentru informasaun no dokumentasaun nian ida kona-ba empreza no atividade sira husi setór turístiku; suspende ka revoga lisensa kona-ba ezersísiu atividade turístika sira, tuir lei; kualifika no klasifika empriendimentu turístiku sira, tuir lei ne’ebé aplikavel; elabora planu anuál atividade promosaun nian ba dezenvolvimentu turizmu nian ho ninia estimativa kona-ba folin; implementa no ezekuta lei kona-ba instalasaun, lisensiamentu no verifikasaun ba kondisaun funsionamentu husi ekipamentu turístiku nian sira; estabelese mekanizmu kolaborasaun nian ho servisu no organizmu Governu nian sira seluk ne’ebé fó tutela ba-iha área sira ne’ebé iha ligasaun, liuliu servisu hirak ne’ebé kompetente ba ordenamentu no dezenvolvimentu fíziku territóriu nian, ho intensaun atu promove zona estratéjika sira ba dezenvolvimentu turístiku nasionál; kolabora, ho organizmu no instutu públiku hirak ne’ebé kompetente, iha promosaun no divulgasaun Timor-Leste nian, ba investidór no operadór turísiku sira, hodi asegura divulgasaun kona-ba informasaun ne’ebé presiza; halo superintendénsia iha eventu turístiku no kulturál sira; elabora polítika no regulamentu sira ba konservasaun, protesaun no prezervasaun patrimóniu istóriku-kuluturál; propoin polítika sira kona-ba definisaun no dezenvolvimentu arte no kultura nian; estabelese polítika sira kona-ba kooperasaun no interkámbiu kulturál ho nasaun CPLP nian sira no mós organizasaun kulturál no nasaun sira iha rejiaun ne’e; estabelese polítika sira kona-ba kooperasaun ho UNESCO; promove kriasaun Bibilioteka Nasionál no Muzeu Nasionál; dezenvolve programa sira, iha koordenasaun ho Ministériu Edukasaun, ba introdusaun kona-ba edukasaun artístika no kultura iha ensinu Timor-Leste nian; promove indústria kriativa sira no kriasaun artístika iha Timor-Leste, iha ninia área oin-oin; garante prezervasaun ne’ebé adekuadu ba dokumentu ofisiál no istóriku sira; promove kriasaun Akademia Arte no Indústria Kriativa Kulturál sira Timor-Leste nian; proteje direitu hirak ne’ebé iha relasaun ho kriasaun artístika no literária.

Sentru Konvensaun Dili – CCD (sigla iha lian portugés); Prasa Restaurasaun/Food Courts (Metiaut); Sentru Turizmu no Informasaun Turístika, Unidade Implementasaun Akademia Arte nian, Kultura no Indústria Kriativa Kulturál no Komisaun Akompañamentu Akademia Arte, Kultura no Indústria Kriativa Kulturál iha tutela ba Ministériu Turizmu, Artes no Kultura.

Ministru Obras Públikas, Transportes no Komunikasaun

Gastão de Sousa

Ministériu Obras Públikas, Transportes no Komunikasaun mak órgaun sentrál Governu nian ne’ebé responsavel ba konsepsaun, ezekusaun, koordenasaun no avaliasaun ba polítika ne’ebé Konsellu Ministrus define no aprova ba área obras públikas, abitasaun, abastesimentu, distribuisaun no jestaun bee nian, saneamentu no eletrisidade, transporte no komunikasaun nian sira.

