Ministériu Edukasaun organiza sorumutu kona-ba papél funsionáriu públiku nian no dezenvolvimentu Timor-Leste
Ministériu Edukasaun (ME) V Governu Konstitusionál, iha loron 24 fulan Outubru iha sentru Konvensaun Dili, hala’o sorumutu dahuluk, kona-ba papél funsionáriu públiku nian iha Ministériu Edukasaun no Dezenvolvimentu Timor-Leste.
Ministru Edukasaun, Bendito dos Santos Freitas iha nia intervensaun hodi loke sorumutu ne’e hateten “Importánsia hosi sorumutu ne’e, mak atu hametin liután unidade institusionál no relasaun, hodi kontribui ba servisu hamutuk iha ambiente ida ne’ebé ho vontade di’ak liu no dedikasaun ne’ebé aas. Tanba ne’e mak iha ita nia sorumutu ohin marka prezensa mós Komisaun Funsaun Públiku, KAK no PDHJ, hodi fó mós sira nia hanoin mai ita, oinsá ita bele la’o hamutuk iha mandatu V Governu ida ne’e.”
Prezidente Komisaun Funsaun Publika (KFP), Libório Pereira, fó sai katak, KFP mak tau matan ba jestaun rekursu umanu iha administrasaun públika TL nian, ne’ebé tuir ita-nia konstituisaun karáter sivilista, papél administrasaun públika ne’e órgaun ezekutivu nian labele fó ba ema seluk no KFP ajénsia ida ne’ebé idenpendente.maibé iha interdependénsia institusionál no Ita nia konstituisaun fó liberdade ba kualkér sidadaun atu expresa idea.
“Ita nia estrutura iha ME presiza konsolida didi’ak falta koordenasaun. KFP sei tulun atu proteje funsionáriu sira maibé funsionáriu mós tenke tuir étika. No iha Kompeténsia haat ne’ebé estabelese ba ita-nia enkuadramentu, ita presiza aumenta tan, aleinde kompeténsia didátika, metodolójika, pedagójika no mós linguístika, dala ida tan KFP prontu atu tulun kualkér esforsu ne’ebé edukasaun atu foti, informa Prezidente KFP.
Sorumutu ba dahuluk ne’e partisipa hosi Funsionáriu públiku iha Ministériu Edukasaun, liu-liu diretór-jerál, diretór nasionál, rejionál, distritál, superintendente, no inspetór eskolár sira.
