Komunikadus
- 11 maiu 2010Sorumutu Estraordináriu Konsellu Ministrus loron 11 fulan Maiu tinan 2010GOVERNU KONSTITUSIONÁL IVhare tan
KOMUNIKADU BA IMPRENSA
Sorumutu Estraordináriu Konsellu Ministru iha loron 11 fulan Maiu tinan 2010
Konsellu Ministru hala’o Sorumutu iha loron Tersa, loron 11 fulan Maiu tinan 2010, iha sala Sorumutu Konsellu Ministru nian iha Palásiu Governu nian, iha Dili, no halo aprovasaun ba:
1. Rezolusaun ne’ebé Aprova Nomeasaun ba Membru sira Komisaun Akompañamentu Prosesu promosaun nian
Ohin, Konsellu Ministru halo aprovasaun ba membru sira ne’ebé atu halo parte ba Komisaun Akompañamentu ba Prosesu Promosaun Polísia Nasionál Timor-Leste (PNTL). Lista ne’e kompostu husi membru na’in hitu mak hanesan: Dra. Isabel Ferreira (Prezidente), Sra. Madre Guilhermina Marçal (vogal), Dr. Anacleto Ribeiro (Vogal), komisáriu Afonso de Jesus (Vogal) Superintendente-Xefe Faustino Cardoso (Vogal), Superintendente-Xefe José Soares (Vogal) no Sr. Bart Laan (Vogal).
2. Dekretu-Lei kona-ba Rejime Espesiál Karreira ba Profisionál Klíniku Saúde nian sira
Dekretu-Lei ne’ebé hetan aprovasaun iha Sorumutu konsellu Ministru nian ne’e enkuadra Profisionál Klíniku Saúde nian sira, ne’ebé submete ba Administrasaun Públika, ba Rejime Espesiál Karreira nian no aplika ba profisionál efetivu sira ne’ebé ezerse sira nia funsaun iha estabelesimentu públiku saúde nian.
Jestaun profisionál sira ne’e nian hakruuk ba prinsípiu integrasaun nian iha Servisu Nasionál Saúde nian – atu nune’e bele iha armonia entre nesesidade organizasionál no kuadru efetivu sira -, ba valorizasaun Profisionál sira Saúde nian – tanba koñesimentu ne’ebé sira hetan ona no ba sira nia empeñu, ho objetivu atu aplika di’ak liután rekursu umanu hodi defende interese públiku iha área saúde nian -, fó estímulu ba dezenvolvimentu nasionál no ba estrutura kargu no karreira nian.
Kuadru Kerreira Profisionál Saúde nian subdivide ba grupu lima: Karreira médika. Karreira saúde públika, karreira enfermajen, karreira parteira, karreira tékniku diagnóstiku no terapeútiku. Iha karreira haat ne’e nia laran bele fahe ba tipu karreira oin rua: karreira ospitalár no karreira kuidadu primáriu.
Evolusaun iha karerira la’o tuir Rejime Karreira no kargu diresaun no xefia nian husi Adminitrasaun Públika nian (DL n.o 27/2008 loron 11 fulan Agostu).
3. Dekretu-Lei kona-ba asisténsia Médika iha Rai-li’ur
Ministériu Solidariedade Sosiál, hamutuk hó Ministériu Saúde akompaña aprovasaun ne’ebé Konsellu Ministru halo ba Dekretu-Lei ne’ebé regulamenta asisténsia médika iha rai-li’ur, tuir buat ne’ebé Lei sistema Saúde nia prevee ona.
Aprovasaun ba dekretu lei ida ne’e hatán ba Programa Governu Konstitusionál IV ne’e’bé prevee revizaun no aprovasaun Lejizlasaun ba setór saúde nian ho objetivu atu promove igualdade iha asesu ba kuidadu saúde nian.
Projetu ne’e husu atu Ministru Saúde aprova gia ida ne’ebé halo deskrisaun kona-ba tratamentu, intervensaun ka ezame diagnóstiku esensiál ne’ebé, tanba la iha posibilidade materiál ka umana, labele realiza iha estabelesimentu saúde nasionál tanba ne’e sira rasik tenke hatudu instituisaun estranjeira hirak ne’ebé bele fo asisténsia saúde ho kualidade no ho folin ne’ebé razoavel.
4. Proposta Lei kona-ba Investimentu Privadu
Proposta Lei kona-ba investimentu privadu, ne’ebé hetan aprovasaun iha Konsellu Ministru, hatudu Governu ida ne’e nia servisu kona-ba kriasaun rikeza no empregu ne’ebé la halo parte ba atividade no kuadru sira Estadu nian.