Kompete ba Ministériu Obras Públikas, Transporte no Komunikasaun atu: propoin no ezekuta liña polítika Ministériu nian iha área obras públikas, abitasaun, distribuisaun bee-moos, jestaun rekursus bee nian, saneamentu no eletrisidade; propoin no ezekuta liña polítika Ministériu nian iha área transporte no komunikasaun nian sira; asegura implementasaun no ezekusaun kuadru legál nian no regulamentadór ba atividade sira ne’ebé relasiona ho atividade sira ministériu nian; kria no implementa kuadru legál no regulamentár atividade konstrusaun sivíl no investigasaun kona-ba matériál sira konstrusaun nian; estuda no ezekuta obra protesaun, konservasaun no halo reparasaun ba ponte, estrada, mota no tasi ninin sira, liuliu halo kontrolu bainhira iha bee-nalihun; promove estudu no ezekusaun sistema foun rede infra-estrutura nian ne’ebé mak afeta ba distribuisaun bee no rekursu bee nian, nune’e mós ba saneamentu báziku, no fiskaliza ninia funsionamentu no esplorasaun, la fó prejuízu ba atribuisaun sira iha área hirak ne’e ba organizmu hirak seluk; halo koordenasaun no promove kualidade projetu fíziku sira ne’ebé Estadu ezekuta ona; promove realizasaun obra konstrusaun, konservesaun no reparasaun edifísiu públiku, monumentu no instalasaun sira ne’ebé espesiál, bainhira obra hirak ne’e legalmente hala’o ona; fó lisensa no fiskaliza konstrusaun urbanu hotu-hotu, liuliu partikulár sira, munisipál ka entidade autónoma sira, tuir lei ne’ebé aplika; promove aplikasaun ba norma téknika nian sira no regulamentasaun kona-ba materiál sira ne’ebé utiliza tiha ona iha konstrusaun sivíl, nune’e mós dezenvolve teste laboratoriál sira hodi bele garante seguransa konstrusaun nian; mantein no dezenvolve sistema informasaun nasionál ida no tau matan didi’ak kona-ba kondisaun obra sira no kona-ba materiál konstrusaun sivíl nian sira, inklui mós bee-nalihun iha infra-estrutura sira; asegura koordenasaun ba setór enerjétiku renovavel no halo estimativa hodi komplementa entre modelu oin-oin, nune’e mós ba ninia kompetisaun, atu nune’e bele haksolok kliente sira; halo koordenasaun hamutuk ho ministériu sira seluk, operadór sira iha área produsaun eletrisidade nian, tuir regra sira; estabelese mekanizmu kolaborasaun nian no koordenasaun ho órgaun sira seluk Governu nian ho tutela kona-ba área sira ne’ebé iha ligasaun; dezenvolve no halo regulamentu ba atividade komunikasaun nian nune’e mós hasa’e rendimentu meius komunikasaun nian; asegura koordenasaun iha setór transporte nian no halo estimativa kompletu tuir sira nia modu oin-oin, no mós ba ninia kompetisaun, atu nune’e bele fó ksolok boot liu ba kliente sira; promove jestaun, nune’e mós halo tuir norma téknika sira no regulamentu kona-ba uza servisu públiku sira komunikasaun nian; garante prestasaun servisu públiku telekomunikasaun nian sira, no uza espasu rádiuelétriku liuhusi empreza públika ka kria prestasaun servisu públiku ba entidade privadu sira; mantein no dezenvolve sistema nasionál informasaun nian no tau no halo vijilánsia meteorolójika (previzaun kona-ba tempu) no sismolójika (previzaun kona-ba rai nakdoko), inklui mós konstrusaun no manutensaun kona-ba ninia infraestrutura sira; promove no koordena investigasaun sientífíka no dezenvolvimentu teknolójiku iha área transporte terrestre, aeréu no marítimu nian sira karakter sivíl nian.

Iha tutela Ministru Obras Públikas nian, Transportes no Komunikasaun mak Administrasaun Portu sira Timor-Leste nian - APORTIL, Administrasaun Aeroportu no Navegasaun Aérea – ANATL E.P., Autoridade Aviasaun Sivíl Timor-Leste nian - AACTL, Autoridade Reguladór Telekomunikasaun nian – ARC no Institutu Jestaun Ekipamentu nian- (IGE-sigla iha lian portugés).

Ministru Petróleu no Rekursus Minerais

Alfredo Pires

Ministériu Petróleu no Rekursus Minerál mak órgaun sentrál Governu nian ne’ebé responsavel ba konsepsaun no ezekusaun polítika enerjétika no jestaun rekursu minerál sira, inklui petróleu no minériu estratéjiku hirak seluk, ne’ebé Konsellu Ministrus aprova ona, nune’e mós ba lisensa no regulasaun ba atividade estrativa, atividade industriál ba tratamentu petróleu no minerál sira, inklui petrokímika no refinasaun.

