Governu Timor-Leste

Ministru Komérsiu, Indústria no Ambiente, António da Conceição, iha loron 29 Janeiru, iha eskritóriu Ministériu Komérsiu, Indústria no Ambiente (MKIA), Fomento, Díli, asina Memorandum of Undestanding (MoU) ho União Nasionál Pequenas Emprezas (UNAPE), hodi estabelese programa Loja ba Povu ba sub-distritu 65, iha territóriu laran tomak.

Ministru António da Conceição hateten, programa ne’e tama tiha ona iha Orsamentu Jerál Estadu tinan 2014.

“Ne’e hanesan intervensaun intermediáriu, atu kontrola sasán nesisidades báziku nia folin iha merkadu liuhusi fa’an ho folin baratu no sai instrumentu serví povu no hodi dezenvolve ekonomia iha rai laran”, Ministru Komérsiu, Indústria no Ambiente esplika.

Loja ba Povu ne’e, sei sai mós parseiru Governo nian iha progama intervensaun merkadu, hanesan fós, bainhira iha kondisaun ne’ebé presiza tébes atu atua.

Entertantu, Prezidente UNAPE, Francisco da Costa Cabral, hateten, “UNAPE prontu servisu hamutuk ho Governu hodi estabelese Loja ba Povu. Sasan nesesidades báziku sira ne’ebé sei fan iha Loja ba Povu nian ne’e mak hanesan fós, masin-midar, mina, temperus, modo, susu-ben, manu-tolun no terigu”.