Tanba ne’e, iha perspetiva atu atrai investimentu privadu, importante atu muda lejizlasaun ne’ebé iha ona kona-ba investimentu nasionál esternu, ho lei foun sira ne’ebé bele aplika ba invesvtidór sira sein haree ba sira nia nasionalidade ka hela-fatin.
Lejizlasaun ne’ebé hetan aprovasaun, estabelese kuadru legál ba lokál investimentu ho prosesamentu simples no atendimentnu úniku ba investidór sira no determina konjuntu husi direitu no garantia ba investidór sira husi setór hotu-hotu, sein haree ba nasionalidade. Esklarese kona-ba benefísiu no intensivu fiskál no aduaneiru sira, nune’e mós hanesan kondisaun ba arendamentu imóvel nian sira ba Estadu no subsidiu sira ba formasaun traballadór nasionál nian sira.
Nune’e, mak Governu hakarak promove investimentu privadu liu hosi pesóa singular ka kolektiva, la haree ba pesóa hirak ne’e hosi rai-laran ka hosi liur, nune’e mos investidór lokál sira hodi la haree ba sira ne’e hela iha ne’e ka lae.
5. Rezolusaun kona-ba Planu atu Harí Banku Dezenvolvimentu Nasionál Timor-Leste
Ho rezolusaun ida ne’e mak prosesu formal atu harí Banku Dezenvolvimentu Nasionál Timor-Leste hahú la’o.
Buat ne’ebé mak Konsellu Ministru aprova ohin mak kona lós atu harí banku, detensaun ba ninia kapital no halo kalendarizasaun kona-ba atu implementa ninia aktividade hirak presija. Banku ida ne’e sei sai banku ida ho “Klase A” ne’ebé ninia lala’ok sei sentra atu finansia kapitál ba funsionamentu empreza hirak nataton no boot nian, hodi permiti fo tulun ba emprezariu sira hodi dada investimentu privadu.
Prosesu harí Banku Dezenvolvimentu Nasionál ne’e tuir dei’t rekizitu hirak ho natureza juridika, kontabilista no finanseira. Nune’e mak presija hakerek Dekretu-lei kriasaun nian, hamutuk ho estatutu, Regulamentu Internu kona-ba ninia funsionamentu no atu aprova lejislasaun ida ne’ebé permiti atu harí entidade bankária Estadu nian ida no iha tempu oin mai atu fa’an partisipasaun ba ema terseiru sira inklui mós partikular timor oan sira.
Banku foun ne’e sei hetan formatu parseiria publiku-privadu ho ninia kapitál boot liu (51%) mak sei fó hosi estadu no kapital ida seluk 49% husi investidór privadu sira no husi Bank Rakyat Indonesia (BRI) ne’ebé mak sei tulun mós ho apoiu hirak presija ba administrasaun banku ne’e rasik.
6. Rezolusaun Governu ne’ebé nomeia Komisáriu Timor-Leste nian ba Aliansa Civilizasaun nian sira
Aliansa Civilizasaun nian sira promove, iha komunidade internasionál, diálogu no aksaun hirak konjuntu entre kultura oin-oin no defende diversidade no toleránsia hanesan valor hirak primeiru kedas atu harí Dame iha Nasaun sira nia le’et.
Repúblika Demokrátika Timor-Leste, tanba hakarak hola parte iha organizasaun internasional ida ne’e, nia nomeia tiha ona Profesór Benjamin de Araújo Corte-Real hanesan personalidade ida mak rekoñesidu iha meritu no prestíjiu, atu sai nu’udar Komisáriu Timor-Leste nian ba Aliansa Civilizasaun sira.
Konsellu Ministru analiza tiha ona mós:
1. Dekretu-Lei ne’ebé mak aprova Estatutu Profisionál Guarda Prizaun nian sira
Iha sorumutu loron ohin nian, Ministériu Justisa aprezenta Estatutu Profisaun Guarda Prizaun nian sira. Nune’e mak Membru Konsellu Ministru nian sira haksesuk hodi bele aprova karreira espesiál ba ema guarda sira prizaun nian hodi rekoñese sira nia spesifisidade kona-ba sira nia funsaun, limitasaun, restrisaun, responsabilidade no risku hirak boot ne’ebé mak sira bele hetan bainhira hala’o sira nia profisaun. Aprovasaun ba Dekretu-Lei ne’e rai hela ona ba sorumutu oin mai iha Konsellu Ministru.