Ministru Petróleu no Rekursus Minerál ninia kompeténsia sira maka hanesan: elabora no propoin polítika no projetu lei sira setór ne’e nian; estabelese kona-ba sistema administrasaun no jestaun setóriál no regulamentár atividade sira setór ne’e nian; garante partisipasaun másima Timor-Leste nian ba-iha atividade setór petróleu no rekursus minerál sira liuhusi instrumentu jurídiku, administrativu no tékniku sira ne’ebé adekuadu; promove oportunidade nasionál sira ba-iha setór ne’e atu dada no hametin investimentu husi rai li’ur ne’ebé atribui ona ba nia; halo monitorizasaun ba implementasaun husi tratadu sira no akompaña ezekusaun setóriál husi instrumentu hirak ne’ebé relevante; orienta prosesu negósiu nian kona-ba modelu dezenvolvimentu kampu ‘Greater Sunrise’ nian ka matéria sira seluk ne’ebé iha relasaun ho ezersísiu jurisdisaun iha Tasi Timor, iha koordenasaun ho ministériu no entidade relevante sira seluk; koordena ezekusaun projetu ‘Tasi Mane’ no fó lisensa no halo monitorizasaun ba atividade sira ne’ebé dezenvolve tiha ona iha zona sira ne’ebé nia territóriu pertense ona ba projetu ‘Tasi Mane’; determina, tuir kondisaun jerál hirak ne’ebé prevee ona iha lei, termu kontratuál espesífiku sira kona-ba prospesaun no aproveitamentu rekursu petrolíferu no kona-ba lisensa sira esplorasaun mineira nian; asegura rezerva mínima ne’ebé mak obrigatóriu ba-iha kombustivel nian no nia fornesimentu regulár ba unidade públika hirak ne’ebé hala’o servisu produsaun enerjia nian; regula, autoriza no fiskaliza autoridade ‘downstream’ nian sira, liuliu esportasaun, transporte, armazenamentu, distribuisaun no komersializasaun, tuir grosu ka retallu, inklui importasaun, petróleu brutu nian, no produtu seluk ne’ebé maka mai husi petróleu no minerál; autoriza no fó lisensa ba juzante estrasaun nian, projetu indústria transformadora sira kona-ba prosesamentu, benefisiasaun, tratamentu, konversaun ka transformasaun petróleu brutu nian, no produtu hirak ne’ebé maka mai husi mina-rai no minerál sira, liuliu, refinaria sira, unidade likefasaun, gás ka petrokímika sira; aprova lisensa ambientál sira ba-iha setór petróleu no rekursu mineiru sira nian, fó atensaun liu ba kompleksidade no espesialidade téknika setór ne’e nian, iha koordenasaun ho entidade kompetente sira ba-iha área Ambiente nian; ezerse podér superintendénsia no tutela nian ba administrasaun indireta setór institusionál no emprezariál Estadu nian; dezenvolve koñesimentu no investigasaun estrutura jeolójika kona-ba rai no rai-okos sira no rekursu idrojeolójiku nasionál nian sira.

Iha tutela Ministru Petróleu no Rekursu Minerál nian sira, entidade sira tuirmai: Autoridade Nasionál Petróleu no Minerál nian; Timor Gap, EP; Institutu Petróleu no Jeolojia, IP; no Mina Timor nian, SA.

Ministru Defeza

Cirilo Cristóvão

Ministériu Defeza mak órgaun sentrál Governu nian nian ne’ebé responsavel ba konsepsaun, ezekusaun, koordenasaun no avaliasaun ba polítika ne’ebé Konsellu Ministrus define no aprova ba área defeza nasionál no kooperasaun militár nian.

