Governu Timor-Leste

Komisaun Funsaun Públika, tersa-feira, loron 10 Abril 2012, iha salaun nobre Ministériu Negósiu Estranjeiru, organiza sorumutu konsultivu ida ho Diretór Jerál, Diretór Nasionál no Administradór sira husi distritu 13, ho objetivu atu hato’o informasaun kona-ba partisipasaun funsionáriu públiku no ajente Administrasaun Públiku sira iha atividade polítika no partidária.

“Konstituisaun RDTL garante direitu partisipasaun iha polítika ba sidadaun hotu ka hotu-hotu bele partisipa iha vida polítika no mós asuntu públiku sira pais nian. Nune’e funsionáriu publiku sira no ajente administrasaun públika nian,nu’udar sidadaun hetan devér espesiál sira,ne’ebé hakerek iha estatutu funsaun públika (lei no.8/2004 no lei no.5/2009). Hosi devér sira ne’e ko’alia mós devér sira kona-ba izensaun no imparsialidade, iha respeitu ba igualdade sidadaun sira nian no ba neutralidade polítika funsaun públika”, hateten, Prezidente Komisaun Funsaun Públiku, Libório Pereira.

Libório hatutan tan katak, “iha orientasaun Komisaun Funsaun Públiku nian, No.5/2011,loron 15 fulan Novembru hateten katak funsionáriu públiku no ajente administrasaun públiku labele hala’o atividade polítiku-partidu sira iha fatin servisu ka durante oras servisu nian, ne’ebé envolve iha atividade profisionál (Estatutu Funsaun Públiku, artigu 42), Proibidu uza patrimóniu estadu nian ba iha atividade polítika no partidáriu, hanesan kareta, kombustivel, telefone, materiál eskritóriu no bein sira seluk propriedade públika nian. Aleinde ne’e, ba funsionáriu públiku ne’ebé hakarak kandidata an ba kargu eletivu iha direitu atu husu lisensa espesiál lahó vensimentu durante periudu kampaña eleitóral, ida ne’e garante mós iha artigu 55 estatutu funsaun públika nian.

Partisipa iha sorumutu ne’e Prezidente Komisaun Funsaun Públika, Liboriu Pereira, Prezidente Komisaun Antí-Korupsaun, Adérito de Jesus, Adjuntu Provedór Direitus Umanus no Justisa, Inspetór Jerál Estadu, Francisco de Carvalho, Diretór Jerál no Diretór Nasionál sira.