2. Dekretu-Lei ne’ebé aprova Karreira ema Konservadór no Notariu sira nian
Funsionariu Konservadór no Notariu sira nu’udar ema delegadu sira ne’ebé hetan konfiansa husi públiku atu kaer responsabilidade ba administrasaun públika ho interese privadu, mak Dekretu-Lei ne’ebé foin aprezenta ne’e hakarak defini ninia estatutu, hodi integra rejime rekrutamentu, ingressu ba karreira, nomeasaun, progresaun no remunerasaun sira. Matéria ida ne’e, Konsellu Ministru sei apresia hikas fali.
- 10 maiu 2010Sorumutu Estraordináriu Konsellu Ministrus loron 10 fulan Maiu tinan 2010GOVERNU KONSTITUSIONÁL IVhare tan
KOMUNIKADU BA IMPRENSA
Sorumutu Konsellu Ministru Loron 10 Fulan Maiu tinan 2010
Konsellu Ministru hala’o Sorumutu iha Segunda-feira, loron 10 fulan Maiu 2010, iha Sala Sorumutu Konsellu Ministru, iha Palásiu Governu, iha Díli, no analiza tiha ona:
1. Dekretu Lei N o 4/2008 loron 4 fulan Marsu, kona-ba Orgánika Ministériu Negósiu Estranjéiru nian
Proposta alterasaun ba estrutura Orgániku Ministériu Negósiu Estranjéiru nian, ohin aprezenta ona iha Sala Sorumutu Konsellu Ministru, hodi klarifika atribuisan sira no kompeténsia ba Servisu Ministériu nian. Ministériu hanoin katak presiza hadi’a, aumenta no adapta organizasaun sevisu nian inklui mós misaun diplomátika no postu konsulár sira no mós promove profisionalizmu, atu servisu sira ne’e bele sai efikás no hetan rezultadu diak. Nia aprovasaun sei hatama fila fali ba Sorumutu Konsellu Ministru semana oin mai.
2. Aprezentasaun Levantamentu kona-ba Persepsaun Kualidade Servisu
Ministériu Finansa aprezanta ona, ba Konsellu Ministru, rezultadu avaliasaun kona-ba kualidade servisu nian ne’ebé mak husu ba Asia Foundation. Avaliasaun ne’e halo iha fulan rua uluk iha tinan ida ne’e no bazeia ba persepsaun kliente sira nian katak mekanizmu reporte periódiku ida ne’ebé hili ne’e mak bele ajuda prosesu servisu Ministériu Finansa nian di’ak liu tan.
Tuir estudu ida fó sai katak, interasaun ne’ebé mosu beibeik ho prosesu aduaneiru, hatudu satisfasaun nível ida ne’ebé kiik tanba konsidera komplikadu loos. Iha seluk fali, bainhira uza Despaixante hatudu katak, iha vantanjen no presiza tebes.
Kona-ba impostu sira, nia rezultadu hatudu katak informasaun fiskál hirak ne’ebé fó tiha ona ne’e mesak diak. Kona-ba aprovizionamentu, nível satisfasaun no konfiansa nian tun, bele dehan katak sei presiza haburas nia kualidade no asesu ba informasaun kona-ba konkursu nian.
Atu oinsá mós, bele dehan katak, tenke kontinua nafatin hodi hetan informasaun kona-ba reasaun hosi parte kliente sira no mos halo avaliasaun ba reforma no hadi’a hikas nia prosesu. Disponibilidade no asesu ba informasaun nian tenke di’ak liu ona, formasaun kontinua (ho formasaun no sesaun traballu esternu nian) atu bele aumenta kualifikasaun no kapasidade interna nian, hodi hala’o dezempeñu.
3. Aprezentasaun Sínteze Planu Reintegrasaun estudante medisina hamutuk nain 465 ne’ebé fila fali mai Timor Leste iha tinan 2010
Iha tinan ne’ebé estudante medisina hamutuk nain atus haat nenulu resin lima (465) fila fali mai país, Ministériu Saúde (MS) aprezenta ona sínteze Planu Reintegrasaun estudante Medisina sira ne’ebé hela dauduan iha Cuba.
Proposta Reintegrasaun tama iha programa Dezenvolvimentu Rekursu Umanu Saúde nian maibé kustu hirak ne’ebé afeta ba sira la tama iha Orsamentu Jerál Estadu nian ba tinan 2010.