Kompeténsia Ministru defeza nian maka hanesan: propoin no ezekuta polítika kona-ba komponente militár defeza nasionál nian; elabora projetu regulamentasaun nian ne’ebé presiza ba área Defeza nian; promove diplomasia estratéjiko-militár, hodi koordena no orienta atividade hirak tuir kompromisu militár sira ne’ebé asume iha ámbitu instrumentu sira direitu internasionál nian no akordu bilaterál no mós multilaterál sira, nune’e mós relasaun ho Estadu no organizmu internasionál nian sira ho karákter militár, la fó prejuízu ba atribuisaun sira Ministériu Negósiu Estranjeiru no Kooperasaun nian; asegura manutensaun relasaun nian iha área polítika Defeza nian ho nasaun sira seluk no organizasaun internasionál sira, la fó prejuízu ba atribuisaun sira husi Ministériu Negósiu Estranjeiru no Kooperasaun, iha ámbitu objetivu hirak ne’ebé fiksa tiha ona ba polítika esterna Timor nian; koordena no monitoriza, iha koordensaun ho Ministériu Negósiu Estranjeiru no Kooperasaun, asaun kooperasaun nian sira ne’ebé dezenvolve ona husi organizasun internasionál sira, Estadu sira ka forsa Defeza sira husi nasaun seluk iha apoiu ba dezenvolvimentu kona-ba área hirak ne’ebé iha sira nia tutela, iha ámbitu akordu internasionál sira ne’ebé temi tiha ona iha alínea uluk; administra no fiskaliza Forsa Defeza Timor-Leste nian; promove jestaun ne’ebé adekuada kona-ba meiu militár sira no mós akompaña no halo inspesaun ba ninia utilizasaun; ezerse tutela, administra no fiskaliza Autoridade Marítima; halo fiskalizasaun ba navegasaun marítima no aéreu ho fin militár sira nian no estabelese mekanizmu kolaborasaun no koordenasaun nian ho órgaun Governu nian sira seluk ne’ebé fó tutela kona-ba área sira husi atividade hirak ne’ebé iha ligasaun ba malu.

Iha tutela Ministru Defeza nian, mak Institutu Defeza Nasionál.

Ministru Interiór

Longuinhos Monteiro

Ministériu Interiór mak órgaun sentrál Governu nian ne’ebé responsavel ba konsepsaun, ezekusaun, koordenasaun no avaliasaun ba polítika ne’ebé Konsellu Ministrus define no aprova ba área seguransa interna migrasaun nian no kontrola fronteira sira, protesaun sivíl no kooperasaun polisiál.

Kompeténsia Ministru Interiór maka hanesan: propoin, koordena no ezekuta politíka kona-ba seguransa interna no protesaun sivíl; partisipa iha definisaun, koordenasaun no ezekusan polítika kona-ba seguransa nasionál; elabora projetu sira kona-ba regulamentasaun nian ne’ebé presiza ba área hirak ne’ebé nia fó tutela; ezerse tutela, administra no fiskaliza forsa no servisu seguransa Timor-Leste nian sira; Ezerse tutela, hodi administra no fiskaliza Autoridade Protesaun Sivíl, ne’ebé halo parte Korpu Bombeirus sira nian; garante no mantein orden no hakmatek ba públiku; asegura protesaun ba liberdade no seguransa ba ema no mós ba sira-nia sasán; tau-matan ba seguransa patrimóniu imobiliáriu no mobiliáriu Estadu nian; prevene no reprime kriminalidade; kontrola sirkulasaun pesoál sira iha fronteira, entrada, ema ne’ebé hela metin no nia hela fatin, ema sira ne’ebé sai husi territóriu nasionál ba fali rai estranjeiru; kontrola atividade sira importasaun, fabrikasaun, komersializasaun, lisensiamentu, detensaun no uza kilat, kilat-musan no esplozivu sira, maibé la prejudika atribuisaun rasik husi órgaun Governu sira seluk nian; regula, fiskaliza no kontrola ezersísiu atividade seguransa privadu nian; fiskaliza navegasaun marítima no aéreu ba fin sivíl nian; prevene akontesimentu hirak ne’ebé bele hamate ema no estraga sasán sira no dezastre hirak ne’ebé grave no fó protesaun no tulun populasaun sira ne’ebé hetan susar tanba inséndiu, inundasaun, rai-monu, rai-nakdoko no situasaun hotu-hotu ne’ebé tau sira iha risku; dezenvolve, liuhusi koordenasaun ho entidade kompetente sira seluk, programa sira kona-ba edukasaun sívika atu hasoru dezastre naturál sira, ka dezastre hirak seluk ne’ebé mosu tanba ema sira maka halo, hodi hametin solidariedade sosiál; koordena no monitoriza Konsellu Seguransa Munisípiu nian sira; promove dezenvolvimentu estratéjia nian kona-ba prevensaun, mediasaun no rezolusaun konflitu komunitáriu sira; promove meiu polísia nian sira ne’ebé adekuadu no akompaña no halo inspesaun ba ninia utilizasaun; asegura manutensaun relasaun sira iha área polítika seguransa interna nian ho nasaun no organizasaun internasionál sira seluk, maibé la prejudika atribuisaun hirak Ministériu Negósiu Estranjeiru no Kooperasaun ninian, ba-iha ámbitu husi objetivu hirak ne’ebé fiksa ona ba polítika esterna sira Timor nian; halo negosiasaun, ho orientasaun husi Prezidente Repúblika no Primeiru-Ministru no iha koordenasaun ho Ministériu Negósiu Estranjeiru no Kooperasaun, kona-ba akordu internasionál sira iha matéria hirak ne’ebé sai hanesan nia kompeténsia, liuliu iha ámbitu seguransa interna, investigasaun kriminál, migrasaun no kontrolu fronteira sira no protesaun sivil; koordena no monitoriza, liuhusi koordenasaun ho Ministériu Negósiu Estranjeiru no Kooperasaun nian, asaun kooperasaun nian hirak ne’ebé dezenvolve husi organizasaun internasionál, Estadu sira ka forsa no servisu seguransa nian husi nasaun sira seluk, iha apoiu ba dezenvolvimentu ba área hirak ne’ebé nia fó tutela, iha ámbitu akordu internasionál hirak ne’ebé temi uluk ona no estabelese mekanizmu kolaborasaun no koordenasaun nian ho órgaun Governu nian sira seluk ne’ebé fó tutela kona-ba área sira husi atividade hirak ne’ebé iha ligasaun ba malu.

