Papél media ba igualdade jéneru
Sekretaria Estadu ba Promosaun Igualdade (SEPI), hamutuk ho Sekretária Estadu Komunikasaun Sosiál (SEKOMS), Centro de Formação Técnica em Comunicação (CEFTEC) no ONG Internasionál Paz y Desarollo (PyD), organiza Workshop ho tema “Média ho Perspetiva Jéneru’’, iha loron 12 Marsu.
Objetivu hosi workshop, atu hakbiit kapasidade média sira-nia kuñesimentu kona-ba jéneru no halo kobertura ba asuntu promosaun igualdade jéneru iha Timor-Leste.
“Ha’u sente orgullu tebetébes, tanba média, hosi Díli no distritu 13 marka prezensa iha ne’e, atu fó ideia, hanoin krítiku, estratéjiku no konstrutivu kona-ba promosaun igualdade jenéru iha Timor-Leste”, Sekretária Estadu Promosaun Igualidade, Maria Idelta Rodrigues hatete iha nia diskursu.
Nia hateten, liu husi media komunikasaun sosiál ema hotu bele hatene progresu dezenvolvimentu nasionál. Prezensa media, hanesan fatór determinante atu influénsia polítika sosiu kultura iha nasaun ne’e. “Media mak bele halo mudansa ba sosiedade nia móris”, tenik Idelta Maria Rodrigues.
Iha fatin hanesan, Sekretária Estadu Komunikasaun Sosiál (SEKOMS), Nélio Isaac Sarmento rekuñese media nia papél atu promeve jéneru. Maske nune’e, media sira mós presiza atu halo evaluasaun kona-ba papél media ba asuntu jéneru dezde tinan 2000 to’o ohin loron.
Atu alkansa objetivu, presiza iha pensamentu hanesan entre movimentu feto ho média sira kona-ba estratéjia luta kontra igualdade jéneru. Presiza iha kolaborasaun entre média ho organizasaun sosiedade sivil, organiza treinamentu intensivu ba média sira, atu dezenvolve sensebilidade ba jéneru.
“Governu sempre kria kondisaun atu fó treinamentu kona-ba ba Igualidade jéneru ba média sira. Husu ba organizasaun média sira, atu bele tau atensaun oituan kona-ba situasaun feto nian”, Nelio dehan tan.
Marka prezensa mos iha Workshop ne’e, Adjuntu Provedoria Direitus Humanus no Justisa, Prezidente Konsellu Administrasaun RTTL, EP, Milena Abrantes Gonzaga, Diretór Paz y Desarollo, Carlo Condeli, Diretór Média, Jornalista sira hotu tantu Nasionál, Diretór Nasionál no Xefe Departementu sira husi instituisaun Governu nian no instituisaun seguransa Estadu nian sira inklui reprejentante rádio komunidade sira husi distritu sanulu resin tolu.