Tanba ne’e mak, MS aprezenta orsamentu ne’ebé nia konsidera presiza tebe-tebes hodi implementa proposta Planu ida ne’e. Iha orsamentu ne’e, iha konsiderasaun ba viajen, treinamentu iha distritu sira, konstrusaun no reabelitasaun ba Sede sira, materiál no ekipamentu eskritóriu nian, dosentes sira, materiál mobiliáriu, transporte, akomodasaun, ekipamentu laboratóriu no ekipamentu médiku sira no seluk-seluk tan.
- 03 maiu 2010Deklarasaun Porta-vóz IV Governu Konstitusional iha 3 Maiu 2010Versau original iha português. Tradusaun ba tetum sidauk iha.hare tan
- 29 abril 2010Deklarasaun Porta-vóz IV Governu Konstitusional iha 29 Abril 2010Governu Timor-Leste la simu Woodside nia konseitu kona-ba Plataforma Flutuante GNL nian iha Sunrisehare tan
- 21 abril 2010Deklarasaun Porta-vóz IV Governu Konstitusional iha 21 Abril 2010Sua Exa. Xanana Gusmão, Primeiru-Ministru Timor-Leste, hahú nia konsultas nasionais ho Povu kona-ba vizaun foun ida ba paíz, liuhusi Planu estratéjiku Dezenvolvimentu (PED) ba períodu 2011 to’o 2030hare tan
15 abril 2010Soru-mutu Konsellu Ministrus loron 14 fulan Abril tinan 2010GOVERNU KONSTITUSIONÁL IVhare tan
SEKRETARIA ESTADU KONSELLU MINISTRU
KOMUNIKADU BA IMPRENSA
Sorumutu Konsellu Ministru nian iha loron 14 fulan Abríl, tinan 2010
Sorumutu Konsellu Ministru, iha loron 14 fulan Abríl, tinan 2010, iha kuarta-feira ida ne’e, hala’o iha Sala Sorumutu Konsellu Ministru nian, iha Palásiu Governu, iha Díli, hahuu ho esklaresimentu kona-ba situasaun Ministru Negósiu Estranjeiru nian, iha órgaun komunikasaun sosiál sira nia oin. Tanba mensajen liu husi telemóvel ne’ebé Ministru Negósiu Estranjeiru haruka ba Sr. Primeiru-Ministru, liu husi Gabineti. Primeiru Ministru konsidera katak liafuan hirak hato’o hosi Zacarias da Costa durante prosesu ida ne’e “labele admite, labele tolera, halo afirmasaun ida ho intimidasaun no ladún iha valór”. Primeiru-Ministru dirije ba Ministru Negósius Estranjeirus katak “...ita boot halo sala tanba desizaun Primeiru-Ministru nian atu bolu embaixadór sira!”. Ikus liu, Zacarias da Costa husu deskulpa ba Konsellu Ministru.
Iha sorumutu ida ne’e, Konsellu Ministru analiza mós:
1. Rezolusaun ne’ebé altera Rezolusaun n0 16/2009, loron 19 fulan Agostu
Governu aprova tiha ona, iha fulan balu nia laran, atu harii Komisaun Interministeriál atu koordena programa Dezenvolvimentu Rurál. Tuir servisu ne’ebé hala’o tiha ona husi Komisaun haree katak iha nesesidade no importante tebes atu inklui iha Komisaun ida ne’e, reprezentante sira husi Ministériu Administrasaun Estatál no Ordenamentu Teritóriu, haree liu-liu kompeténsia ministériu ida ne’e nian iha ninia prosesu desentralizasaun administrativa Estadu nian no kriasaun munisipalidade sira.
2. Rezolusaun ne’ebé aprova Kontratu iha Tempu Badak nia laran ho Sunshine Petrol Group
Governu rezolve tiha ona atu promove kontratu ida iha fulan rua nia laran ho kompañia Sunshine Petrol Group, ne’ebé daudaun ne’e fornese kombustível ba jeradór EDTL. Justifikasaun ba kontratu iha tempu badak nia laran ida ne’e, tanba nesesidade klarifikasaun prosesu aprovizionamentu ne’ebé mak uluk hala’o tiha ona, hodi hamosu pedidu paresér nian ida ba Prokuradoria-Jerál Repúblika.
Konsellu Ministrus analiza tiha ona mós:
1. Proposta Lei kona-ba Investimentu Privadu
Lejizlasaun ida ne’e estabelese kuadru legál ba fatin investimentu nian ho prosesamentu simples no atendimentu ida de’it ba investidór sira no define direitu no garantia báziku hotu-hotu ba investidór sira husi setór hotu-hotu, nasionál ka internasionál.