Ministru Planeamentu no Investimentu Estratéjiku

Kay Rala Xanana Gusmão

Ministériu Planeamentu no Investimentu Estratéjiku mak órgaun sentrál Governu nian ne’ebé responsavel ba konsesaun, koordenasaun no avaliasaun ba polítika ne’ebé Konsellu Ministrus define no aprova ba área promosaun dezenvolvimentu ekonómiku no sosiál nasaun nian.

Liuhusi planeamentu estratéjiku no integradu no rasionalizasaun rekursu finanseiru sira ne’ebé iha, no asume responsabilidade espesífika sira kona-ba implementasaun Planu Estratéjiku Dezenvolvimentu, liuliu ida ne’ebé hatete kona-ba Infraestrutura no Planeamentu Urbanu, Petróleu no Rekursu Minerál sira, Planeamentu no Ordenamentu Territóriu nian.

Kompete ba Ministériu Planeamentu no Investimentu Estratéjiku nia responsabilidade kona-ba kualidade servisu no atividade ezekusaun projetu fíziku ba Fundu Espesiál sira no obra konstrusaun nian sira seluk, Komisaun Nasionál Aprovizionamentu - (CNA-sigla iha lian portugés); Ajénsia Dezenvolvimentu Nasionál-ADN;

Tuir baze estatístiku no kadastru ne’ebé disponibiliza hosi servisu kompetente sira, kompete ba Ministru Planeamentu no Investimentu Estratéjiku hodi avalia projetu sira kapitál dezenvolvimentu nian, bazeia ba-iha análize tuir kritéria kona-ba viabilidade projetu sira nian no kona-ba kustu-benefísiu ne’e rasik; superviziona, fiskaliza no sertifika implementasaun no ezekusaun projetu sira, hodi kontribui ba rasionalizasaun rekursu finanseiru hirak ne’ebé iha no mós ba dezenvolvimentu ekonómiku no atividade ekonómika, iha nivel nasionál, distritál no lokál; halo planu no kontrola kustu kualidade husi projetu kapitál dezenvolvimentu nian sira; promove transparénsia no kualidade liuhusi prestasaun servisu aprovizionamentu nian ba projetu sira kapitál dezenvolvimentu nian; dezenvolve estudu, paresér no análize téknika no mós setór nian sira ho hanoin atu halo avaliasaun kona-ba impaktu no viabilidade ekonómika husi projetu sira dezenvolvimentu nian; analiza no halo selesaun ba proposta sira investimentu nian ba nasaun; asegura koordenasaun no implementasaun Planeamentu Dezenvolvimentu Integradu Distritál, liuhusi koordenasaun ho entidade relevante sira; asegura koordenasaun no implementasaun Programa Nasionál Dezenvolvimentu Suku sira nian; dezenvolve no implementa polítika no mekanizmu sira kona-ba apoiu ba dezenvolvimentu komunitáriu no dezenvolvimentu Suku sira nian; dezenvolve Programa Objetivu sira Dezenvolvimentu Miléniu nian ba Suku sira; halo estudu, planu no propoin polítika sira kona-ba dezenvolvimentu setór sira nian; halo estudu, planu no propoin polítika nasionál kona-ba abitasaun (uma hela-fatin); halo estudu, planu no propoin planeamentu urbanu, iha territóriu