Governu Timor-Leste

Konsellu Ministrus, iha sorumutuk estraordináriu, iha loron 16 fulan Abril, analiza ona objetivu estratéjiku no mekanizmu legál nian sira ne’ebé presiza atu harii Zona Ekonómika Espesiál.

Governu nia debate ida ne’e  hala’o bainhira Primeiru-Ministru, Kay Rala Xanana Gusmão akompaña husi eis Primeiru-Ministru, Mari Alkatiri, no husi membru Governu sira seluk halo vizita traballu baiha Oe-cusse Ambeno, ne’ebé sei implementa projetu-pilotu Zona Ekonómika Espesiál Merkadu (ZEESM) Timor-Leste nian.

Besik semana ida nia laran hahú husi loron 17 to’o loron 25 fulan Abril, delegasaun  ne’e sei mantein nafatin somutuk ho autoridade tradisionál, relijioza no distrit’al nian sira, inklui xefe suku, partidu polítiku sira, emprezáriu nasionál no lokál sira no hamutuk ho reprezentante sira husi sosiedade sivil distritu Oe-Cusse nian hodi halo debate ba implementasaun ZEESM dahuluk nian. Iha sorumutuk hirak ne’e sei halo análize ba projetu sira infraestrutura nian sira, hanesan konstrusaun aeroportu Oe-Cusse, konstrusaun estrada no ponte sira, no seluk-seluk tan, hanesan mos mekanismu legál sira ne’ebé relasiona ba projetu hirak ne’e.

Sei hanoin katak Planu Estratéjiku Dezenvolvimentu (PED) nian 2012-2013 prevee kriasaun Korredór Dezenvolvimentu Rejionál no Zona Estratéjika Nasionál sira, no ba ida ne’e hakarak kria lejislasaun no regulamentasaun espesífika ne’ebé define insentivu fiskál sira no direitu alfandegáriu espesífiku ba zona ekonómika espesiál sira, atu nune’e bele dada liután investimentu no estabelesimentu empreza nasionál no estranjeira sira.