Sistema ne’ebé prevee tiha ona no insentivu obedese ba eskalonamentu ida iha área jeográfika investimentu nian, nune’e atu favorese dezenvolvimentu ekonómiku iha Zona Rejionál Espesiál ne’ebé define tiha ona hosi lei ida ne’e.
Prevee tiha ona atu harii Ajénsia Espesializada ida ba Investimentu, hodi hatutan hala’o kna’ar no kompeténsia hirak Institutu Promosaun Investimentu Esternu no Esportasaun nian.
Hakarak halo revizaun lejizlativa ida ne’e, liu-liu atu sai hanesan promotór ba investimentu privadu hosi pesóa singulár ka koletiva estranjeira, nune’e mós ba investidór lokál sira ne’ebé hela iha nasaun nia laran ka hela iha estranjeiru, ne’ebé mak hakarak kontribui ho sira nia rekursu iha Timor-Leste.
Bele hateten katak, atu halo Lei ida ne’e, simu mós hanoin husi reprezentante investidór nasionál no estranjeiru sira, asessór no peritu nasionál no internasionál sira, nune’e mós funsionáriu no dirijente sira Administrasaun Públika nian.
2. Estatutu Ajénsia Espesializada Investimentu nian
Dekretu Lei ne’e aprova estatutu hirak Ajénsia Espesializada Investimentu nian, ne’ebé hanaran “Investe Timor-Leste”, sai nu’udar responsavel únika ba promosaun investimentu privadu no esportasaun iha país. Ajénsia ida ne’e sei sai nu’udar pontu atendimentu úniku husi ninvestidór privadu sira, hodi sentraliza prosedimentu administrativu uniforme iha asesu ba benefísiu no insentivu ne’ebé hatuur iha Lei Investimentu Privadu nian.
3. Regulamentu kona-ba prosedimentu Investimentu Privadu
Diploma ida ne’e halibur prosedimentu investimentu privadu oioin ne’ebé Ajénsia Espesializada Investimentu nian atu tau iha prátika hodi hala’o ninia atividade sira.
Prosedimentu administrativu ne’ebé prevee iha dokumentu ida ne’e hakarak sai simples, transparente no lalais, hodi permite artikulasaun ne’ebé presija ho entidade públika oioin ne’ebé envolve iha aprovasaun ba kualkér projetu investimentu no reinvestimentu nian iha Timor-Leste.
4. Estatutu Inspesaun Jerál Traballu nian
Objetivu Dekretu-Lei ida ne’e nian mak atu estabelese rejime estatutáriu ba atividade sira inspesaun, auditoria no fiskalizasaun nian, ba informasaun no akonsellamentu ne’ebé relasiona ho relasaun traballu Iha Timor-leste. Hakarak mós define kompeténsia sira Inspesaun Jerál Traballu nian (IJT) no forma prosesuál atu buka hatene responsabilidade sira bainhira hetan violasaun hasoru Lei no Regulamentu Traballu nian. Projetu ne’e prevee mós, iha ninia parte espesífika, atu regula rejime Karreira Inspetór Traballu no funsionáriu sira IJT nian.
Fiskalizasaun no konsensializasaun Empregadór no traballadór sira nian hetan ona promosaun husi Diresaun Nasionál Inspesaun Traballu (DNIT) ne’ebé pertense ba estrutura orgánika Sekretaria Estadu Formasaun Profisionál no Empregu. Maibé, atu servisu hirak Diresaun ne’e nian luan liután no hala’o tuir Padraun Internasionál Traballu nian, iha nesesidade atu estabelese Estatutu rasik ida, ne’ebé halo jestaun ba nia atividade sira.
Nune’e, Estatutu ida ne’ebé kria Inspesaun Jerál Traballu nian atu hodi hadi’a fortalesimentu Servisu Inspesaun Jerál Traballu nian iha país tomak, hodi prepara nia atu enfrenta no ultrapasa dezafiu hirak ne’ebé mosu iha Estadu Direitu ida, ne’ebé iha dezenvolvimentu ekonómiku no sosiál, hanesan ho ida ne’ebé ita hakarak ba Timor-Leste.
15 abril 2010Deklarasaun Porta-vóz IV Governu Konstitusional iha 15 Abril 2010Versaun original iha português. Tradusaun ba tetum sidauk.hare tan
10 abril 2010Deklarasaun Porta-vóz IV Governu Konstitusional iha 10 Abril 2010Versaun original iha português. Tradusaun ba tetum sidauk.hare tan