laran tomak; propoin no dezenvolve polítika nasionál kona-ba rekursu naturál no minerál nian sira; fó apoiu ba dezenvolvimentu kuadru legál no regulamentár kona-ba atividade hirak ne’ebé iha relasaun ho rekursu enerjetíku renovavel sira; fó apoiu ba estudu sira kona-ba kapasidade rekursu enerjétiku renovavel no rekursu enerjia alternativa nian sira; mantein arkivu informasaun nian ida kona-ba operasaun no rekursu enerjétiku renovavel sira; fó kontribuisaun ba dezenvolve polítika nasionál kona-ba transporte no komunikasaun sira; tulun atu prepara no dezenvolve, liuhusi kooperasaun ho servisu públiku sira seluk no halo implementasaun ba planu rodoviáriu teritóriu nasionál nian; fó apoiu ba koordenasaun no promosaun sistema ida kona-ba jestaun, manutensaun no modernizasaun ba infraestrutura aeroportuária sira nian, navegasaun aérea, rodoviária, viária, portuária no servisu sira ne’ebé mak iha ligasaun; propoin no dezenvolve polítika kona-ba kapasitasaun rekursus umanus sira, tuir nesesidade, ba tempu badak, médiu no mós ba tempu naruk, no iha área hirak ne’ebé importante ba dezenvolvimentu nasaun nian.

Servisu no organizmu sira ne’ebé Ministériu Planeamentu no Investimentu Estratéjiku fó superintendénsia maka hanesan tuirmai ne’e: Komisaun Nasionál Aprovizionamentu – (CNA – sigla iha lian portugés); Ajénsia Dezenvolvimentu Nasionál - ADN, Sekretariadu Projetu Boot sira no Unidade Misaun ba Dezenvolvimentu Rejionál Integradu-TIA

Vise-Ministra Edukasaun I

Dulce Jesus Soares

Sei publika...

Vise-Ministru Edukasaun II

Abel da Costa Ximenes

Sei publika...

Vise-Ministru Agrikultura no Peska

Marcos da Cruz

Sei publika...

Vise-Ministru Administrasaun Estatál

Tomás do Rosário Cabral

Sei publika...

Vise-Ministru Negósius Estranjeirus no Kooperasaun

Roberto Sarmento de Oliveira Soares

Vise-Ministru Negósiu Estranjeiru no Kooperasaun fó apoiu ba Ministru Negósiu Estranjeiru no Kooperasaun, no halo supervizaun ba xefia servisu sira Administrasaun, Planu Finansas, Rekursu Umanu no Asuntu Jurídiku nian sira ne’ebé integra iha administrasaun direta iha ninia Ministériu.

Nia mós sai hanesan responsavel ba servisu ne’ebé trata kona-ba asuntu konsulár no protokolár nian sira, no ba matéria diplomátika no kooperasaun nian sira kona-ba Asosiasaun Nasoins Sudeste Aziátiku (ASEAN).

Vise-Ministru Finansas

Hélder Lopes

Vise-Ministru Finansas tulun Ministra Finansas iha jestaun kona-ba asuntu esternu Ministériu nian, inklui relasaun ho oganizasaun internasionál sira no entidade nasionál sira, no mós koordenasaun kona-ba projetu no programa entre Timor-Leste no parseiru dezenvolvimentu nian sira, iha ligasaun ho Ministériu Negósius Estranjeirus no Kooperasaun.

