Governu Timor-Leste

Iha loron 31 fulan Marsu, Ministru Estadu Negósius Estranjeirus no Kooperasaun, José Luís Guterres, dezloka ba Bruxelas, atu asina Akordu ida ho Uniaun Europeia.

Ministru José Luís Guterres, nu’udar Jestór Nasionál husi Autorizasaun ba Fundu Uniaun Europeia nian, akompaña husi Embaixadór Timor-Leste nian iha Bélgica, Nelson dos Santos, no husi Adjunta no Ordenadora Suplente Timor-Leste nian, Madalena Hanjan Soares, asina ona Akordu Finanseiru ba Fundu Europeu Dezenvolvimentu nian iha área Jestaun Finansas Públikas, ho valór millaun 5.560 dolar amerikanu.

José Luís Guterres hateten, Akordu ne’e ninia objetivu “atu hadi’a liu-tán polítika no kolekta impostu nian, atu nune’e ita labele depende de’it ba reseita petróleu no gás nian. Apoiu finanseiru-ne’e sei aloka ba Ministériu Finansas hanesan mós ba instituisaun sira seluk.

Asinatura hosi Akordu ne’e halo-tuir Akordu hirak seluk ne’ebé hametin tiha ona ho Uniaun Europeia, liu-liu ba Programa Reabilitasaun no Manutensaun estrada sira iha distritu (millaun 20 dolar amerikanu), iha Projetu Integradu ba Nutrisaun nian (millaun 14 dolar amerikanu) no iha Akordu Finanseiru husi Aliansa Mundiál hasoru Mudansa Klimátika nian (millaun 5,6 dolar amerikanu).

“Uniaun Europeia kompromete tiha ona atu fó apoiu tomak ba dezenvolvimentu sustentadu ba ita nia ekonomia,” afirma Ministru José Luís Guterres.