Superviziona elaborasaun no publikasaun kona-ba estatístika ofisiál sira, nune’e mós ho dokumentu sira seluk ne’ebé Ministériu Finansas elabora, hanesan livru Orsamentu Jerál Estadu nian sira, informasaun sira kona-ba planeamentu, relatóriu kona-ba ezekusaun orsamentu, no seluseluk tan.

Vise-Ministru ne’e Iha mós responsabilidade atu koordena komunikasaun no relasaun públika Ministériu Finansas nian no atu jere asuntu polítiku sira. Kompete ba nia atu halo ligasaun entre Ministériu ne’e ho Parlamentu Nasionál no ninia komisaun espesializada sira, kona-ba proposta lejizlativa sira no kona-ba prestasaun informasaun kona-ba área Finansas nian.

Kompete mós ba nia atu superviziona aplikasaun Reforma Fiskál ne’ebé Konsellu Ministrus aprova ona.

Vise-Ministra Saúde

Ana Isabel Soares

Sei publika...

Vise-Ministru Solidariedade Sosiál

Miguel Marques Manetelu

Sei publika...

Vise-Ministru Komérsiu, Indústria no Ambiente

Filipus Nino Pereira

Sei publika...

Constâncio da Conceição Pinto

Husi 16/02/2015 to'o 10/08/2016, loron ne'ebé nia simu pose hanesan Ministru Komérsiu, Indústria no Ambiente.

Vise-Ministru Obras Públikas, Transporte no Komunikasaun I

Januário da Costa Pereira

Vise-Ministru Obras Públikas, Tranportes no Komunikasaun I fó apoiu ba Ministru Obras Públikas, Transportes no Komunikasaun iha supervizaun kona-ba servisu internu sira ne’ebé sai hanesan responsavel ba área eletrisidade nian, água no saneamentu.

Vise-Ministru Obras Públikas, Transporte no Komunikasaun II

Inácio Moreira

Vise-Ministru Obras Públikas, Transportes no Komunikasaun II fó apoiu ba Ministru Obras Públikas, Transportes no Komunikasaun iha supervizaun ba servisu internu sira ne’ebé sai hanesan responsavel ba área transporte terrestre, marítimu no aéreu, meteorolojia no jeofízika no ba servisu postál sira-nian.

Nia simu hanesan delegasaun, tutela ba Administrasaun Portu sira Timor-Leste nian (APORTIL), Empreza Públika Administrasaun Aeroportu sira no Navegasaun Aérea Timor-Leste (ANATL.EP), no Autoridade Aviasaun Sivíl Timor-Leste (AACTL, sigla iha lia-portugés) no Autoridade Nasionál Komunikasaun sira nian (ANC, sigla iha lia-portugés).

Sekretáriu Estadu Konsellu Ministrus

Avelino Maria Coelho da Silva

Sekretáriu Estadu Konsellu Ministrus fó apoiu ba Primeiru-Ministru no Ministru Estadu Prezidénsia Konsellu Ministrus, iha ámbitu koordenasaun ba prosesu lejizlativu Governu nian.

Kompete, liuliu, ba nia: halo koordenasaun kona-ba elaborasaun no análize ba projetu lejizlativu no regulamentu Governu nian, atuhodi promove kualidade, armonizasaun no simplifikasaun ba aktu lejizlativu no regulamentu sira; halo koordenasaun ba prosedimentu aprovasaun no publikasaun ba diploma sira, garante meiu hirak ne’ebé hodi rona ba entidade públika no privadu sira; halo tradusaun ka akompaña tradusaun diploma legál sira ka dokumentu sira seluk ne’ebé mak importante ba asaun Prezidénsia Konsellu Ministrus (PKM) no Primeiru-Ministru ninian; asegura prestasaun ba apoiu jurídiku, informativu, tékniku no administrativu ba Konsellu Ministrus, ba Primeiru-Ministru, ba Ministru Estadu no ba membru Governu hirak ne’ebé mak halo parte iha PCM no mós garante avaliasaun ba impaktu husi aktu normativu sira.

Delega ba Sekretáriu Estadu Konsellu Ministrus tutela ba Gráfika Nasionál.

Sekretária Estadu Asuntu Parlamentár

Maria Terezinha Viegas

Sekretária Estadu Asuntu Parlamentár tulun Primeiru-Ministru iha relasaun Governu nian ho Parlamentu Nasionál no ho bankada parlamentár sira.

Kompete, liuliu, ba nia: reprezenta Governu iha sorumutuk no Konferénsia Reprezentante Bankada Parlamentár sira nian no mós ho órgaun parlamentár sira seluk, hanesan Meza; reprezenta Governu hodi hato’o opiniaun jurídika bainhira solisitadu kona-ba prosesu lejizlativu, rezolusaun no fiskalizasaun polítika parlamentár sira ne’ebé Governu tenke partisipa ka hetan xamada atu intervein; akompaña nafatin prosesu sira ne’ebé maka temi ona iha kotuk ba ne’e, hodi halibur elementu hotu ne’ebé maka konsidera importante hodi mantein Governu informadu kona-ba dezenvolvimentu prosedimentu oioin bainhira presiza; elabora informasaun sira, prepara dokumentasaun no elabora nota instrumentál sira iha buat hotu ne’ebé maka iha relasaun ho atividade Parlamentu Nasionál nian la’ós de’it iha karakter internu, ajendamentu kona-ba inisiativa lejizlativa no rezolusaun, no koordenasaun entre órgaun soberania rua nian; reprezenta Governu no kolabora, bainhira Parlamentu Nasionál husu tenke halo redasaun finál ba aktu lejizlativu sira ka rezolusaun Parlamentu Nasionál nian ne’ebé maka presiza atu publika iha Jornal da Repúblika no mantein arkivu dokumentasaun no informasaun nian ida iha ámbitu parlamentár, atu nune’e bele informa ba Governu iha tempu sa’ida de’it, kona-ba asuntu ruma ne’ebé mak iha relasaun ho Parlamentu Nasionál.

Delega ba Sekretária Estadu Asuntu Parlamentár tutela ba Gabinete Asuntu Paralmentár.

Sekretáriu Estadu Komunikasaun Sosiál

Nélio Isaac Sarmento

Sekretáriu Estadu Komunikasaun Sosiál tulun Primeiru-Ministru no Ministru Prezidénsia Konsellu Ministrus iha área Komunikasaun Sosiál nian, no iha kompeténsia atu promove dezenvolvimentu no regulasaun ba ezersísiu atividade meiu kounikasaun sosiál nian sira, liuliu, imprensa, rádiu no televizaun.

Kompete, liuliu, ba nia: koordena diseminasaun informasaun kona-ba programa no asaun sira husi Governu, hodi garante ba transparénsia no asesu ba informasaun; hamosu hanoin ruma, hala’o no avalia polítika públika sira ba komunikasaun sosiál; promove no dezenvolve ajénsia notísia Timor-Leste nian, no ezerse tutela kona-ba órgaun sira komunikasaun sosiál Estadu nian.

Delega ba Sekretáriu Komunikasaun Sosiál tutela ba Diresaun Nasionál Diseminasaun Informasaun, Sentru Rádiu Komunidade, no superintendénsia ba RTTL – Rádiu no Televizaun Timor-Leste, EP.

Sekretária Estadu ba Apoiu no Promosaun Sósiu-Ekonómika ba Feto

Veneranda Lemos Martins

Sei publika...

Sekretáriu Estadu Juventude no Desportu

Leovigildo Hornay

Sei publika...

Sekretáriu Estadu ba Polítika Formasaun Profisionál no Empregu

Ilídio Ximenes da Costa

Sei publika...

Sekretáriu Estadu Fortalesimentu Institusionál

Sei publika...

Sekretáriu Estadu Administrasaun Estatál

Samuel Mendonça

Sei publika...

Sekretáriu Estadu Terra no Propriedade

Jaime Xavier Lopes

Sei publika...

Sekretária Estadu Arte no Kultura

Maria Isabel de Jesus Ximenes

Sei publika...